กายขมนีย-นิทฺเทส

๒๓๔. อภิวาทน-สีลิสฺส,

นิจฺจํ วุฑฺฒาปจายิโน;

จตฺตาโร ธมฺมา วฑฺฒนฺติ,

อายุ วณฺโณ สุขํ พลํ.

๒๓๕. ปญฺจิเม ภิกฺขเว ธมฺมา อายุสฺสา, กตเม ปญฺจ. สปฺปาย-การี โหติ. สปฺปาเยจ มตฺตํ ชานาติ. ปริณตฺตโภชี จ โหติ. กาล-จารี จ, พฺรหฺม-จารีจ. อิเม โข ภิกฺขเว ปญฺจ ธมฺมา อายุสฺสาติ.

๒๓๖. ปญฺจิเม ภิกฺขเว ธมฺมา อายุสฺสา, กตเม ปญฺจ. สปฺปาย-การี โหติ. สปฺปาเยจ มตฺตํ ชานาติ. ปริณตโภชีจโหติ. สีลวาจ, กลฺยาณ มิตฺโตจ. อิเม โข ภิกฺขเว ปญฺจ ธมฺมา อายุสฺสาติ.

๒๓๗. ปญฺจ-สีลํ สมาทาย,

สมํ กตฺวา ทิเน ทิเน;

สติมา ปญฺญวา หุตฺวา,

จเร สพฺพิริยาปเถ.

๒๓๘. ปญฺจิเม ภิกฺขเว จงฺกเม อานิสํสา, กตเม ปญฺจ, อทฺธานกฺขโม โหติ. ปธานกฺขโม โหติ. อปฺปาพาโธ โหติ. อสิตํปีตํขายิตํสายิตํ สมฺมา ปริณามํ คจฺฉติ. จงฺกมาธิคโต สมาธิ จิรฏฺฐิติโก โหติ. อิเมโข ภิกฺขเว ปญฺจ จงฺกเม อานิ สํสาติ.

๒๓๙. ปริสฺสาวน-ทานญฺจ,

อาวาส-ทานเมว จ;

คิลาน-วตฺถุ-ทานญฺจ,

ทาตพฺพํ มนุชาธิป.

๒๔๐. กาตพฺพํ ชิณฺณกาวาสํ,

ปฏิสงฺขรณํ ตถา;

ปญฺจ-สีล-สมาทานํ,

กตฺวา ตํ สาธุ-รกฺขิตํ;

อุโปสโถปวาโส จ,

กาตพฺโพโปสเถ อิติ.

๒๔๑. อติ-โภตฺตา โรค-มูลํ,

อายุกฺขยํ กโรติ เว;

ตสฺมา ตํ อติ-ภุตฺตึว,

ปริหเรยฺย ปณฺฑิโต.

๒๔๒. อ-ชิณฺเณ โภชนํ วิสํ,

ทุลฺลทฺเธ อ-วิจารเก;

ชิณฺเณ สุ-ลทฺเธ วิจาเร,

น วชฺชํ สพฺพ-โภชนํ.

๒๔๓. จตฺตาโร ปญฺจ อาโลเป,

อาภุตฺวา อุทกํ ปิเว;

อลํ ผาสุ-วิหาราย;

ปหิตตฺตสฺส ภิกฺขุโน.

๒๔๔. มนุชสฺส สทา สติมโต,

มตฺตํ ชานโต ลทฺธ-โภชนํ;

ตนุกสฺส ภวนฺติ เวทนา,

สนิกํ ชีรติ อายุ ปาลยํ.

๒๔๕. ครูนํ อฑฺฒ-โสหิจฺจํ,

ลหูนํ นาติ-กิตฺติยา;

มตฺตา-ปมาณํ นิทฺทิฏฺฐํ,

สุขํ ชีรติ ตาวตา.

๒๔๖. โตยาภาเว ปิปาสตฺตา,

ขณา ปาเณหิ มุจฺจเต;

ตสฺมา สพฺพาสุวตฺถาสุ,

เทยฺยํ วารึ ปิปาสเย.

๒๔๗. สีโตทกํ ปโย ขุทฺทํ,

ฆตเมเกกโส ทฺวิโส;

ติสฺโส สมคฺคมถ วา,

ปเค ปิตํ ยุวตฺตทํ.

๒๔๘. อนฺนํ พฺรหฺมา รเส วิณฺหุ,

ภุตฺเต เจว มเหสโร;

เอวํ ญตฺวาตุ โย ภุญฺเช,

อนฺน-โทสํ น ลิมฺปเต.

๒๔๙. กตฺติกสฺสนฺติโม ภาโค,

ยํ จาโท มิค-มาสโช;

ตาวุโภ ยม-ทาฐาโขฺย,

ลฆฺวาหาโรว ชีวติ.

๒๕๐. สตฺถานุกุล-จริยา,

จิตฺตญฺญาวสวตฺตินา;

พุทฺธิ-รกฺขิลิตตฺเถน,

ปริปุณฺณํ รสายนํ.

๒๕๐. อ-ชาติยา อ-ชาตานํ,

ชาตานํ วินิวตฺติยา;

โรคานํ โย วิธิ ทิฏฺโฐ,

ตํ สุขตฺถี สมาจเร.

๒๕๒. อาโรคฺยํ ปรมา ลาภา,

สนฺตุฏฺฐิ ปรมํ ธนํ;

วิสฺสาสา ปรมา ญาติ,

นิพฺพานํ ปรมํ สุขํ.