๑. วตปทสุตฺตวณฺณนา

๒๕๗. ทุติยวคฺคสฺส ปฐเม วตปทานีติ วตโกฏฺฐาสานิ. สมตฺตานีติ ปริปุณฺณานิ. สมาทินฺนานีติ คหิตานิ. กุเล เชฏฺฐาปจายีติ กุลเชฏฺฐกานํ มหาปิตา มหามาตา จูฬปิตา จูฬมาตา มาตุโล มาตุลานีติอาทีนํ อปจิติการโก. สณฺหวาโจติ ปิยมุทุมธุรวาโจ. มุตฺตจาโคติ วิสฺสฏฺฐจาโค. ปยตปาณีติ เทยฺยธมฺมทานตฺถาย สทา โธตหตฺโถ. โวสฺสคฺครโตติ โวสฺสชฺชเน รโต. ยาจโยโคติ ปเรหิ ยาจิตพฺพารโห, ยาจโยโคติ วา ยาจโยเคเนว ยุตฺโต. ทานสํวิภาครโตติ ทาเน จ สํวิภาเค จ รโต. ปฐมํ.