ปจฺจนียํ

นเหตุปจฺจโย

๕๖. นสรณํ ธมฺมํ ปฏิจฺจ อรโณ ธมฺโม อุปฺปชฺชติ นเหตุปจฺจยา. นอรณํ ธมฺมํ ปฏิจฺจ สรโณ ธมฺโม อุปฺปชฺชติ นเหตุปจฺจยา (สํขิตฺตํ).

นเหตุยา เทฺว, นอารมฺมเณ ตีณิ…เป… โนวิคเต ตีณิ.

(สหชาตวารมฺปิ…เป… สมฺปยุตฺตวารมฺปิ ปฏิจฺจวารสทิสํ.)

เหตุ-อารมฺมณปจฺจยา

๕๗. นสรโณ ธมฺโม อรณสฺส ธมฺมสฺส เหตุปจฺจเยน ปจฺจโย. (๑)

นอรโณ ธมฺโม อรณสฺส ธมฺมสฺส เหตุปจฺจเยน ปจฺจโย. นอรโณ ธมฺโม สรณสฺส ธมฺมสฺส เหตุปจฺจเยน ปจฺจโย. นอรโณ ธมฺโม สรณสฺส จ อรณสฺส จ ธมฺมสฺส เหตุปจฺจเยน ปจฺจโย. (๓)

๕๘. นสรโณ ธมฺโม สรณสฺส ธมฺมสฺส อารมฺมณปจฺจเยน ปจฺจโย. นสรโณ ธมฺโม อรณสฺส ธมฺมสฺส อารมฺมณปจฺจเยน ปจฺจโย. เทฺว.

นอรโณ ธมฺโม อรณสฺส ธมฺมสฺส อารมฺมณปจฺจเยน ปจฺจโย. นอรโณ ธมฺโม สรณสฺส ธมฺมสฺส อารมฺมณปจฺจเยน ปจฺจโย. เทฺว.

๕๙. เหตุยา จตฺตาริ, อารมฺมเณ จตฺตาริ…เป… อวิคเต สตฺต.

ปจฺจนียุทฺธาโร

๖๐. นสรโณ ธมฺโม สรณสฺส ธมฺมสฺส อารมฺมณปจฺจเยน ปจฺจโย, อุปนิสฺสยปจฺจเยน ปจฺจโย, ปุเรชาตปจฺจเยน ปจฺจโย (สํขิตฺตํ).

นเหตุยา สตฺต, นอารมฺมเณ สตฺต…เป… โนอวิคเต จตฺตาริ.

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํ.)

ธมฺมปจฺจนียานุโลเม ทุกปฏฺฐานํ นิฏฺฐิตํ.