๖. ปภงฺกรตฺเถรอปทานํ

๕๓. ‘‘ปทุมุตฺตรภควโต, โลกเชฏฺฐสฺส ตาทิโน;

วิปิเน เจติยํ อาสิ, วาฬมิคสมากุเล.

๕๔. ‘‘น โกจิ วิสหิ คนฺตุํ, เจติยํ อภิวนฺทิตุํ;

ติณกฏฺฐลโตนทฺธํ, ปลุคฺคํ อาสิ เจติยํ.

๕๕. ‘‘วนกมฺมิโก ตทา อาสึ, ปิตุมาตุมเตนหํ [ปิตุเปตามเหนหํ (สี.), ปิตาเปตามเหนหํ (สฺยา.)];

อทฺทสํ วิปิเน ถูปํ, ลุคฺคํ ติณลตากุลํ.

๕๖. ‘‘ทิสฺวานาหํ พุทฺธถูปํ, ครุจิตฺตํ อุปฏฺฐหึ;

พุทฺธเสฏฺฐสฺส ถูโปยํ, ปลุคฺโค อจฺฉตี วเน.

๕๗. ‘‘นจฺฉนฺนํ นปฺปติรูปํ, ชานนฺตสฺส คุณาคุณํ;

พุทฺธถูปํ อโสเธตฺวา, อญฺญํ กมฺมํ ปโยชเย.

๕๘. ‘‘ติณกฏฺฐญฺจ วลฺลิญฺจ, โสธยิตฺวาน เจติเย;

วนฺทิตฺวา อฏฺฐ วารานิ [อฏฺฐ ฐานานิ (ก.)], ปฏิกุฏิโก อคจฺฉหํ.

๕๙. ‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวตึสมคจฺฉหํ.

๖๐. ‘‘ตตฺถ เม สุกตํ พฺยมฺหํ, โสวณฺณํ สปภสฺสรํ;

สฏฺฐิโยชนมุพฺพิทฺธํ, ตึสโยชนวิตฺถตํ.

๖๑. ‘‘ติสตานิ จ วารานิ, เทวรชฺชมการยึ;

ปญฺจวีสติกฺขตฺตุญฺจ, จกฺกวตฺตี อโหสหํ.

๖๒. ‘‘ภวาภเว สํสรนฺโต, มหาโภคํ ลภามหํ;

โภเค เม อูนตา นตฺถิ, โสธนาย อิทํ ผลํ.

๖๓. ‘‘สิวิกา หตฺถิขนฺเธน, วิปิเน คจฺฉโต มม;

ยํ ยํ ทิสาหํ คจฺฉามิ, สรณํ สมฺปเต [สิชฺฌเต (ก.)] วนํ.

๖๔. ‘‘ขาณุํ วา กณฺฏกํ วาปิ, นาหํ ปสฺสามิ จกฺขุนา;

ปุญฺญกมฺเมน สํยุตฺโต, สยเมวาปนียเร.

๖๕. ‘‘กุฏฺฐํ คณฺโฑ กิลาโส จ, อปมาโร วิตจฺฉิกา;

ททฺทุ กจฺฉุ [กณฺฑุ (สฺยา.)] จ เม นตฺถิ, โสธนาย อิทํ ผลํ.

๖๖. ‘‘อญฺญมฺปิ เม อจฺฉริยํ, พุทฺธถูปสฺส โสธเน [พุทฺธถูปมฺหิ โสธิเต (สฺยา.)];

นาภิชานามิ เม กาเย, ชาตํ ปิฬกพินฺทุกํ.

๖๗. ‘‘อญฺญมฺปิ เม อจฺฉริยํ, พุทฺธถูปมฺหิ โสธิเต [สพฺพตฺถปิ เอวเมว ทิสฺสติ, ตถา อุปริปิ];

ทุเว ภเว สํสรามิ, เทวตฺเต อถ มานุเส.

๖๘. ‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

สุวณฺณวณฺโณ สพฺพตฺถ, สปฺปภาโส ภวามหํ.

๖๙. ‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

อมนาปํ วิวชฺชติ, มนาปํ อุปติฏฺฐติ.

๗๐. ‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

วิสุทฺธํ โหติ เม จิตฺตํ, เอกคฺคํ สุสมาหิตํ.

๗๑. ‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

เอกาสเน นิสีทิตฺวา, อรหตฺตมปาปุณึ.

๗๒. ‘‘สตสหสฺสิโต กปฺเป, ยํ กมฺมมกรึ ตทา;

ทุคฺคตึ นาภิชานามิ, โสธนาย อิทํ ผลํ.

๗๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปภงฺกโร เถโร อิมา คาถาโย อภาสิตฺถาติ.

ปภงฺกรตฺเถรสฺสาปทานํ ฉฏฺฐํ.