๑. ปณฺณตฺตินิทฺเทสวารวณฺณนา

๑๐-๑๗. นิทฺเทสวาเร ปน เหฏฺฐา ขนฺธยมกสฺส ปณฺณตฺติวารนิทฺเทเส วุตฺตนเยเนว อตฺโถ เวทิตพฺโพ. อญฺญตฺร วิเสสา. ตตฺรายํ วิเสโส – ทิพฺพจกฺขูติ ทุติยวิชฺชาญาณํ. ปญฺญาจกฺขูติ ตติยวิชฺชาญาณํ. ทิพฺพโสตนฺติ ทุติยอภิญฺญาญาณํ. ตณฺหาโสตนฺติ ตณฺหาว. อวเสโส กาโยติ นามกาโย, รูปกาโย, หตฺถิกาโย, อสฺสกาโยติ เอวมาทิ. อวเสสํ รูปนฺติ รูปายตนโต เสสํ ภูตุปาทายรูปญฺเจว ปิยรูปสาตรูปญฺจ. สีลคนฺโธติอาทีนิ วายนฏฺเฐน สีลาทีนํเยว นามานิ. อตฺถรโสติอาทีนิปิ สาธุมธุรฏฺเฐน อตฺถาทีนญฺเญว นามานิ. อวเสโส ธมฺโมติ ปริยตฺติธมฺมาทิอเนกปฺปเภโทติ อยเมตฺถ วิเสโส.

ปณฺณตฺตินิทฺเทสวารวณฺณนา.