๙. ปจฺจุปฏฺฐานสญฺญกตฺเถรอปทานํ

๗๒. ‘‘อตฺถทสฺสิมฺหิ สุคเต, นิพฺพุเต สมนนฺตรา;

ยกฺขโยนึ อุปปชฺชึ, ยสํ ปตฺโต จหํ ตทา.

๗๓. ‘‘ทุลฺลทฺธํ วต เม อาสิ, ทุปฺปภาตํ ทุรุฏฺฐิตํ;

ยํ เม โภเค วิชฺชมาเน, ปรินิพฺพายิ จกฺขุมา.

๗๔. ‘‘มม สงฺกปฺปมญฺญาย, สาคโร นาม สาวโก;

มมุทฺธริตุกาโม โส, อาคจฺฉิ มม สนฺติกํ.

๗๕. ‘‘กึ นุ โสจสิ มา ภายิ, จร ธมฺมํ สุเมธส;

อนุปฺปทินฺนา พุทฺเธน, สพฺเพสํ พีชสมฺปทา.

๗๖. ‘‘โส เจ ปูเชยฺย สมฺพุทฺธํ, ติฏฺฐนฺตํ โลกนายกํ;

ธาตุํ สาสปมตฺตมฺปิ, นิพฺพุตสฺสาปิ ปูชเย.

๗๗. ‘‘สเม จิตฺตปฺปสาทมฺหิ, สมํ ปุญฺญํ มหคฺคตํ;

ตสฺมา ถูปํ กริตฺวาน, ปูเชหิ ชินธาตุโย.

๗๘. ‘‘สาครสฺส วโจ สุตฺวา, พุทฺธถูปํ อกาสหํ;

ปญฺจวสฺเส ปริจรึ, มุนิโน ถูปมุตฺตมํ.

๗๙. ‘‘เตน กมฺเมน ทฺวิปทินฺท, โลกเชฏฺฐ นราสภ;

สมฺปตฺตึ อนุโภตฺวาน, อรหตฺตมปาปุณึ.

๘๐. ‘‘ภูริปญฺญา จ จตฺตาโร, สตฺตกปฺปสเต อิโต;

สตฺตรตนสมฺปนฺนา, จกฺกวตฺตี มหพฺพลา.

๘๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา ปจฺจุปฏฺฐานสญฺญโก เถโร อิมา คาถาโย อภาสิตฺถาติ.

ปจฺจุปฏฺฐานสญฺญกตฺเถรสฺสาปทานํ นวมํ.