๘. มคฺคสญฺญกตฺเถรอปทานํ

๖๖. ‘‘ปทุมุตฺตรพุทฺธสฺส, สาวกา วนจาริโน;

วิปฺปนฏฺฐา พฺรหารญฺเญ, อนฺธาว อนุสุยฺยเร [อนุสุยเร (สี.)].

๖๗. ‘‘อนุสฺสริตฺวา สมฺพุทฺธํ, ปทุมุตฺตรนายกํ;

ตสฺส เต มุนิโน ปุตฺตา, วิปฺปนฏฺฐา มหาวเน.

๖๘. ‘‘ภวนา โอรุหิตฺวาน, อคมึ ภิกฺขุสนฺติกํ;

เตสํ มคฺคญฺจ อาจิกฺขึ, โภชนญฺจ อทาสหํ.

๖๙. ‘‘เตน กมฺเมน ทฺวิปทินฺท, โลกเชฏฺฐ นราสภ;

ชาติยา สตฺตวสฺโสหํ, อรหตฺตมปาปุณึ.

๗๐. ‘‘สจกฺขู นาม นาเมน, ทฺวาทส จกฺกวตฺติโน;

สตฺตรตนสมฺปนฺนา, ปญฺจกปฺปสเต อิโต.

๗๑. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ อายสฺมา มคฺคสญฺญโก เถโร อิมา คาถาโย อภาสิตฺถาติ.

มคฺคสญฺญกตฺเถรสฺสาปทานํ อฏฺฐมํ.