๙. สพฺพทายกตฺเถรอปทานํ

๔๕๖. ‘‘มหาสมุทฺทํ โอคยฺห, ภวนํ เม สุนิมฺมิตํ;

สุนิมฺมิตา โปกฺขรณี, จกฺกวากปกูชิตา.

๔๕๗. ‘‘มนฺทาลเกหิ สญฺฉนฺนา, ปทุมุปฺปลเกหิ จ;

นที จ สนฺทเต ตตฺถ, สุปติตฺถา มโนรมา.

๔๕๘. ‘‘มจฺฉกจฺฉปสญฺฉนฺนา, นานาทิชสโมตฺถตา;

มยูรโกญฺจาภิรุทา, โกกิลาทีหิ วคฺคุหิ.

๔๕๙. ‘‘ปาเรวตา รวิหํสา จ, จกฺกวากา นทีจรา;

ทินฺทิภา สาฬิกา เจตฺถ, ปมฺมกา [ปมฺปกา (สี.), จปฺปกา (สฺยา.)] ชีวชีวกา.

๔๖๐. ‘‘หํสา โกญฺจาปิ นทิตา [โกญฺจาภินทิตา (สี. สฺยา.)], โกสิยา ปิงฺคลา พหู;

สตฺตรตนสมฺปนฺนา, มณิมุตฺติกวาลุกา.

๔๖๑. ‘‘สพฺพโสณฺณมยา รุกฺขา, นานาคนฺธสเมริตา;

อุชฺโชเตนฺติ ทิวารตฺตึ, ภวนํ สพฺพกาลิกํ.

๔๖๒. ‘‘สฏฺฐิ ตูริยสหสฺสานิ, สายํ ปาโต ปวชฺชเร;

โสฬสิตฺถิสหสฺสานิ, ปริวาเรนฺติ มํ สทา.

๔๖๓. ‘‘อภินิกฺขมฺม ภวนา, สุเมธํ โลกนายกํ;

ปสนฺนจิตฺโต สุมโน, วนฺทยึ ตํ มหายสํ.

๔๖๔. ‘‘สมฺพุทฺธํ อภิวาเทตฺวา, สสงฺฆํ ตํ นิมนฺตยึ;

อธิวาเสสิ โส ธีโร, สุเมโธ โลกนายโก.

๔๖๕. ‘‘มม ธมฺมกถํ กตฺวา, อุยฺโยเชสิ มหามุนิ;

สมฺพุทฺธํ อภิวาเทตฺวา, ภวนํ เม อุปาคมึ.

๔๖๖. ‘‘อามนฺตยึ ปริชนํ, สพฺเพ สนฺนิปตาถ [สนฺนิปตตฺถ (ก.)] โว;

ปุพฺพณฺหสมยํ พุทฺโธ, ภวนํ อาคมิสฺสติ.

๔๖๗. ‘‘ลาภา อมฺหํ สุลทฺธํ โน, เย วสาม ตวนฺติเก;

มยมฺปิ พุทฺธเสฏฺฐสฺส, ปูชํ กสฺสาม สตฺถุโน.

๔๖๘. ‘‘อนฺนปนํ ปฏฺฐเปตฺวา, กาลํ อาโรจยึ อหํ;

วสีสตสหสฺเสหิ, อุเปสิ โลกนายโก.

๔๖๙. ‘‘ปญฺจงฺคิเกหิ ตูริเยหิ, ปจฺจุคฺคมนมกาสหํ;

สพฺพโสณฺณมเย ปีเฐ, นิสีทิ ปุริสุตฺตโม.

๔๗๐. ‘‘อุปริจฺฉทนํ อาสิ, สพฺพโสณฺณมยํ ตทา;

พีชนิโย ปวายนฺติ, ภิกฺขุสงฺฆสฺส อนฺตเร.

๔๗๑. ‘‘ปหูเตนนฺนปาเนน, ภิกฺขุสงฺฆมตปฺปยึ;

ปจฺเจกทุสฺสยุคเฬ, ภิกฺขุสงฺฆสฺสทาสหํ.

๔๗๒. ‘‘ยํ วทนฺติ สุเมโธติ, โลกาหุติปฏิคฺคหํ;

ภิกฺขุสงฺเฆ นิสีทิตฺวา, อิมา คาถา อภาสถ.

๔๗๓. ‘‘โย เม อนฺเนน ปาเนน, สพฺเพ อิเม จ ตปฺปยึ;

ตมหํ กิตฺตยิสฺสามิ, สุณาถ มม ภาสโต.

๔๗๔. ‘‘อฏฺฐารเส กปฺปสเต, เทวโลเก รมิสฺสติ;

สหสฺสกฺขตฺตุํ ราชา จ, จกฺกวตฺตี ภวิสฺสติ.

๔๗๕. ‘‘อุปฺปชฺชติ [อุปคจฺฉติ (สี.)] ยํ โยนึ, เทวตฺตํ อถ มานุสํ;

สพฺพทา สพฺพโสวณฺณํ, ฉทนํ ธารยิสฺสติ.

๔๗๖. ‘‘ตึสกปฺปสหสฺสมฺหิ, โอกฺกากกุสลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๔๗๗. ‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, นิพฺพายิสฺสตินาสโว.

๔๗๘. ‘‘‘ภิกฺขุสงฺเฆ นิสีทิตฺวา, สีหนาทํ นทิสฺสติ;

จิตเก ฉตฺตํ ธาเรนฺติ, เหฏฺฐา ฉตฺตมฺหิ ฑยฺหถ’.

๔๗๙. ‘‘สามญฺญํ เม อนุปฺปตฺตํ, กิเลสา ฌาปิตา มยา;

มณฺฑเป รุกฺขมูเล วา, สนฺตาโป เม น วิชฺชติ.

๔๘๐. ‘‘ตึสกปฺปสหสฺสมฺหิ, ยํ ทานมททึ ตทา;

ทุคฺคตึ นาภิชานามิ, สพฺพทานสฺสิทํ ผลํ.

๔๘๑. ‘‘กิเลสา ฌาปิตา มยฺหํ…เป… วิหรามิ อนาสโว.

๔๘๒. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๔๘๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สพฺพทายโก เถโร อิมา คาถาโย อภาสิตฺถาติ.

สพฺพทายกตฺเถรสฺสาปทานํ นวมํ.