๓. คตสญฺญกตฺเถรอปทานํ

๑๐. ‘‘อากาเสว ปทํ นตฺถิ, อมฺพเร อนิลญฺชเส;

สิทฺธตฺถํ ชินมทฺทกฺขึ, คจฺฉนฺตํ ติทิวงฺคเณ [ติทิวงฺคณํ (สฺยา. ก.)].

๑๑. ‘‘อนิเลเนริตํ ทิสฺวา, สมฺมาสมฺพุทฺธจีวรํ;

วิตฺติ มมาหุ ตาวเท [วิตฺติ เม ปาหุณา ตาว (สฺยา.), วิตฺติ เม ตาวเท ชาตา (สี.)], ทิสฺวาน คมนํ มุนึ [มุเน (สี.)].

๑๒. ‘‘จตุนฺนวุติโต กปฺเป, ยํ สญฺญมลภึ ตทา;

ทุคฺคตึ นาภิชานามิ, พุทฺธสญฺญายิทํ ผลํ.

๑๓. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา คตสญฺญโก เถโร อิมา คาถาโย อภาสิตฺถาติ.

คตสญฺญกตฺเถรสฺสาปทานํ ตติยํ.