๖. อุปฺปชฺชนวาโร

๓๓๐. (ก) ยสฺส กามราคานุสโย อุปฺปชฺชติ ตสฺส ปฏิฆานุสโย อุปฺปชฺชตีติ? อามนฺตา.

(ข) ยสฺส วา ปน ปฏิฆานุสโย อุปฺปชฺชติ ตสฺส กามราคานุสโย อุปฺปชฺชตีติ? อามนฺตา.

(ก) ยสฺส กามราคานุสโย อุปฺปชฺชติ ตสฺส มานานุสโย อุปฺปชฺชตีติ? อามนฺตา.

(ข) ยสฺส วา ปน มานานุสโย อุปฺปชฺชติ ตสฺส กามราคานุสโย อุปฺปชฺชตีติ?

อนาคามิสฺส มานานุสโย อุปฺปชฺชติ, โน จ ตสฺส กามราคานุสโย อุปฺปชฺชติ. ติณฺณํ ปุคฺคลานํ มานานุสโย จ อุปฺปชฺชติ กามราคานุสโย จ อุปฺปชฺชติ (วิตฺถาเรตพฺพํ).

๓๓๑. (ก) ยสฺส กามราคานุสโย นุปฺปชฺชติ ตสฺส ปฏิฆานุสโย นุปฺปชฺชตีติ? อามนฺตา.

(ข) ยสฺส วา ปน ปฏิฆานุสโย นุปฺปชฺชติ ตสฺส กามราคานุสโย นุปฺปชฺชตีติ? อามนฺตา.

(ก) ยสฺส กามราคานุสโย นุปฺปชฺชติ ตสฺส มานานุสโย นุปฺปชฺชตีติ?

อนาคามิสฺส กามราคานุสโย นุปฺปชฺชติ, โน จ ตสฺส มานานุสโย นุปฺปชฺชติ. อรหโต กามราคานุสโย จ นุปฺปชฺชติ มานานุสโย จ นุปฺปชฺชติ.

(ข) ยสฺส วา ปน มานานุสโย นุปฺปชฺชติ ตสฺส กามราคานุสโย นุปฺปชฺชตีติ? อามนฺตา. (วิตฺถาเรตพฺพํ).

อุปฺปชฺชนวาโร.