๓. ติสรณคมนิยตฺเถรอปทานํ

๑๐๖. ‘‘นคเร จนฺทวติยา [พนฺธุมติยา (อฏฺฐ.)], มาตุอุปฏฺฐาโก [มาตุปฏฺฐายโก (สี.), มาตุปฏฺฐานโก (สฺยา.)] อหุํ;

อนฺธา มาตา ปิตา มยฺหํ, เต โปเสมิ อหํ ตทา.

๑๐๗. ‘‘รโหคโต นิสีทิตฺวา, เอวํ จินฺเตสหํ ตทา;

โปเสนฺโต มาตาปิตโร, ปพฺพชฺชํ น ลภามหํ.

๑๐๘. ‘‘มหนฺธการปิหิตา [ตมนฺธการปิหิตา (สฺยา.)], ติวิธคฺคีหิ ฑยฺหเร;

เอตาทิเส ภเว [ภเย (สี.)] ชาเต, นตฺถิ โกจิ วินายโก.

๑๐๙. ‘‘พุทฺโธ โลเก สมุปฺปนฺโน, ทิปฺปติ [ทิพฺพติ (ก.)] [ชินสาสนํ (สี.)] ทานิ สาสนํ;

สกฺกา อุทฺธริตุํ อตฺตา, ปุญฺญกาเมน ชนฺตุนา.

๑๑๐. ‘‘อุคฺคยฺห ตีณิ สรเณ, ปริปุณฺณานิ โคปยึ;

เตน กมฺเมน สุกเตน, ปฏิโมกฺขามิ ทุคฺคตึ.

๑๑๑. ‘‘นิสโภ นาม สมโณ, พุทฺธสฺส อคฺคสาวโก;

ตมหํ อุปคนฺตฺวาน, สรณคมนํ คหึ.

๑๑๒. ‘‘วสฺสสตสหสฺสานิ, อายุ วิชฺชติ ตาวเท;

ตาวตา สรณคมนํ, ปริปุณฺณํ อโคปยึ.

๑๑๓. ‘‘จริเม วตฺตมานมฺหิ, สรณํ ตํ อนุสฺสรึ;

เตน กมฺเมน สุกเตน, ตาวตึสํ อคจฺฉหํ.

๑๑๔. ‘‘เทวโลกคโต สนฺโต, ปุญฺญกมฺมสมาหิโต;

ยํ เทสํ [ยํ ยํ เทสํ (สฺยา.)] อุปปชฺชามิ [อุปคจฺฉามิ (สี.)], อฏฺฐ เหตู ลภามหํ.

๑๑๕. ‘‘ทิสาสุ ปูชิโต โหมิ, ติกฺขปญฺโญ ภวามหํ;

สพฺเพ เทวานุวตฺตนฺติ, อมิตโภคํ ลภามหํ.

๑๑๖. ‘‘สุวณฺณวณฺโณ สพฺพตฺถ, ปฏิกนฺโต ภวามหํ;

มิตฺตานํ อจโล โหมิ, ยโส อพฺภุคฺคโต มมํ.

๑๑๗. ‘‘อสีติกฺขตฺตุ เทวินฺโท, เทวรชฺชมการยึ;

ทิพฺพสุขํ อนุภวึ, อจฺฉราหิ ปุรกฺขโต.

๑๑๘. ‘‘ปญฺจสตฺตติกฺขตฺตุญฺจ, จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํ.

๑๑๙. ‘‘ปจฺฉิเม ภเว สมฺปตฺเต, ปุญฺญกมฺมสมาหิโต;

ปุเร สาวตฺถิยํ ชาโต, มหาสาเล สุอฑฺฒเก.

๑๒๐. ‘‘นครา นิกฺขมิตฺวาน, ทารเกหิ ปุรกฺขโต;

หสขิฑฺฑสมงฺคีหํ [สาหํ ขิฑฺฑสมงฺคี (สฺยา.)], สงฺฆารามํ อุปาคมึ.

๑๒๑. ‘‘ตตฺถทฺทสาสึ [ตตฺถทฺทสาหํ (ก.)] สมณํ, วิปฺปมุตฺตํ นิรูปธึ;

โส เม ธมฺมมเทเสสิ, สรณญฺจ อทาสิ เม.

๑๒๒. ‘‘โสหํ สุตฺวาน สรณํ, สรณํ เม อนุสฺสรึ;

เอกาสเน นิสีทิตฺวา, อรหตฺตมปาปุณึ.

๑๒๓. ‘‘ชาติยา สตฺตเม วสฺเส, อรหตฺตมปาปุณึ;

อุปสมฺปาทยิ พุทฺโธ, คุณมญฺญาย จกฺขุมา.

๑๒๔. ‘‘อปริเมยฺเย อิโต กปฺเป, สรณานิ อคจฺฉหํ;

ตโต เม สุกตํ กมฺมํ, ผลํ ทสฺเสสิ เม อิธ.

๑๒๕. ‘‘สุโคปิตํ เม สรณํ, มานสํ สุปฺปณีหิตํ;

อนุโภตฺวา ยสํ สพฺพํ, ปตฺโตมฺหิ อจลํ ปทํ.

๑๒๖. ‘‘เยสํ โสตาวธานตฺถิ, สุโณถ มม ภาสโต;

อหํ [อตฺถํ (สฺยา.)] โว กถยิสฺสามิ, สามํ ทิฏฺฐํ ปทํ มม.

๑๒๗. ‘‘‘พุทฺโธ โลเก สมุปฺปนฺโน, วตฺตเต ชินสาสนํ;

อมตา วาทิตา เภรี, โสกสลฺลวิโนทนา.

๑๒๘. ‘‘‘ยถาสเกน ถาเมน, ปุญฺญกฺเขตฺเต อนุตฺตเร;

อธิการํ กเรยฺยาถ, ปสฺสยิสฺสถ นิพฺพุตึ.

๑๒๙. ‘‘‘ปคฺคยฺห ตีณิ สรเณ, ปญฺจสีลานิ โคปิย;

พุทฺเธ จิตฺตํ ปสาเทตฺวา, ทุกฺขสฺสนฺตํ กริสฺสถ.

๑๓๐. ‘‘‘สมฺมา ธมฺมํ ภาเวตฺวาน [มโมปมํ กริตฺวาน (สี. สฺยา.)], สีลานิ ปริโคปิย;

อจิรํ อรหตฺตํ โว, สพฺเพปิ ปาปุณิสฺสถ.

๑๓๑. ‘‘‘เตวิชฺโช อิทฺธิปตฺโตมฺหิ, เจโตปริยโกวิโท;

สาวโก เต มหาวีร, สรโณ [จรเณ (สี. สฺยา.)] วนฺทติ สตฺถุโน’.

๑๓๒. ‘‘อปริเมยฺเย อิโต กปฺเป, สรณํ พุทฺธสฺส คจฺฉหํ;

ทุคฺคตึ นาภิชานามิ, สรณํ คมเน ผลํ.

๑๓๓. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา ติสรณคมนิโย เถโร อิมา คาถาโย อภาสิตฺถาติ.

ติสรณคมนิยตฺเถรสฺสาปทานํ ตติยํ.