๑. ปทโสธนวาโร

(ก) อนุโลมํ

๑๐. (ก) จกฺขุ จกฺขุธาตูติ?

ทิพฺพจกฺขุ ปญฺญาจกฺขุ จกฺขุ, น จกฺขุธาตุ. จกฺขุธาตุ จกฺขุ เจว จกฺขุธาตุ จ.

(ข) จกฺขุธาตุ จกฺขูติ? อามนฺตา.

(ก) โสตํ โสตธาตูติ?

ทิพฺพโสตํ ตณฺหาโสตํ โสตํ, น โสตธาตุ. โสตธาตุ โสตญฺเจว โสตธาตุ จ.

(ข) โสตธาตุ โสตนฺติ? อามนฺตา.

(ก) ฆานํ ฆานธาตูติ? อามนฺตา.

(ข) ฆานธาตุ ฆานนฺติ? อามนฺตา. (ชิวฺหาปิ ฆานธาตุสทิสา).

(ก) กาโย กายธาตูติ?

กายธาตุํ ฐเปตฺวา อวเสโส กาโย [อวเสโส กาโย กาโย (สฺยา.)], น กายธาตุ. กายธาตุ กาโย เจว กายธาตุ จ.

(ข) กายธาตุ กาโยติ? อามนฺตา.

(ก) รูปํ รูปธาตูติ?

รูปธาตุํ ฐเปตฺวา อวเสสํ รูปํ, น รูปธาตุ. รูปธาตุ รูปญฺเจว รูปธาตุ จ.

(ข) รูปธาตุ รูปนฺติ? อามนฺตา. (สทฺโท ฆานสทิโส).

(ก) คนฺโธ คนฺธธาตูติ?

สีลคนฺโธ สมาธิคนฺโธ ปญฺญาคนฺโธ คนฺโธ, น คนฺธธาตุ. คนฺธธาตุ คนฺโธ เจว คนฺธธาตุ จ.

(ข) คนฺธธาตุ คนฺโธติ? อามนฺตา.

(ก) รโส รสธาตูติ?

อตฺถรโส ธมฺมรโส วิมุตฺติรโส รโส, น รสธาตุ. รสธาตุ รโส เจว รสธาตุ จ.

(ข) รสธาตุ รโสติ? อามนฺตา. (โผฏฺฐพฺโพ ฆานสทิโส).

(ก) จกฺขุวิญฺญาณํ จกฺขุวิญฺญาณธาตูติ? อามนฺตา.

(ข) จกฺขุวิญฺญาณธาตุ จกฺขุวิญฺญาณนฺติ? อามนฺตา.

โสตวิญฺญาณํ…เป… ฆานวิญฺญาณํ… ชิวฺหาวิญฺญาณํ… กายวิญฺญาณํ….

(ก) มโน มโนธาตูติ?

มโนธาตุํ ฐเปตฺวา อวเสโส มโน, น มโนธาตุ. มโนธาตุ มโน เจว มโนธาตุ จ.

(ข) มโนธาตุ มโนติ? อามนฺตา.

(ก) มโนวิญฺญาณํ มโนวิญฺญาณธาตูติ? อามนฺตา.

(ข) มโนวิญฺญาณธาตุ มโนวิญฺญาณนฺติ? อามนฺตา.

(ก) ธมฺโม ธมฺมธาตูติ?

ธมฺมธาตุํ ฐเปตฺวา อวเสโส ธมฺโม, น ธมฺมธาตุ. ธมฺมธาตุ ธมฺโม เจว ธมฺมธาตุ จ.

(ข) ธมฺมธาตุ ธมฺโมติ? อามนฺตา.

(ข) ปจฺจนีกํ

๑๑. (ก) น จกฺขุ น จกฺขุธาตูติ? อามนฺตา.

(ข) น จกฺขุธาตุ น จกฺขูติ?

ทิพฺพจกฺขุ ปญฺญาจกฺขุ น จกฺขุธาตุ, จกฺขุ. จกฺขุญฺจ จกฺขุธาตุญฺจ ฐเปตฺวา อวเสสํ น เจว จกฺขุ น จ จกฺขุธาตุ.

(ก) น โสตํ น โสตธาตูติ? อามนฺตา.

(ข) น โสตธาตุ น โสตนฺติ?

ทิพฺพโสตํ ตณฺหาโสตํ น โสตธาตุ, โสตํ. โสตญฺจ โสตธาตุญฺจ ฐเปตฺวา อวเสสํ น เจว โสตํ น จ โสตธาตุ.

(ก) น ฆานํ น ฆานธาตูติ? อามนฺตา.

(ข) น ฆานธาตุ น ฆานนฺติ? อามนฺตา.

น ชิวฺหา… (สํขิตฺตํ [ยํ สํขิตฺตํ (สฺยา.)], อุภโต อามนฺตา).

(ก) น กาโย น กายธาตูติ? อามนฺตา.

(ข) น กายธาตุ น กาโยติ?

กายธาตุํ ฐเปตฺวา อวเสโส น กายธาตุ, กาโย. กายญฺจ กายธาตุญฺจ ฐเปตฺวา อวเสโส [อวเสโส กาโย (สฺยา.)] น เจว กาโย น จ กายธาตุ.

(ก) น รูปํ น รูปธาตูติ? อามนฺตา.

(ข) น รูปธาตุ น รูปนฺติ?

รูปธาตุํ ฐเปตฺวา อวเสสํ น รูปธาตุ, รูปํ. รูปญฺจ รูปธาตุญฺจ ฐเปตฺวา อวเสสํ น เจว รูปํ น จ รูปธาตุ.

น สทฺโท…เป… น คนฺโธ น คนฺธธาตูติ? อามนฺตา.

น คนฺธธาตุ น คนฺโธติ?

สีลคนฺโธ สมาธิคนฺโธ ปญฺญาคนฺโธ น คนฺธธาตุ, คนฺโธ. คนฺธญฺจ คนฺธธาตุญฺจ ฐเปตฺวา อวเสโส น เจว คนฺโธ น จ คนฺธธาตุ.

(ก) น รโส น รสธาตูติ? อามนฺตา.

(ข) น รสธาตุ น รโสติ?

อตฺถรโส ธมฺมรโส วิมุตฺติรโส น รสธาตุ, รโส. รสญฺจ รสธาตุญฺจ ฐเปตฺวา อวเสโส น เจว รโส น จ รสธาตุ.

น โผฏฺฐพฺโพ…เป… น จกฺขุวิญฺญาณํ น จกฺขุวิญฺญาณธาตูติ? อามนฺตา.

น จกฺขุวิญฺญาณธาตุ น จกฺขุวิญฺญาณนฺติ? อามนฺตา.

น โสตวิญฺญาณํ…เป… น ฆานวิญฺญาณํ… น ชิวฺหาวิญฺญาณํ… น กายวิญฺญาณํ….

(ก) น มโน น มโนธาตูติ? อามนฺตา.

(ข) น มโนธาตุ น มโนติ?

มโนธาตุํ ฐเปตฺวา อวเสโส น มโนธาตุ, มโน. มนญฺจ มโนธาตุญฺจ ฐเปตฺวา อวเสโส น เจว มโน น จ มโนธาตุ.

(ก) น มโนวิญฺญาณํ น มโนวิญฺญาณธาตูติ? อามนฺตา.

(ข) น มโนวิญฺญาณธาตุ น มโนวิญฺญาณนฺติ? อามนฺตา.

(ก) น ธมฺโม น ธมฺมธาตูติ? อามนฺตา.

(ข) น ธมฺมธาตุ น ธมฺโมติ?

ธมฺมธาตุํ ฐเปตฺวา อวเสโส น ธมฺมธาตุ, ธมฺโม. ธมฺมญฺจ ธมฺมธาตุญฺจ ฐเปตฺวา อวเสโส น เจว ธมฺโม น จ ธมฺมธาตุ.