๘. นิโรธวคฺโค

๑-๑๐. อสุภสุตฺตาทิวณฺณนา

๒๔๘-๒๕๗. อสุภสญฺญาติ อสุเภ ปฐมชฺฌานสญฺญา. มรณสญฺญาติ ‘‘อวสฺสํ มริตพฺพํ, มรณปฏิพทฺธํ เม ชีวิต’’นฺติ อภิณฺหํ ปจฺจเวกฺขนฺตสฺส อุปฺปนฺนสญฺญา. อาหาเร ปฏิกูลสญฺญาติ โอทนกุมฺมาสาทิมฺหิ อชฺโฌหรณีเย ปฏิกูลสญฺญา. สพฺพโลเก อนภิรติสญฺญาติ สกลโลกสฺมึ อนภิรตึ อุปฺปาเทนฺตสฺส อุปฺปนฺนสญฺญา. ปหานสญฺญาวิราคสญฺญาติ เทฺว ปุพฺพภาคา. นิโรธสญฺญา มิสฺสกา. เอวเมตานิ อฏฺฐิกสญฺญาทีนิ วีสติ กมฺมฏฺฐานานิ นิทฺทิฏฺฐานิ. เตสํ นวสุ อปฺปนา โหนฺติ, เอกาทส อุปจารชฺฌานิกา. เสสา ปเนตฺถ วินิจฺฉยกถา วิสุทฺธิมคฺเค (วิสุทฺธิ. ๑.๒๙๔) อาคตาว. คงฺคาเปยฺยาลาทโย มคฺคสํยุตฺเต วุตฺตนเยเนว เวทิตพฺพา.

โพชฺฌงฺคสํยุตฺตวณฺณนา นิฏฺฐิตา.