๔. ปญฺจสีลสมาทานิยตฺเถรอปทานํ

๑๓๔. ‘‘นคเร จนฺทวติยา, ภตโก อาสหํ ตทา;

ปรกมฺมายเน ยุตฺโต, ปพฺพชฺชํ น ลภามหํ.

๑๓๕. ‘‘มหนฺธการปิหิตา, ติวิธคฺคีหิ ฑยฺหเร;

เกน นุ โข อุปาเยน, วิสํยุตฺโต ภเว อหํ.

๑๓๖. ‘‘เทยฺยธมฺโม จ เม นตฺถิ, วราโก ภตโก อหํ;

ยํนูนาหํ ปญฺจสีลํ, รกฺเขยฺยํ ปริปูรยํ.

๑๓๗. ‘‘อโนมทสฺสิสฺส มุนิโน, นิสโภ นาม สาวโก;

ตมหํ อุปสงฺกมฺม, ปญฺจสิกฺขาปทคฺคหึ.

๑๓๘. ‘‘วสฺสสตสหสฺสานิ, อายุ วิชฺชติ ตาวเท;

ตาวตา ปญฺจสีลานิ, ปริปุณฺณานิ โคปยึ.

๑๓๙. ‘‘มจฺจุกาเล จ สมฺปตฺเต, เทวา อสฺสาสยนฺติ มํ;

‘รโถ สหสฺสยุตฺโต เต, มาริสายํ [มาริสสฺส (ก.)] อุปฏฺฐิโต’.

๑๔๐. ‘‘วตฺตนฺเต จริเม จิตฺเต, มม สีลํ อนุสฺสรึ;

เตน กมฺเมน สุกเตน, ตาวตึสํ อคจฺฉหํ.

๑๔๑. ‘‘ตึสกฺขตฺตุญฺจ เทวินฺโท, เทวรชฺชมการยึ;

ทิพฺพสุขํ [ทิพฺพํ สุขํ (สี.)] อนุภวึ, อจฺฉราหิ ปุรกฺขโต.

๑๔๒. ‘‘ปญฺจสตฺตติกฺขตฺตุญฺจ, จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํ.

๑๔๓. ‘‘เทวโลกา จวิตฺวาน, สุกฺกมูเลน โจทิโต;

ปุเร เวสาลิยํ ชาโต, มหาสาเล สุอฑฺฒเก.

๑๔๔. ‘‘วสฺสูปนายิเก กาเล, ทิปฺปนฺเต [ทิพฺพนฺติ (ก.)] ชินสาสเน;

มาตา จ เม ปิตา เจว, ปญฺจสิกฺขาปทคฺคหุํ.

๑๔๕. ‘‘สห สุตฺวานหํ สีลํ, มม สีลํ อนุสฺสรึ;

เอกาสเน นิสีทิตฺวา, อรหตฺตมปาปุณึ.

๑๔๖. ‘‘ชาติยา ปญฺจวสฺเสน, อรหตฺตมปาปุณึ;

อุปสมฺปาทยิ พุทฺโธ, คุณมญฺญาย จกฺขุมา.

๑๔๗. ‘‘ปริปุณฺณานิ โคเปตฺวา, ปญฺจสิกฺขาปทานหํ;

อปริเมยฺเย อิโต กปฺเป, วินิปาตํ น คจฺฉหํ.

๑๔๘. ‘‘สฺวาหํ ยสมนุภวึ, เตสํ สีลาน วาหสา;

กปฺปโกฏิมฺปิ กิตฺเตนฺโต, กิตฺตเย เอกเทสกํ.

๑๔๙. ‘‘ปญฺจสีลานิ โคเปตฺวา, ตโย เหตู ลภามหํ;

ทีฆายุโก มหาโภโค, ติกฺขปญฺโญ ภวามหํ.

๑๕๐. ‘‘สํกิตฺเตนฺโต จ [ปกิตฺเตนฺโตว (สี.), ปกิตฺเตนฺเต จ (สฺยา.)] สพฺเพสํ, อภิมตฺตญฺจ โปริสํ;

ภวาภเว สํสริตฺวา, เอเต ฐาเน ลภามหํ.

๑๕๑. ‘‘อปริเมยฺยสีเลสุ, วตฺตนฺตา ชินสาวกา;

ภเวสุ ยทิ รชฺเชยฺยุํ, วิปาโก กีทิโส ภเว.

๑๕๒. ‘‘สุจิณฺณํ เม ปญฺจสีลํ, ภตเกน ตปสฺสินา [วิปสฺสินา (สี.)];

เตน สีเลนหํ อชฺช, โมจยึ สพฺพพนฺธนา.

๑๕๓. ‘‘อปริเมยฺเย อิโต กปฺเป, ปญฺจสีลานิ โคปยึ;

ทุคฺคตึ นาภิชานามิ, ปญฺจสีลานิทํ ผลํ.

๑๕๔. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ปญฺจสีลสมาทานิโย เถโร อิมา คาถาโย อภาสิตฺถาติ.

ปญฺจสีลสมาทานิยตฺเถรสฺสาปทานํ จตุตฺถํ.