๓๖. สทฺทสญฺญกวคฺโค

๑. สทฺทสญฺญกตฺเถรอปทานํ

๑. ‘‘มิคลุทฺโท ปุเร อาสึ, อรญฺเญ กานเน อหํ;

ตตฺถทฺทสาสึ สมฺพุทฺธํ, เทวสงฺฆปุรกฺขตํ.

๒. ‘‘จตุสจฺจํ ปกาเสนฺตํ, อุทฺธรนฺตํ มหาชนํ;

อสฺโสสึ มธุรํ วาจํ, กรวีกรุโทปมํ [รุโตปมํ (?)].

๓. ‘‘พฺรหฺมสรสฺส มุนิโน, สิขิโน โลกพนฺธุโน;

โฆเส จิตฺตํ ปสาเทตฺวา, ปตฺโตมฺหิ อาสวกฺขยํ.

๔. ‘‘เอกตฺตึเส อิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ปสาทสฺส อิทํ ผลํ.

๕. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติ.

สทฺทสญฺญกตฺเถรสฺสาปทานํ ปฐมํ.

๒. ยวกลาปิยตฺเถรอปทานํ

๖. ‘‘นคเร อรุณวติยา, อาสึ ยวสิโก ตทา;

ปนฺเถ ทิสฺวาน สมฺพุทฺธํ, ยวกลาปํ สนฺถรึ [ยวกลาปมวตฺถรึ (สี.)].

๗. ‘‘อนุกมฺปโก การุณิโก, สิขี โลกคฺคนายโก;

มม สงฺกปฺปมญฺญาย, นิสีทิ ยวสนฺถเร.

๘. ‘‘ทิสฺวา นิสินฺนํ วิมลํ, มหาฌายึ วินายกํ;

ปาโมชฺชํ ชนยิตฺวาน, ตตฺถ กาลงฺกโต อหํ.

๙. ‘‘เอกตฺตึเส อิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ยวตฺถเร อิทํ ผลํ.

๑๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ยวกลาปิโย เถโร อิมา คาถาโย อภาสิตฺถาติ.

ยวกลาปิยตฺเถรสฺสาปทานํ ทุติยํ.

๓. กึสุกปูชกตฺเถรอปทานํ

๑๑. ‘‘กึสุกํ ปุปฺผิตํ ทิสฺวา, ปคฺคเหตฺวาน อญฺชลึ;

พุทฺธํ สริตฺวา สิทฺธตฺถํ, อากาเส อภิปูชยึ.

๑๒. ‘‘จตุนฺนวุติโต กปฺเป, ยํ ปุปฺผมภิปูชยึ;

ทุคฺคตึ นาภิชานามิ, พุทฺธปูชายิทํ ผลํ.

๑๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา กึสุกปูชโก เถโร อิมา คาถาโย อภาสิตฺถาติ.

กึสุกปูชกตฺเถรสฺสาปทานํ ตติยํ.

๔. สโกสกโกรณฺฑทายกตฺเถรอปทานํ

๑๔. ‘‘อกฺกนฺตญฺจ ปทํ ทิสฺวา, สิขิโน โลกพนฺธุโน;

เอกํสํ อชินํ กตฺวา, ปทเสฏฺฐํ อวนฺทหํ.

๑๕. ‘‘โกรณฺฑํ ปุปฺผิตํ ทิสฺวา, ปาทปํ ธรณีรุหํ;

สโกสกํ [สโกฏกํ (สี. สฺยา.)] คเหตฺวาน, ปทจกฺกํ อปูชยึ.

๑๖. ‘‘เอกตฺตึเส อิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ปทปูชายิทํ ผลํ.

๑๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สโกสก [สโกฏก (สี. สฺยา.)] โกรณฺฑทายโก เถโร อิมา คาถาโย อภาสิตฺถาติ.

สโกสกโกรณฺฑทายกตฺเถรสฺสาปทานํ จตุตฺถํ.

๕. ทณฺฑทายกตฺเถรอปทานํ

๑๘. ‘‘กานนํ วนโมคยฺห, เวฬุํ เฉตฺวานหํ ตทา;

อาลมฺพนํ กริตฺวาน, สงฺฆสฺส อททํ อหํ.

๑๙. ‘‘เตน จิตฺตปฺปสาเทน, สุพฺพเต อภิวาทิย;

อาลมฺพนมฺปิ ทตฺวาน, ปกฺกามึ อุตฺตรามุโข.

๒๐. ‘‘จตุนฺนวุติโต กปฺเป, ยํ ทณฺฑมททึ ตทา;

ทุคฺคตึ นาภิชานามิ, ทณฺฑทานสฺสิทํ ผลํ.

๒๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ทณฺฑทายโก เถโร อิมา คาถาโย อภาสิตฺถาติ.

ทณฺฑทายกตฺเถรสฺสาปทานํ ปญฺจมํ.

๖. อมฺพยาคุทายกตฺเถรอปทานํ

๒๒. ‘‘สตรํสี นาม สมฺพุทฺโธ, สยมฺภู อปราชิโต;

วุฏฺฐหิตฺวา สมาธิมฺหา, ภิกฺขาย มมุปาคมิ.

๒๓. ‘‘ปจฺเจกพุทฺธํ ทิสฺวาน, อมฺพยาคุํ อทาสหํ;

วิปฺปสนฺนมนํ ตสฺส, วิปฺปสนฺเนน เจตสา.

๒๔. ‘‘จตุนฺนวุติโต กปฺเป, ยํ กมฺมมกรึ ตทา;

ทุคฺคตึ นาภิชานามิ, อมฺพยาคุยิทํ ผลํ.

๒๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อมฺพยาคุทายโก เถโร อิมา คาถาโย อภาสิตฺถาติ.

อมฺพยาคุทายกตฺเถรสฺสาปทานํ ฉฏฺฐํ.

๗. สุปุฏกปูชกตฺเถรอปทานํ

๒๖. ‘‘ทิวาวิหารา นิกฺขนฺโต, วิปสฺสี โลกนายโก;

ภิกฺขาย วิจรนฺโต โส, มม สนฺติกุปาคมิ.

๒๗. ‘‘ตโต ปตีโต สุมโน, พุทฺธเสฏฺฐสฺส ตาทิโน;

โลณสุปุฏกํ ทตฺวา, กปฺปํ สคฺคมฺหิ โมทหํ.

๒๘. ‘‘เอกนวุติโต กปฺเป, ยํ ปุฏกมทาสหํ;

ทุคฺคตึ นาภิชานามิ, ปุฏกสฺส อิทํ ผลํ.

๒๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สุปุฏกปูชโก เถโร อิมา คาถาโย อภาสิตฺถาติ.

สุปุฏกปูชกตฺเถรสฺสาปทานํ สตฺตมํ.

๘. มญฺจทายกตฺเถรอปทานํ

๓๐. ‘‘วิปสฺสิโน ภควโต, โลกเชฏฺฐสฺส ตาทิโน;

เอกํ มญฺจํ มยา ทินฺนํ, ปสนฺเนน สปาณินา.

๓๑. ‘‘หตฺถิยานํ อสฺสยานํ, ทิพฺพยานํ สมชฺฌคํ;

เตน มญฺจกทาเนน, ปตฺโตมฺหิ อาสวกฺขยํ.

๓๒. ‘‘เอกนวุติโต กปฺเป, ยํ มญฺจมททึ ตทา;

ทุคฺคตึ นาภิชานามิ, มญฺจทานสฺสิทํ ผลํ.

๓๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา มญฺจทายโก เถโร อิมา คาถาโย อภาสิตฺถาติ.

มญฺจทายกตฺเถรสฺสาปทานํ อฏฺฐมํ.

๙. สรณคมนิยตฺเถรอปทานํ

๓๔. ‘‘อารุหิมฺห ตทา นาวํ, ภิกฺขุ จาชีวโก จหํ;

นาวาย ภิชฺชมานาย, ภิกฺขุ เม สรณํ อทา.

๓๕. ‘‘เอกตฺตึเส อิโต กปฺเป, ยญฺจ เม สรณํ อทา;

ทุคฺคตึ นาภิชานามิ, สรณาคมเน ผลํ.

๓๖. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สรณคมนิโย เถโร อิมา คาถาโย อภาสิตฺถาติ.

สรณคมนิยตฺเถรสฺสาปทานํ นวมํ.

๑๐. ปิณฺฑปาติกตฺเถรอปทานํ

๓๗. ‘‘ติสฺโส นามาสิ สมฺพุทฺโธ, วิหาสิ วิปิเน ตทา;

ตุสิตา หิ อิธาคนฺตฺวา, ปิณฺฑปาตํ อทาสหํ.

๓๘. ‘‘สมฺพุทฺธมภิวาเทตฺวา, ติสฺสํ นาม มหายสํ;

สกํ จิตฺตํ ปสาเทตฺวา, ตุสิตํ อคมาสหํ.

๓๙. ‘‘เทฺวนวุเต อิโต กปฺเป, ยํ ทานมททึ ตทา;

ทุคฺคตึ นาภิชานามิ, ปิณฺฑปาตสฺสิทํ ผลํ.

๔๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปิณฺฑปาติโก เถโร อิมา คาถาโย อภาสิตฺถาติ.

ปิณฺฑปาติกตฺเถรสฺสาปทานํ ทสมํ.

สทฺทสญฺญกวคฺโค ฉตฺตึสติโม.