๘. สุมนาเวฬิยตฺเถรอปทานํ

๖๔. ‘‘เวสฺสภุสฺส ภควโต, โลกเชฏฺฐสฺส ตาทิโน;

สพฺเพ ชนา สมาคมฺม, มหาปูชํ กโรนฺติ เต.

๖๕. ‘‘สุธาย ปิณฺฑํ กตฺวาน, อาเวฬํ สุมนายหํ;

สีหาสนสฺส ปุรโต, อภิโรเปสหํ ตทา.

๖๖. ‘‘สพฺเพ ชนา สมาคมฺม, เปกฺขนฺติ ปุปฺผมุตฺตมํ;

เกนิทํ ปูชิตํ ปุปฺผํ, พุทฺธเสฏฺฐสฺส ตาทิโน.

๖๗. ‘‘เตน จิตฺตปฺปสาเทน, นิมฺมานํ อุปปชฺชหํ;

อนุโภมิ [อนุโภสึ (สี.)] สกํ กมฺมํ, ปุพฺเพ สุกตมตฺตโน.

๖๘. ‘‘ยํ ยํ โยนุปปชฺชามิ, เทวตฺตํ อถ มานุสํ;

สพฺเพสานํ ปิโย โหมิ, ปุปฺผปูชายิทํ ผลํ.

๖๙. ‘‘นาภิชานามิ กาเยน, วาจาย อุท เจตสา;

สํยตานํ ตปสฺสีนํ, กตํ อกฺโกสิตํ มยา.

๗๐. ‘‘เตน สุจริเตนาหํ, จิตฺตสฺส ปณิธีหิ จ;

สพฺเพสํ ปูชิโต โหมิ, อนกฺโกสสฺสิทํ ผลํ.

๗๑. ‘‘อิโต เอกาทเส กปฺเป, สหสฺสาโรสิ ขตฺติโย;

สตฺตรตนสมฺปนฺโน, จกฺกวตฺตี มหพฺพโล.

๗๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สุมนาเวฬิโย เถโร อิมา คาถาโย อภาสิตฺถาติ.

สุมนาเวฬิยตฺเถรสฺสาปทานํ อฏฺฐมํ.