๑๐. อชิตตฺเถรอปทานํ

๔๘๔. ‘‘ปทุมุตฺตโร นาม ชิโน, สพฺพธมฺมาน ปารคู;

อชฺโฌคาเหตฺวา หิมวนฺตํ, นิสีทิ โลกนายโก.

๔๘๕. ‘‘นาหํ อทฺทกฺขึ [ปสฺสามิ (?)] สมฺพุทฺธํ, นปิ สทฺทํ สุโณมหํ;

มม ภกฺขํ คเวสนฺโต, อาหิณฺฑามิ วเน อหํ [ตทา (สี.)].

๔๘๖. ‘‘ตตฺถทฺทสฺสาสึ สมฺพุทฺธํ, ทฺวตฺตึสวรลกฺขณํ;

ทิสฺวาน วิตฺติมาปชฺชึ [จิตฺตมาปชฺชิ (สี.), จิตฺตมาปชฺชึ (สฺยา.)], สตฺโต โก นามยํ ภเว.

๔๘๗. ‘‘ลกฺขณานิ วิโลเกตฺวา, มม วิชฺชํ อนุสฺสรึ;

สุตญฺหิ เมตํ วุฑฺฒานํ, ปณฺฑิตานํ สุภาสิตํ.

๔๘๘. ‘‘เตสํ ยถา ตํ วจนํ, อยํ พุทฺโธ ภวิสฺสติ;

ยํนูนาหํ สกฺกเรยฺยํ, คตึ เม โสธยิสฺสติ.

๔๘๙. ‘‘ขิปฺปํ อสฺสมมาคนฺตฺวา, มธุเตลํ คหึ อหํ;

โกลมฺพกํ คเหตฺวาน, อุปคจฺฉึ วินายกํ [นราสภํ (สี.)].

๔๙๐. ‘‘ติทณฺฑเก คเหตฺวาน, อพฺโภกาเส ฐเปสหํ;

ปทีปํ ปชฺชลิตฺวาน, อฏฺฐกฺขตฺตุํ อวนฺทหํ.

๔๙๑. ‘‘สตฺตรตฺตินฺทิวํ พุทฺโธ, นิสีทิ ปุริสุตฺตโม;

ตโต รตฺยา วิวสาเน, วุฏฺฐาสิ โลกนายโก.

๔๙๒. ‘‘ปสนฺนจิตฺโต สุมโน, สพฺพรตฺตินฺทิวํ อหํ;

ทีปํ พุทฺธสฺส ปาทาสึ, ปสนฺโน เสหิ ปาณิภิ.

๔๙๓. ‘‘สพฺเพ วนา คนฺธมยา, ปพฺพเต คนฺธมาทเน;

พุทฺธสฺส อานุภาเวน, อาคจฺฉุํ พุทฺธสนฺติกํ [อุปคจฺฉุํ ตทา ชินํ (สี.)].

๔๙๔. ‘‘เย เกจิ ปุปฺผคนฺธาเส, ปุปฺผิตา ธรณีรุหา;

พุทฺธสฺส อานุภาเวน, สพฺเพ สนฺนิปตุํ ตทา.

๔๙๕. ‘‘ยาวตา หิมวนฺตมฺหิ, นาคา จ ครุฬา อุโภ;

ธมฺมญฺจ โสตุกามา เต, อาคจฺฉุํ พุทฺธสนฺติกํ.

๔๙๖. ‘‘เทวโล นาม สมโณ, พุทฺธสฺส อคฺคสาวโก;

วสีสตสหสฺเสหิ, พุทฺธสนฺติกุปาคมิ.

๔๙๗. ‘‘ปทุมุตฺตโร โลกวิทู, อาหุตีนํ ปฏิคฺคโห;

ภิกฺขุสงฺเฆ นิสีทิตฺวา, อิมา คาถา อภาสถ.

๔๙๘. ‘‘‘โย เม ทีปํ ปทีเปสิ, ปสนฺโน เสหิ ปาณิภิ;

ตมหํ กิตฺตยิสฺสามิ, สุณาถ มม ภาสโต.

๔๙๙. ‘‘‘สฏฺฐิ กปฺปสหสฺสานิ, เทวโลเก รมิสฺสติ;

สหสฺสกฺขตฺตุํ ราชา จ, จกฺกวตฺตี ภวิสฺสติ.

โสฬสมํ ภาณวารํ.

๕๐๐. ‘‘‘ฉตฺติสกฺขตฺตุํ เทวินฺโท, เทวรชฺชํ กริสฺสติ;

ปถวิยํ สตฺตสตํ, วิปุลํ รชฺชํ กริสฺสติ.

๕๐๑. ‘‘‘ปเทสรชฺชํ วิปุลํ, คณนาโต อสงฺขิยํ;

อิมินา ทีปทาเนน, ทิพฺพจกฺขุ ภวิสฺสติ.

๕๐๒. ‘‘‘สมนฺตโต อฏฺฐโกสํ [อฑฺฒโกสํ (สี. สฺยา.)], ปสฺสิสฺสติ อยํ สทา;

เทวโลกา จวนฺตสฺส, นิพฺพตฺตนฺตสฺส ชนฺตุโน.

๕๐๓. ‘‘‘ทิวา วา ยทิ วา รตฺตึ, ปทีปํ ธารยิสฺสติ;

ชายมานสฺส สตฺตสฺส, ปุญฺญกมฺมสมงฺคิโน.

๕๐๔. ‘‘‘ยาวตา นครํ อาสิ, ตาวตา โชตยิสฺสติ;

อุปปชฺชติ ยํ โยนึ, เทวตฺตํ อถ มานุสํ.

๕๐๕. ‘‘‘อสฺเสว ทีปทานสฺส, [อฏฺฐทีปผเลน หิ; อุปฏฺฐิสฺสนฺติมํ ชนฺตุํ (สฺยา.), อฏฺฐ ทีปา ผเลน หิ; น ชหิสฺสนฺติ’มํ ชนฺตุํ (?)] อฏฺฐทีปผเลน หิ;

น ชยิสฺสนฺติมํ ชนฺตู [อฏฺฐทีปผเลน หิ; อุปฏฺฐิสฺสนฺติมํ ชนฺตุํ (สฺยา.), อฏฺฐ ทีปา ผเลน หิ; น ชหิสฺสนฺติ’มํ ชนฺตุํ (?)], ทีปทานสฺสิทํ ผลํ.

๕๐๖. ‘‘‘กปฺปสตสหสฺสมฺหิ, โอกฺกากกุลสมฺภโว;

โคตโม นาม โคตฺเตน, สตฺถา โลเก ภวิสฺสติ.

๕๐๗. ‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;

สพฺพาสเว ปริญฺญาย, นิพฺพายิสฺสตินาสโว.

๕๐๘. ‘‘‘โตสยิตฺวาน สมฺพุทฺธํ, โคตมํ สกฺยปุงฺควํ;

อชิโต นาม นาเมน, เหสฺสติ สตฺถุ สาวโก’.

๕๐๙. ‘‘สฏฺฐิ กปฺปสหสฺสานิ, เทวโลเก รมึ อหํ;

ตตฺราปิ เม ทีปสตํ, โชตเต นิจฺจกาลิกํ [สพฺพกาลิกํ (สี.)].

๕๑๐. ‘‘เทวโลเก มนุสฺเส วา, นิทฺธาวนฺติ ปภา มม;

พุทฺธเสฏฺฐํ สริตฺวาน, ภิยฺโย หาสํ ชเนสหํ.

๕๑๑. ‘‘ตุสิตาหํ จวิตฺวาน, โอกฺกมึ มาตุกุจฺฉิยํ;

ชายมานสฺส สนฺตสฺส, อาโลโก วิปุโล อหุ.

๕๑๒. ‘‘อคารา อภินิกฺขมฺม, ปพฺพชึ อนคาริยํ;

พาวรึ อุปสงฺกมฺม, สิสฺสตฺตํ อชฺฌุปาคมึ.

๕๑๓. ‘‘หิมวนฺเต วสนฺโตหํ, อสฺโสสึ โลกนายกํ;

อุตฺตมตฺถํ คเวสนฺโต, อุปคจฺฉึ วินายกํ.

๕๑๔. ‘‘ทนฺโต พุทฺโธ ทเมตาวี, โอฆติณฺโณ นิรูปธิ;

นิพฺพานํ กถยี พุทฺโธ, สพฺพทุกฺขปฺปโมจนํ.

๕๑๕. ‘‘ตํ เม อาคมนํ สิทฺธํ, โตสิโตหํ มหามุนึ;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๕๑๖. ‘‘สตสหสฺสิโต กปฺเป, ยํ ทีปมททึ ตทา;

ทุคฺคตึ นาภิชานามิ, ทีปทานสฺสิทํ ผลํ.

๕๑๗. ‘‘กิเลสา ฌาปิตา มยฺหํ…เป… วิหรามิ อนาสโว.

๕๑๘. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๕๑๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อชิโต เถโร อิมา คาถาโย อภาสิตฺถาติ.

อชิตตฺเถรสฺสาปทานํ ทสมํ.

ปิลินฺทวจฺฉวคฺโค จตฺตาลีสโม.

ตสฺสุทฺทานํ –

ปิลินฺทวจฺโฉ เสโล จ, สพฺพกิตฺตี มธุํทโท;

กูฏาคารี พากุโล จ, คิริ สฬลสวฺหโย.

สพฺพโท อชิโต เจว, คาถาโย คณิตา อิห;

สตานิ ปญฺจ คาถานํ, วีสติ จ ตทุตฺตรีติ.

อถ วคฺคุทฺทานํ –

ปทุมารกฺขโท เจว, อุมา คนฺโธทเกน จ;

เอกปทฺม สทฺทสญฺญี, มนฺทารํ โพธิวนฺทโก.

อวฏญฺจ ปิลินฺทิ [เอวเมว ทิสฺสติ] จ, คาถาโย คณิตา อิห;

จตุสตฺตติ คาถาโย, เอกาทส สตานิ จ.

ปทุมวคฺคทสกํ.