๙. สมาทปกตฺเถรอปทานํ

๔๔. ‘‘นคเร พนฺธุมติยา, มหาปูคคโณ อหุ;

เตสาหํ ปวโร อาสึ, มม พทฺธจรา [ปฏฺฐจรา (สฺยา.)] จ เต.

๔๕. ‘‘สพฺเพ เต สนฺนิปาเตตฺวา, ปุญฺญกมฺเม สมาทยึ;

มาฬํ กสฺสาม สงฺฆสฺส, ปุญฺญกฺเขตฺตํ อนุตฺตรํ.

๔๖. ‘‘สาธูติ เต ปฏิสฺสุตฺวา, มม ฉนฺทวสานุคา;

นิฏฺฐาเปตฺวา จ ตํ มาฬํ, วิปสฺสิสฺส อทมฺหเส.

๔๗. ‘‘เอกนวุติโต กปฺเป, ยํ มาฬมททึ ตทา;

ทุคฺคตึ นาภิชานามิ, มาฬทานสฺสิทํ ผลํ.

๔๘. ‘‘เอกูนสตฺตติกปฺเป [เอกูนสฏฺฐิกปฺปมฺหิ (สี. สฺยา.)],

เอโก อาสิ ชนาธิโป.

อาเทยฺโย นาม นาเมน, จกฺกวตฺตี มหพฺพโล.

๔๙. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา สมาทปโก เถโร อิมา คาถาโย อภาสิตฺถาติ.

สมาทปกตฺเถรสฺสาปทานํ นวมํ.