๙. โสปากตฺเถรอปทานํ

๑๑๒. ‘‘ปพฺภารํ โสธยนฺตสฺส [เสวยนฺตสฺส (สี. ก.)], วิปิเน ปพฺพตุตฺตเม;

สิทฺธตฺโถ นาม ภควา, อาคจฺฉิ มม สนฺติกํ.

๑๑๓. ‘‘พุทฺธํ อุปคตํ ทิสฺวา, โลกเชฏฺฐสฺส ตาทิโน;

สนฺถรํ สนฺถริตฺวาน [ปญฺญเปตฺวาน (สฺยา. อฏฺฐ)], ปุปฺผาสนมทาสหํ.

๑๑๔. ‘‘ปุปฺผาสเน นิสีทิตฺวา, สิทฺธตฺโถ โลกนายโก;

มมญฺจ คติมญฺญาย, อนิจฺจตมุทาหริ.

๑๑๕. ‘‘‘อนิจฺจา วต สงฺขารา, อุปฺปาทวยธมฺมิโน;

อุปฺปชฺชิตฺวา นิรุชฺฌนฺติ, เตสํ วูปสโม สุโข’.

๑๑๖. ‘‘อิทํ วตฺวาน สพฺพญฺญู, โลกเชฏฺโฐ นราสโภ;

นภํ อพฺภุคฺคมิ วีโร, หํสราชาว อมฺพเร.

๑๑๗. ‘‘สกํ ทิฏฺฐึ ชหิตฺวาน, ภาวยานิจฺจสญฺญหํ;

เอกาหํ ภาวยิตฺวาน, ตตฺถ กาลํ กโต อหํ.

๑๑๘. ‘‘เทฺว สมฺปตฺตี อนุโภตฺวา, สุกฺกมูเลน โจทิโต;

ปจฺฉิเม ภเว สมฺปตฺเต, สปากโยนุปาคมึ.

๑๑๙. ‘‘อคารา อภินิกฺขมฺม, ปพฺพชึ อนคาริยํ;

ชาติยา สตฺตวสฺโสหํ, อรหตฺตมปาปุณึ.

๑๒๐. ‘‘อารทฺธวีริโย ปหิตตฺโต, สีเลสุ สุสมาหิโต;

โตเสตฺวาน มหานาคํ, อลตฺถํ อุปสมฺปทํ.

๑๒๑. ‘‘จตุนฺนวุติโต กปฺเป, ยํ กมฺมมกรึ ตทา;

ทุคฺคตึ นาภิชานามิ, ปุปฺผทานสฺสิทํ ผลํ.

๑๒๒. ‘‘จตุนฺนวุติโต กปฺเป, ยํ สญฺญํ ภาวยึ ตทา;

ตํ สญฺญํ ภาวยนฺตสฺส, ปตฺโต เม อาสวกฺขโย.

๑๒๓. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา โสปาโก เถโร อิมา คาถาโย อภาสิตฺถาติ.

โสปากตฺเถรสฺสาปทานํ นวมํ.