๑. ปทโสธนวาโร

(ก) อนุโลมํ

๑๐. (ก) ทุกฺขํ ทุกฺขสจฺจนฺติ? อามนฺตา.

(ข) ทุกฺขสจฺจํ ทุกฺขนฺติ?

กายิกํ ทุกฺขํ เจตสิกํ ทุกฺขํ ฐเปตฺวา อวเสสํ ทุกฺขสจฺจํ [อวเสสํ ทุกฺขสจฺจํ ทุกฺขสจฺจํ (สฺยา.) เอวมุปริปิ], น ทุกฺขํ. กายิกํ ทุกฺขํ เจตสิกํ ทุกฺขํ ทุกฺขญฺเจว ทุกฺขสจฺจญฺจ.

(ก) สมุทโย สมุทยสจฺจนฺติ?

สมุทยสจฺจํ ฐเปตฺวา อวเสโส สมุทโย, น สมุทยสจฺจํ. สมุทยสจฺจํ สมุทโย เจว สมุทยสจฺจญฺจ.

(ข) สมุทยสจฺจํ สมุทโยติ? อามนฺตา.

(ก) นิโรโธ นิโรธสจฺจนฺติ?

นิโรธสจฺจํ ฐเปตฺวา อวเสโส นิโรโธ, น นิโรธสจฺจํ. นิโรธสจฺจํ นิโรโธ เจว นิโรธสจฺจญฺจ.

(ข) นิโรธสจฺจํ นิโรโธติ? อามนฺตา.

(ก) มคฺโค มคฺคสจฺจนฺติ?

มคฺคสจฺจํ ฐเปตฺวา อวเสโส มคฺโค, น มคฺคสจฺจํ. มคฺคสจฺจํ มคฺโค เจว มคฺคสจฺจญฺจ.

(ข) มคฺคสจฺจํ มคฺโคติ? อามนฺตา.

(ข) ปจฺจนีกํ

๑๑. (ก) น ทุกฺขํ น ทุกฺขสจฺจนฺติ?

กายิกํ ทุกฺขํ เจตสิกํ ทุกฺขํ ฐเปตฺวา อวเสสํ น ทุกฺขํ [อวเสสํ ทุกฺขสจฺจํ น ทุกฺขํ (สี. สฺยา. ก.) เอวํ อวเสเสสุ ตีสุ สจฺเจสุ] ทุกฺขสจฺจํ. ทุกฺขญฺจ ทุกฺขสจฺจญฺจ ฐเปตฺวา อวเสสํ น เจว ทุกฺขํ น จ ทุกฺขสจฺจํ.

(ข) น ทุกฺขสจฺจํ น ทุกฺขนฺติ? อามนฺตา.

(ก) น สมุทโย น สมุทยสจฺจนฺติ? อามนฺตา.

(ข) น สมุทยสจฺจํ น สมุทโยติ?

สมุทยสจฺจํ ฐเปตฺวา อวเสโส น สมุทยสจฺจํ, สมุทโย. สมุทยญฺจ สมุทยสจฺจญฺจ ฐเปตฺวา อวเสโส น เจว สมุทโย น จ สมุทยสจฺจํ.

(ก) น นิโรโธ น นิโรธสจฺจนฺติ? อามนฺตา.

(ข) น นิโรธสจฺจํ น นิโรโธติ?

นิโรธสจฺจํ ฐเปตฺวา อวเสโส น นิโรธสจฺจํ, นิโรโธ. นิโรธญฺจ นิโรธสจฺจญฺจ ฐเปตฺวา อวเสโส น เจว นิโรโธ น จ นิโรธสจฺจํ.

(ก) น มคฺโค น มคฺคสจฺจนฺติ? อามนฺตา.

(ข) น มคฺคสจฺจํ น มคฺโคติ?

มคฺคสจฺจํ ฐเปตฺวา อวเสโส น มคฺคสจฺจํ, มคฺโค. มคฺคญฺจ มคฺคสจฺจญฺจ ฐเปตฺวา อวเสโส น เจว มคฺโค น จ มคฺคสจฺจํ.