นโม ตสฺส ภควโต อรหโต สมฺมาสมฺพุทฺธสฺส

นรทกฺขทีปนี

ปาลิโต เยว สทฺธมฺโม,

ปาลิเตน วเรน จ;

ปาลิเต สุฏฺฐุ ยํ สีลํ,

ปาลิตํ ธมฺม-สุนฺทรํ.

สมฺมา อารทฺธํ สพฺพ-สมฺปตฺตีนํ,

มูลํ โหตีติ ทฏฺฐพฺพํ.

วีริยารพฺโภ ภิกฺขเว,

มหโต อตฺถาย สํวตฺตตีติ.

ตสฺมา วีริยเมว กตฺตพฺพํ,

วีริยวโต หิ อจินฺติตํปิ โหติ.

ยถา หิ ตจฺฉกานํ สุตฺตํ,

ปมาณํ โหติ;

เอว เมตมฺปิ วิญฺญูนํ.

สุวิชาโน ภวํ โหติ,

ทุพฺพิชาโน ปราภโว;

ธมฺมกาโม ภวํ โหติ,

ธมฺมเทสฺสี ปราภโว.

อยํ ธมฺมตาติ อยํ สภาโว,

อยํ นิยาโมติ วุตฺตํ โหติ.

เย ธมฺมา เหตุปภวา,

เตสํ เหตุํ ตถาคโต.

รตนตฺตยํ, สนฺตตํ, อหํ วนฺทามิ;

อาจริยํ, โส อหํ, นิจฺจํ นมามิ;

‘‘โหตุ สพฺพํ, มงฺคลํ, มมํ สพฺพธิ’’.

นรทกฺขทีปนี

นโม ตสฺส ภควโต อรหโต สมฺมาสมฺพุทฺธสฺส

ปณาม

นรทกฺขทีปกสฺส,

นโม สมนฺตจกฺขุโน;

สํสารา วิปฺปมุตฺตสฺส,

สํสารา วิปฺปมุตฺตสฺส,

ส-สทฺธมฺมสฺส สงฺฆิโน.

มตฺถนา

๒. ปาลิเตหิ วรุตฺตมํ,

ปาลิตํ สีล-ปารมึ;

ปาเลตุ วรสมฺพุทฺโธ,

ปาลิตํ คนฺถ-การณํ.

อาสีส

๓. พหุสฺสุโต จ เมธาวี,

สีเลสุจ สมาหิโต;

เจโตสมถานุยุตฺโต,

อปิ มุทฺธนิ ติฏฺฐตุ.

อภิยาจก

๔. ธมฺม-สงฺฆํ วนฺทิตฺวาน,

สพฺพ-โลกสฺส นายกํ;

ยาจิโต ติกกฺรป-เถเรน,

มาณเวน จ ธีมตา.

๕. อุตฺตานเมว สงฺเขปํ,

นานา-สตฺถ-สุธาริตํ;

นร-ทกฺขํ ลิขิสฺสมิ,

ปสฺสนฺตุ ธีร-มามกา.

๖. โกสชฺชํ ภยโต ทิสฺวา,

วีริยญฺชาปิ เขมโต;

อารทฺธวีริยา โหถ;

เอสา พุทฺธานุสาสนี.

๗. วีริยวา โข ภิกฺขเว อริยสาวโก,

อกุสลํ ปชหติ, กุสลํ ภาเวติ;

สาวชฺชํ ปชหติ, อนวชฺชํ ภาเวติ,

สุทฺธมตฺตานํ ปริหรตีติ.

วีริยวโต กึ นาม กมฺมํ น สิชฺฌติ;

ปุริสกาโร นาม น นสฺสติ,

สุเข ปติฏฺฐาเปตีติ ชานามิ.

๘. ยถา ขิตฺตํ นเภ เลฑฺฑุ,

ธุวํ ปตติ ภูมิยํ;

ตเถว พุทฺธ-เสฏฺฐานํ,

วจนํ ธุว-สสฺสตํ.

๙. อ-เทฺวชฺฌวจนา พุทฺธา,

อ-โมฆวจนา ชินา.

๑๐. สุสฺสุสา ลภเต ปญฺญํ,

อุฏฺฐาตา วินฺทเต ธนํ;

ตสฺมา ปาฬึ คุรุํ กตฺวา,

อิมํ ปสฺสาหิ โสภณํ.

๑๑. สุสฺสุสา สุต-พุทฺธินี,

สุตํ ปญฺญาย วฑฺฒนํ;

ปญฺญาย อตฺถํ ชานาติ,

ญาโต อตฺโถ สุขาวโห.

๑๒. สตตํชฺฌายนํ วาท,

ปร-ตนฺตวโลกนํ;

สพฺพิชฺชาเจร-เสวาจ,

พุทฺธิ-มติ-กโร คุโณ.

๑๓. อติ-ทีโฆว นีโฆ หิ,

กุสีโต หีน-วีริโย;

ตสฺมา วีริยํ กตฺวาน,

วิชฺชํ เอสนฺตุ สาธโว.

๑๔. สุโปริโส ตาว สิปฺปํ,

อุคฺคเณฺหยฺย ปรํ ธนํ;

คเวเสยฺย ตโต มนฺตํ,

กเถยฺย สจฺจ-ภาสิตํ.

๑๕. ปถมํ น ปราชเย สิปฺปํ,

ทุตียํ น ปราชเย ธนํ;

ตตียํ น ปราชเย ธนํ,

จตุตฺถมตฺถํ กึ กริสฺสติ.

๑๖. โสภนฺติ อ-มิลาตานิ,

ปุปฺผานิว ปิลนฺธิตุํ;

ตถา โสภนฺติ ทารกา,

โยพฺพเนเยว สิกฺขิตุํ.

๑๗. ตสฺมา หเว คุณาธารํ,

ปญฺญา-วฑฺฒนมุตฺตมํ;

สิกฺเขยฺย มติมา โปโส,

ปตฺเถนฺโต หิตมตฺตโน.

๑๘. อลํ วายมิตุํ สิปฺเป,

อตฺถ-กาเมน ชนฺตุนา;

กตํ วิชญฺญา วิชฺชาทิ,

วโย เต มา อุปชฺฌคา.

๑๙. วิชฺชํ สิกฺเข, จเร สีลํ,

ธีเรน สห สํวเส;

ธนาจเย, กเร กมฺมํ,

ปิยํ วาจญฺจ สํวเท.

๒๐. น เตฺวว สุปิตุํ โหติ,

รตฺติ นกฺขตฺต-มาลินี;

ปฏิชคฺคิตุเมเวสา,

รตฺติ โหติ วิชานตํ.

๒๑. อุฏฺฐาหถ นิสีทถ,

โก อตฺโถ สุปิเตน โว;

สาธุ โข สิปฺป-วิชฺชาหฺวา,

วิชฺชํ สิกฺขถ สนฺตตํ.

๒๒. อารพฺภถ สทา ปุตฺตา,

พหุสฺสุตํ คเวสิตุํ;

ยสฺมา โลเก สิปฺปวนฺตา,

สพฺพา-ทิสาสุ ปากฏา.

๒๓. สกฺยรูปํ ปุเร สนฺตํ,

มยา สิปฺปํ น สิกฺขิตํ;

กิจฺฉา วุตฺติ อ-สิปฺปสฺส,

อิติ ปจฺฉา นุตปฺปติ.

๒๔. โลกตฺถํ โลก-กมฺมนฺตํ,

อิจฺฉนฺโต ปริเยสิตุํ;

นิจฺจเมว วีริยญฺจ,

อตฺถํ มนฺตญฺช จินฺตเย.

๒๕. ธนวา คุณวา โลเก,

สพฺพา-ทิสาย ปากโฏ;

สีลวา ปญฺญวา มจฺโจ,

สพฺพ-โลเกหิ ปูชิโต.

๒๖. สชีวติ ยโส ยสฺส,

กิตฺติ ยสฺส สชีวติ;

ยส-กิตฺติ วิหีนสฺส,

ชีวนฺโตปิ มโตปมา.

๒๗. สทฺธีธ วิตฺตํ ปุริสสฺส เสฏฺฐํ,

ธมฺโม สุจิณฺโณ สุขมาวหาติ;

สจฺจํ หเว สาทุตรํ รสานํ,

ปญฺญาชีวึ ชีวิตมาหุ เสฏฺฐนฺติ.

๒๘. สติมโต สทา ภทฺทํ,

สติมา สุขเมธติ;

สติมโต สุเว เสยฺโย,

เวรา จ ปริมุจฺจติ.

๒๙. มา โว ขณํ วิราเธถ,

ขณาตีตา หิ โสจเร;

สทตฺเถ วายเมยฺยาถ,

ขโณ โว ปฏิปาทิโต.