๑. อาลมฺพณทายกตฺเถรอปทานํ

๑. ‘‘อตฺถทสฺสิสฺส ภควโต, โลกเชฏฺฐสฺส ตาทิโน;

อาลมฺพณํ มยา ทินฺนํ, ทฺวิปทินฺทสฺส ตาทิโน.

๒. ‘‘ธรณึ ปฏิปชฺชามิ, วิปุลํ สาครปฺปรํ;

ปาเณสุ จ อิสฺสริยํ, วตฺเตมิ วสุธาย จ.

๓. ‘‘กิเลสา ฌาปิตา มยฺหํ, ภวา สพฺเพ สมูหตา;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๔. ‘‘อิโต เทฺวสฏฺฐิกปฺปมฺหิ, ตโย อาสึสุ ขตฺติยา;

เอกาปสฺสิตนามา เต, จกฺกวตฺตี มหพฺพลา.

๕. ‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’.

อิตฺถํ สุทํ อายสฺมา อาลมฺพณทายโก เถโร อิมา คาถาโย อภาสิตฺถาติ.

อาลมฺพณทายกตฺเถรสฺสาปทานํ ปฐมํ.