๑. มนฺทารวปุปฺผิยตฺเถรอปทานํ

๑. ‘‘ตาวตึสา อิธาคนฺตฺวา, มงฺคโล นาม มาณโว;

มนฺทารวํ คเหตฺวาน, วิปสฺสิสฺส มเหสิโน.

๒. ‘‘สมาธินา นิสินฺนสฺส, มตฺถเก ธารยึ อหํ;

สตฺตาหํ ธารยิตฺวาน, เทวโลกํ ปุนาคมึ.

๓. ‘‘เอกนวุติโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๔. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา มนฺทารวปุปฺผิโย เถโร อิมา คาถาโย อภาสิตฺถาติ.

มนฺทารวปุปฺผิยตฺเถรสฺสาปทานํ ปฐมํ.