๘. อายาคทายกตฺเถรอปทานํ

๙๔. ‘‘นิพฺพุเต โลกนาถมฺหิ, สิขิมฺหิ วทตํ วเร;

หฏฺโฐ หฏฺเฐน จิตฺเตน, อวนฺทึ ถูปมุตฺตมํ.

๙๕. ‘‘วฑฺฒกีหิ กถาเปตฺวา, มูลํ ทตฺวานหํ ตทา;

หฏฺโฐ หฏฺเฐน จิตฺเตน, อายาคํ การเปสหํ.

๙๖. ‘‘อฏฺฐ กปฺปานิ เทเวสุ, อพฺโพกิณฺณํ [อพฺโพจฺฉินฺนํ (สี.)] วสึ อหํ;

อวเสเสสุ กปฺเปสุ, โวกิณฺณํ สํสรึ อหํ.

๙๗. ‘‘กาเย วิสํ น กมติ, สตฺถานิ น จ หนฺติ เม;

อุทเกหํ น มิยฺยามิ, อายาคสฺส อิทํ ผลํ.

๙๘. ‘‘ยทิจฺฉามิ อหํ วสฺสํ, มหาเมโฆ ปวสฺสติ;

เทวาปิ เม วสํ เอนฺติ, ปุญฺญกมฺมสฺสิทํ ผลํ.

๙๙. ‘‘สตฺตรตนสมฺปนฺโน, ติสกฺขตฺตุํ อโหสหํ;

น มํ เกจาวชานนฺติ, ปุญฺญกมฺมสฺสิทํ ผลํ.

๑๐๐. ‘‘เอกตฺตึเส อิโต กปฺเป, อายาคํ ยมการยึ;

ทุคฺคตึ นาภิชานามิ, อายาคสฺส อิทํ ผลํ.

๑๐๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อายาคทายโก เถโร อิมา คาถาโย อภาสิตฺถาติ.

อายาคทายกตฺเถรสฺสาปทานํ อฏฺฐมํ.