๖. นนฺทกตฺเถรอปทานํ

๑๖๑. ‘‘มิคลุทฺโท ปุเร อาสึ, อรญฺเญ กานเน อหํ;

ปสทํ มิคเมสนฺโต, สยมฺภุํ อทฺทสํ อหํ [ชินํ (สี.)].

๑๖๒. ‘‘อนุรุทฺโธ นาม สมฺพุทฺโธ, สยมฺภู อปราชิโต;

วิเวกกาโม โส ธีโร, วนมชฺโฌคหี ตทา.

๑๖๓. ‘‘จตุทณฺเฑ คเหตฺวาน, จตุฏฺฐาเน ฐเปสหํ;

มณฺฑปํ สุกตํ กตฺวา, ปทฺมปุปฺเผหิ ฉาทยึ.

๑๖๔. ‘‘มณฺฑปํ ฉาทยิตฺวาน, สยมฺภุํ อภิวาทยึ;

ธนุํ ตตฺเถว นิกฺขิปฺป, ปพฺพชึ อนคาริยํ.

๑๖๕. ‘‘นจิรํ ปพฺพชิตสฺส [ปพฺพชิตสฺส อจิรํ (สี.)], พฺยาธิ เม อุทปชฺชถ;

ปุพฺพกมฺมํ สริตฺวาน, ตตฺถ กาลงฺกโต อหํ.

๑๖๖. ‘‘ปุพฺพกมฺเมน สํยุตฺโต, ตุสิตํ อคมาสหํ;

ตตฺถ โสณฺณมยํ พฺยมฺหํ, นิพฺพตฺตติ ยทิจฺฉกํ.

๑๖๗. ‘‘สหสฺสยุตฺตํ หยวาหึ, ทิพฺพยานมธิฏฺฐิโต;

อารุหิตฺวาน ตํ ยานํ, คจฺฉามหํ ยทิจฺฉกํ.

๑๖๘. ‘‘ตโต เม นิยฺยมานสฺส, เทวภูตสฺส เม สโต;

สมนฺตา โยชนสตํ, มณฺฑโป เม ธรียติ.

๑๖๙. ‘‘สยเนหํ ตุวฏฺฏามิ, อจฺฉนฺเน [อจฺจนฺตํ (สี.), อจฺจนฺต (ปี.)] ปุปฺผสนฺถเต;

อนฺตลิกฺขา จ ปทุมา, วสฺสนฺเต นิจฺจกาลิกํ.

๑๗๐. ‘‘มรีจิเก ผนฺทมาเน, ตปฺปมาเน จ อาตเป;

น มํ ตาเปติ อาตาโป, มณฺฑปสฺส อิทํ ผลํ.

๑๗๑. ‘‘ทุคฺคตึ สมติกฺกนฺโต, อปายา ปิหิตา มม;

มณฺฑเป รุกฺขมูเล วา, สนฺตาโป เม น วิชฺชติ.

๑๗๒. ‘‘มหีสญฺญํ อธิฏฺฐาย, โลณโตยํ ตรามหํ;

ตสฺส เม สุกตํ กมฺมํ, พุทฺธปูชายิทํ ผลํ.

๑๗๓. ‘‘อปถมฺปิ [อพฺภมฺหิ (สฺยา. ก.)] ปถํ กตฺวา, คจฺฉามิ อนิลญฺชเส;

อโห เม สุกตํ กมฺมํ, พุทฺธปูชายิทํ ผลํ.

๑๗๔. ‘‘ปุพฺเพนิวาสํ ชานามิ, ทิพฺพจกฺขุ วิโสธิตํ;

อาสวา เม ปริกฺขีณา, พุทฺธปูชายิทํ ผลํ.

๑๗๕. ‘‘ชหิตา ปุริมา ชาติ, พุทฺธสฺส โอรโส อหํ;

ทายาโทมฺหิ จ สทฺธมฺเม, พุทฺธปูชายิทํ ผลํ.

๑๗๖. ‘‘อาราธิโตมฺหิ สุคตํ, โคตมํ สกฺยปุงฺควํ;

ธมฺมธโช ธมฺมทายาโท [ธมฺมาทาโส (ก.)], พุทฺธปูชายิทํ ผลํ.

๑๗๗. ‘‘อุปฏฺฐิตฺวาน สมฺพุทฺธํ, โคตมํ สกฺยปุงฺควํ;

ปารงฺคมนิยํ มคฺคํ, อปุจฺฉึ โลกนายกํ.

๑๗๘. ‘‘อชฺฌิฏฺโฐ กถยี พุทฺโธ, คมฺภีรํ นิปุณํ ปทํ;

ตสฺสาหํ ธมฺมํ สุตฺวาน, ปตฺโตมฺหิ อาสวกฺขยํ.

๑๗๙. ‘‘อโห เม สุกตํ กมฺมํ, ปริมุตฺโตมฺหิ ชาติยา;

สพฺพาสวปริกฺขีโณ, นตฺถิ ทานิ ปุนพฺภโว.

๑๘๐. ‘‘กิเลสา ฌาปิตา มยฺหํ…เป… วิหรามิ อนาสโว.

๑๘๑. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๑๘๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา นนฺทโก เถโร อิมา คาถาโย อภาสิตฺถาติ.

นนฺทกตฺเถรสฺสาปทานํ ฉฏฺฐํ.