๑๐. สุมงฺคลตฺเถรอปทานํ

๑๒๔. ‘‘อาหุตึ ยิฏฺฐุกาโมหํ, ปฏิยาเทตฺวาน โภชนํ;

พฺราหฺมเณ ปฏิมาเนนฺโต, วิสาเล มาฬเก ฐิโต.

๑๒๕. ‘‘อถทฺทสาสึ สมฺพุทฺธํ, ปิยทสฺสึ มหายสํ;

สพฺพโลกวิเนตารํ, สยมฺภุํ อคฺคปุคฺคลํ.

๑๒๖. ‘‘ภควนฺตํ ชุติมนฺตํ, สาวเกหิ ปุรกฺขตํ;

อาทิจฺจมิว โรจนฺตํ, รถิยํ ปฏิปนฺนกํ.

๑๒๗. ‘‘อญฺชลึ ปคฺคเหตฺวาน, สกํ จิตฺตํ ปสาทยึ;

มนสาว นิมนฺเตสึ, ‘อาคจฺฉตุ มหามุนิ’.

๑๒๘. ‘‘มม สงฺกปฺปมญฺญาย, สตฺถา โลเก อนุตฺตโร;

ขีณาสวสหสฺเสหิ, มม ทฺวารํ อุปาคมิ.

๑๒๙. ‘‘นโม เต ปุริสาชญฺญ, นโม เต ปุริสุตฺตม;

ปาสาทํ อภิรูหิตฺวา, สีหาสเน นิสีทตํ [นิสีท ตฺวํ (สี.)].

๑๓๐. ‘‘ทนฺโต ทนฺตปริวาโร, ติณฺโณ ตารยตํ วโร;

ปาสาทํ อภิรูหิตฺวา, นิสีทิ ปวราสเน.

๑๓๑. ‘‘ยํ เม อตฺถิ สเก เคเห, อามิสํ ปจฺจุปฏฺฐิตํ;

ตาหํ พุทฺธสฺส ปาทาสึ, ปสนฺโน เสหิ ปาณิภิ.

๑๓๒. ‘‘ปสนฺนจิตฺโต สุมโน, เวทชาโต กตญฺชลี;

พุทฺธเสฏฺฐํ นมสฺสามิ, อโห พุทฺธสฺสุฬารตา.

๑๓๓. ‘‘อฏฺฐนฺนํ ปยิรูปาสตํ, ภุญฺชํ ขีณาสวา พหู;

ตุเยฺหเวโส อานุภาโว, สรณํ ตํ อุเปมหํ.

๑๓๔. ‘‘ปิยทสฺสี จ ภควา, โลกเชฏฺโฐ นราสโภ;

ภิกฺขุสงฺเฆ นิสีทิตฺวา, อิมา คาถา อภาสถ.

๑๓๕. ‘‘‘โย โส สงฺฆํ อโภเชสิ, อุชุภูตํ สมาหิตํ;

ตถาคตญฺจ สมฺพุทฺธํ, สุณาถ มม ภาสโต.

๑๓๖. ‘‘‘สตฺตวีสติกฺขตฺตุํ โส, เทวรชฺชํ กริสฺสติ;

สกกมฺมาภิรทฺโธ โส, เทวโลเก รมิสฺสติ.

๑๓๗. ‘‘‘ทส อฏฺฐ จกฺขตฺตุํ [ทสญฺจฏฺฐกฺขตฺถุํ (สี.), ทส จฏฺฐกฺขตฺตุํ (สฺยา.)] โส, จกฺกวตฺตี ภวิสฺสติ;

ปถพฺยา รชฺชํ ปญฺจสตํ, วสุธํ อาวสิสฺสติ’.

๑๓๘. ‘‘อรญฺญวนโมคฺคยฺห, กานนํ พฺยคฺฆเสวิตํ;

ปธานํ ปทหิตฺวาน, กิเลสา ฌาปิตา มยา.

๑๓๙. ‘‘อฏฺฐารเส กปฺปสเต, ยํ ทานมททึ ตทา;

ทุคฺคตึ นาภิชานามิ, ภตฺตทานสฺสิทํ ผลํ.

๑๔๐. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา สุมงฺคโล เถโร อิมา คาถาโย อภาสิตฺถาติ.

สุมงฺคลตฺเถรสฺสาปทานํ ทสมํ.

ตสฺสุทฺทานํ –

สีหาสนี เอกถมฺภี, นนฺโท จ จูฬปนฺถโก;

ปิลินฺทราหุโล เจว, วงฺคนฺโต รฏฺฐปาลโก.

โสปาโก มงฺคโล เจว, ทเสว ทุติเย วคฺเค;

สตญฺจ อฏฺฐตึส จ, คาถา เจตฺถ ปกาสิตา.

สีหาสนิยวคฺโค ทุติโย.