๘. อุตฺตเรยฺยทายกตฺเถรอปทานํ

๙๐. ‘‘นคเร หํสวติยา, อโหสึ พฺราหฺมโณ ตทา;

อชฺฌายโก มนฺตธโร, ติณฺณํ เวทาน ปารคู.

๙๑. ‘‘ปุรกฺขโต สสิสฺเสหิ, ชาติมา จ สุสิกฺขิโต;

โตยาภิเสจนตฺถาย, นครา นิกฺขมึ ตทา.

๙๒. ‘‘ปทุมุตฺตโร นาม ชิโน, สพฺพธมฺมาน ปารคู;

ขีณาสวสหสฺเสหิ, ปาวิสี นครํ ชิโน.

๙๓. ‘‘สุจารุรูปํ ทิสฺวาน, อาเนญฺชการิตํ วิย;

ปริวุตํ อรหนฺเตหิ, ทิสฺวา จิตฺตํ ปสาทยึ.

๙๔. ‘‘สิรสฺมึ อญฺชลึ กตฺวา, นมสฺสิตฺวาน สุพฺพตํ;

ปสนฺนจิตฺโต สุมโน, อุตฺตรียมทาสหํ.

๙๕. ‘‘อุโภ หตฺเถหิ ปคฺคยฺห, สาฏกํ อุกฺขิปึ อหํ;

ยาวตา พุทฺธปริสา, ตาว ฉาเทสิ สาฏโก.

๙๖. ‘‘ปิณฺฑจารํ จรนฺตสฺส, มหาภิกฺขุคณาทิโน;

ฉทํ กโรนฺโต อฏฺฐาสิ, หาสยนฺโต มมํ ตทา.

๙๗. ‘‘ฆรโต นิกฺขมนฺตสฺส, สยมฺภู อคฺคปุคฺคโล;

วีถิยํว ฐิโต สตฺถา, อกา เม [อกาสิ (สฺยา.)] อนุโมทนํ.

๙๘. ‘‘ปสนฺนจิตฺโต สุมโน, โย เม อทาสิ สาฏกํ;

ตมหํ กิตฺตยิสฺสามิ, สุโณถ มม ภาสโต.

๙๙. ‘‘‘ตึสกปฺปสหสฺสานิ, เทวโลเก รมิสฺสติ;

ปญฺญาสกฺขตฺตุํ เทวินฺโท, เทวรชฺชํ กริสฺสติ.

๑๐๐. ‘‘‘เทวโลเก วสนฺตสฺส, ปุญฺญกมฺมสมงฺคิโน;

สมนฺตา โยชนสตํ, ทุสฺสจฺฉนฺนํ ภวิสฺสติ.

๑๐๑. ‘‘‘ฉตฺตึสกฺขตฺตุํ ราชา จ, จกฺกวตฺตี ภวิสฺสติ;

ปเทสรชฺชํ วิปุลํ, คณนาโต อสงฺขิยํ.

๑๐๒. ‘‘‘ภเว สํสรมานสฺส, ปุญฺญกมฺมสมงฺคิโน;

มนสา ปตฺถิตํ สพฺพํ, นิพฺพตฺติสฺสติ ตาวเท.

๑๐๓. ‘‘‘โกเสยฺยกมฺพลิยานิ [โกเสยฺยกมฺพลียานิ (สี.)], โขมกปฺปาสิกานิ จ;

มหคฺฆานิ จ ทุสฺสานิ, ปฏิลจฺฉติยํ นโร.

๑๐๔. ‘‘‘มนสา ปตฺถิตํ สพฺพํ, ปฏิลจฺฉติยํ นโร;

เอกทุสฺสสฺส วิปากํ, อนุโภสฺสติ สพฺพทา.

๑๐๕. ‘‘‘โส ปจฺฉา ปพฺพชิตฺวาน, สุกฺกมูเลน โจทิโต;

โคตมสฺส ภควโต, ธมฺมํ สจฺฉิกริสฺสติ’.

๑๐๖. ‘‘อโห เม สุกตํ กมฺมํ, สพฺพญฺญุสฺส มเหสิโน;

เอกาหํ สาฏกํ ทตฺวา, ปตฺโตมฺหิ อมตํ ปทํ.

๑๐๗. ‘‘มณฺฑเป รุกฺขมูเล วา, วสโต สุญฺญเก ฆเร;

ธาเรติ ทุสฺสฉทนํ, สมนฺตา พฺยามโต มม.

๑๐๘. ‘‘อวิญฺญตฺตํ นิวาเสมิ [อวิญฺญตฺตานิ เสวามิ (?)], จีวรํ ปจฺจยญฺจหํ;

ลาภี [ลาภิมฺหิ (สฺยา.)] อนฺนสฺส ปานสฺส, อุตฺตเรยฺยสฺสิทํ ผลํ.

๑๐๙. ‘‘สตสหสฺสิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, วตฺถทานสฺสิทํ ผลํ.

๑๑๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อุตฺตเรยฺยทายโก เถโร อิมา คาถาโย อภาสิตฺถาติ.

อุตฺตเรยฺยทายกตฺเถรสฺสาปทานํ อฏฺฐมํ.