๙. โสณโกฏิวีสตฺเถรอปทานํ

๔๙. ‘‘วิปสฺสิโน ปาวจเน, เอกํ เลณํ มยา กตํ;

จาตุทฺทิสสฺส สงฺฆสฺส, พนฺธุมาราชธานิยา.

๕๐. ‘‘ทุสฺเสหิ ภูมึ เลณสฺส, สนฺถริตฺวา ปริจฺจชึ;

อุทคฺคจิตฺโต สุมโน, อกาสึ ปณิธึ ตทา.

๕๑. ‘‘อาราธเยยฺยํ สมฺพุทฺธํ, ปพฺพชฺชญฺจ ลเภยฺยหํ;

อนุตฺตรญฺจ นิพฺพานํ, ผุเสยฺยํ สนฺติมุตฺตมํ.

๕๒. ‘‘เตเนว สุกฺกมูเลน, กปฺเป [กปฺปํ (สี.), กปฺป (ก.)] นวุติ สํสรึ;

เทวภูโต มนุสฺโส จ, กตปุญฺโญ วิโรจหํ.

๕๓. ‘‘ตโต กมฺมาวเสเสน, อิธ ปจฺฉิมเก ภเว;

จมฺปายํ อคฺคเสฏฺฐิสฺส, ชาโตมฺหิ เอกปุตฺตโก.

๕๔. ‘‘ชาตมตฺตสฺส เม สุตฺวา, ปิตุ ฉนฺโท อยํ อหุ;

ททามหํ กุมารสฺส, วีสโกฏี อนูนกา.

๕๕. ‘‘จตุรงฺคุลา จ เม โลมา, ชาตา ปาทตเล อุโภ;

สุขุมา มุทุสมฺผสฺสา, ตูลาปิจุสมา สุภา.

๕๖. ‘‘อตีตา นวุติ กปฺปา, อยํ เอโก จ อุตฺตริ;

นาภิชานามิ นิกฺขิตฺเต, ปาเท ภูมฺยา อสนฺถเต.

๕๗. ‘‘อาราธิโต เม สมฺพุทฺโธ, ปพฺพชึ อนคาริยํ;

อรหตฺตญฺจ เม ปตฺตํ, สีติภูโตมฺหิ นิพฺพุโต.

๕๘. ‘‘อคฺโค อารทฺธวีริยานํ, นิทฺทิฏฺโฐ สพฺพทสฺสินา;

ขีณาสโวมฺหิ อรหา, ฉฬภิญฺโญ มหิทฺธิโก.

๕๙. ‘‘เอกนวุติโต กปฺเป, ยํ ทานมททึ ตทา;

ทุคฺคตึ นาภิชานามิ, เลณทานสฺสิทํ ผลํ.

๖๐. ‘‘กิเลสา ฌาปิตา มยฺหํ…เป… วิหรามิ อนาสโว.

๖๑. ‘‘สฺวาคตํ วต เม อาสิ…เป… กตํ พุทฺธสฺส สาสนํ.

๖๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

๖๓. ‘‘เถโร โกฏิวีโส [โกฏิวิโส (สฺยา. ก.), โกฬิวิโส (อญฺญฏฺฐาเนสุ)] โสโณ, ภิกฺขุสงฺฆสฺส อคฺคโต;

ปญฺหํ ปุฏฺโฐ วิยากาสิ, อโนตตฺเต มหาสเร’’ติ.

อิตฺถํ สุทํ อายสฺมา โสโณ โกฏิวีโส เถโร อิมา คาถาโย อภาสิตฺถาติ.

โสณโกฏิวีสตฺเถรสฺสาปทานํ นวมํ.