๑๐. ปิณฺฑปาติกตฺเถรอปทานํ

๓๗. ‘‘ติสฺโส นามาสิ สมฺพุทฺโธ, วิหาสิ วิปิเน ตทา;

ตุสิตา หิ อิธาคนฺตฺวา, ปิณฺฑปาตํ อทาสหํ.

๓๘. ‘‘สมฺพุทฺธมภิวาเทตฺวา, ติสฺสํ นาม มหายสํ;

สกํ จิตฺตํ ปสาเทตฺวา, ตุสิตํ อคมาสหํ.

๓๙. ‘‘เทฺวนวุเต อิโต กปฺเป, ยํ ทานมททึ ตทา;

ทุคฺคตึ นาภิชานามิ, ปิณฺฑปาตสฺสิทํ ผลํ.

๔๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปิณฺฑปาติโก เถโร อิมา คาถาโย อภาสิตฺถาติ.

ปิณฺฑปาติกตฺเถรสฺสาปทานํ ทสมํ.

สทฺทสญฺญกวคฺโค ฉตฺตึสติโม.