౫. పారాజికాదిఆపత్తి

౩౩౯. ‘పారాజిక’న్తి యం వుత్తం, తం సుణోహి యథాతథం;

చుతో పరద్ధో భట్ఠో చ, సద్ధమ్మా హి నిరఙ్కతో;

సంవాసోపి తహిం నత్థి, తేనేతం ఇతి వుచ్చతి.

‘సఙ్ఘాదిసేసో’తి యం వుత్తం, తం సుణోహి యథాతథం;

సఙ్ఘోవ దేతి పరివాసం, మూలాయ పటికస్సతి;

మానత్తం దేతి అబ్భేతి, తేనేతం ఇతి వుచ్చతి.

‘అనియతో’తి యం వుత్తం, తం సుణోహి యథాతథం;

అనియతో న నియతో, అనేకంసికతం పదం;

తిణ్ణమఞ్ఞతరం ఠానం, ‘అనియతో’తి పవుచ్చతి.

‘థుల్లచ్చయ’న్తి యం వుత్తం, తం సుణోహి యథాతథం;

ఏకస్స మూలే యో దేసేతి, యో చ తం పటిగణ్హతి;

అచ్చయో తేన సమో నత్థి, తేనేతం ఇతి వుచ్చతి.

‘నిస్సగ్గియ’న్తి యం వుత్తం, తం సుణోహి యథాతథం;

సఙ్ఘమజ్ఝే గణమజ్ఝే, ఏకస్సేవ చ ఏకతో;

నిస్సజ్జిత్వాన దేసేతి, తేనేతం ఇతి వుచ్చతి.

‘పాచిత్తియ’న్తి యం వుత్తం, తం సుణోహి యథాతథం;

పాతేతి కుసలం ధమ్మం, అరియమగ్గం అపరజ్ఝతి;

చిత్తసంమోహనట్ఠానం, తేనేతం ఇతి వుచ్చతి.

‘పాటిదేసనీయ’న్తి యం వుత్తం, తం సుణోహి యథాతథం;

భిక్ఖు అఞ్ఞాతకో సన్తో, కిచ్ఛా లద్ధాయ భోజనం;

సామం గహేత్వా భుఞ్జేయ్య, ‘గారయ్హ’న్తి పవుచ్చతి.

నిమన్తనాసు భుఞ్జన్తా ఛన్దాయ, వోసాసతి తత్థ భిక్ఖునిం;

అనివారేత్వా తహిం భుఞ్జే, గారయ్హన్తి పవుచ్చతి.

సద్ధాచిత్తం కులం గన్త్వా, అప్పభోగం అనాళియం [అనాళ్హియం (సీ. స్యా.)];

అగిలానో తహిం భుఞ్జే, గారయ్హన్తి పవుచ్చతి.

యో చే అరఞ్ఞే విహరన్తో, సాసఙ్కే సభయానకే;

అవిదితం తహిం భుఞ్జే, గారయ్హన్తి పవుచ్చతి.

భిక్ఖునీ అఞ్ఞాతికా సన్తా, యం పరేసం మమాయితం;

సప్పి తేలం మధుం ఫాణితం, మచ్ఛమంసం అథో ఖీరం;

దధిం సయం విఞ్ఞాపేయ్య భిక్ఖునీ, గారయ్హపత్తా సుగతస్స సాసనే.

‘దుక్కట’న్తి యం వుత్తం, తం సుణోహి యథాతథం;

అపరద్ధం విరద్ధఞ్చ, ఖలితం యఞ్చ దుక్కటం.

యం మనుస్సో కరే పాపం, ఆవి వా యది వా రహో;

‘దుక్కట’న్తి పవేదేన్తి, తేనేతం ఇతి వుచ్చతి.

‘దుబ్భాసిత’న్తి యం వుత్తం, తం సుణోహి యథాతథం;

దుబ్భాసితం దురాభట్ఠం, సంకిలిట్ఠఞ్చ యం పదం;

యఞ్చ విఞ్ఞూ గరహన్తి, తేనేతం ఇతి వుచ్చతి.

‘సేఖియ’న్తి యం వుత్తం, తం సుణోహి యథాతథం;

సేక్ఖస్స సిక్ఖమానస్స, ఉజుమగ్గానుసారినో.

ఆది చేతం చరణఞ్చ, ముఖం సఞ్ఞమసంవరో;

సిక్ఖా ఏతాదిసీ నత్థి, తేనేతం ఇతి వుచ్చతి.

[ఉదా. ౪౫ ఉదానేపి] ఛన్నమతివస్సతి, వివటం నాతివస్సతి;

తస్మా ఛన్నం వివరేథ, ఏవం తం నాతివస్సతి.

గతి మిగానం పవనం, ఆకాసో పక్ఖినం గతి;

విభవో గతి ధమ్మానం, నిబ్బానం అరహతో గతీతి.

గాథాసఙ్గణికం.

తస్సుద్దానం –

సత్తనగరేసు పఞ్ఞత్తా, విపత్తి చతురోపి చ;

భిక్ఖూనం భిక్ఖునీనఞ్చ, సాధారణా అసాధారణా;

సాసనం అనుగ్గహాయ, గాథాసఙ్గణికం ఇదన్తి.

గాథాసఙ్గణికం నిట్ఠితం.