๔. เอกสญฺญกตฺเถรอปทานํ

๑๗. ‘‘ทุมคฺเค ปํสุกูลิกํ [ปํสุกูลกํ (?)], ลคฺคํ ทิสฺวาน สตฺถุโน;

อญฺชลึ ปคฺคเหตฺวาน, ปํสุกูลํ อวนฺทหํ.

๑๘. ‘‘เอกตฺตึเส อิโต กปฺเป, ยํ สญฺญมลภึ ตทา;

ทุคฺคตึ นาภิชานามิ, พุทฺธปูชายิทํ ผลํ.

๑๙. ‘‘ปญฺจวีเส อิโต กปฺเป, เอโก อาสึ ชนาธิโป;

อมิตาโภติ นาเมน, จกฺกวตฺตี มหพฺพโล.

๒๐. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา เอกสญฺญโก เถโร อิมา คาถาโย อภาสิตฺถาติ.

เอกสญฺญกตฺเถรสฺสาปทานํ จตุตฺถํ.