๑๐. กุมุททายกตฺเถรอปทานํ

๕๑. ‘‘หิมวนฺตสฺสาวิทูเร, มหาชาตสฺสโร อหุ;

ปทุมุปฺปลสญฺฉนฺโน, ปุณฺฑรีกสโมตฺถโฏ.

๕๒. ‘‘กุกุตฺโถ นาม นาเมน, ตตฺถาสึ สกุโณ ตทา;

สีลวา พุทฺธิสมฺปนฺโน, ปุญฺญาปุญฺเญสุ โกวิโท.

๕๓. ‘‘ปทุมุตฺตโร โลกวิทู, อาหุตีนํ ปฏิคฺคโห;

ชาตสฺสรสฺสาวิทูเร, สญฺจริตฺถ มหามุนิ.

๕๔. ‘‘ชลชํ กุมุทํ เฉตฺวา, อุปเนสึ มเหสิโน;

มม สงฺกปฺปมญฺญาย, ปฏิคฺคหิ มหามุนิ.

๕๕. ‘‘ตญฺจ ทานํ ททิตฺวาน, สุกฺกมูเลน โจทิโต;

กปฺปานํ สตสหสฺสํ, ทุคฺคตึ นุปปชฺชหํ.

๕๖. ‘‘โสฬเสโต กปฺปสเต, อาสุํ วรุณนามกา;

อฏฺฐ เอเต ชนาธิปา, จกฺกวตฺตี มหพฺพลา.

๕๗. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา กุมุททายโก เถโร อิมา คาถาโย อภาสิตฺถาติ.

กุมุททายกตฺเถรสฺสาปทานํ ทสมํ.

พนฺธุชีวกวคฺโค โสฬสโม.