๑๑. อปฺปมาทสุตฺตวณฺณนา

๕๓. เอกาทสเม สมธิคฺคยฺหาติ สุฏฺฐุ คณฺหิตฺวา. ชงฺคลานํ ปาณานนฺติ ปถวีตลจารีนํ สปาทกปาณานํ. ปทชาตานีติ ปทานิ. สโมธานํ คจฺฉนฺตีติ โอธานํ อุปนิกฺเขปํ คจฺฉนฺติ. อคฺคมกฺขายตีติ เสฏฺฐํ อกฺขายติ. ปพฺพชลายโกติ ปพฺพชติณจฺเฉทโก. โอธุนาตีติ เหฏฺฐา มุขํ ธุนาติ. นิธุนาตีติ อุโภหิ ปสฺเสหิ ธุนาติ. นิจฺฉาเทตีติ พาหาย วา ปหรติ, รุกฺเข วา ปหรติ. อมฺพปิณฺฑิยาติ อมฺพผลปิณฺฑิยา. วณฺฏูปนิพนฺธนานีติ วณฺเฏ อุปนิพนฺธนานิ, วณฺเฏ วา ปติฏฺฐิตานิ. ตทนฺวยานิ ภวนฺตีติ วณฺฏานุวตฺตกานิ ภวนฺติ, อมฺพปิณฺฑิทณฺฑกานุวตฺตกานิ ภวนฺตีติปิ อตฺโถ. ขุทฺทราชาโนติ ขุทฺทกราชาโน, ปกติราชาโน วา.