๘. อนุเลปทายกตฺเถรอปทานํ

๓๙. ‘‘อตฺถทสฺสิสฺส มุนิโน, อทฺทสํ สาวกํ อหํ;

นวกมฺมํ กโรนฺตสฺส, สีมาย อุปคจฺฉหํ.

๔๐. ‘‘นิฏฺฐิเต นวกมฺเม จ, อนุเลปมทาสหํ;

ปสนฺนจิตฺโต สุมโน, ปุญฺญกฺเขตฺเต อนุตฺตเร.

๔๑. ‘‘อฏฺฐารเส กปฺปสเต, ยํ กมฺมมกรึ ตทา;

ทุคฺคตึ นาภิชานามิ, อนุเลปสฺสิทํ ผลํ.

๔๒. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา อนุเลปทายโก เถโร อิมา คาถาโย อภาสิตฺถาติ.

อนุเลปทายกตฺเถรสฺสาปทานํ อฏฺฐมํ.