౧. సత్తనగరేసు పఞ్ఞత్తసిక్ఖాపదం

౩౩౫. ఏకంసం చీవరం కత్వా, పగ్గణ్హిత్వాన అఞ్జలిం;

ఆసీసమానరూపోవ [ఆసింసమానరూపోవ (సీ. స్యా.)], కిస్స త్వం ఇధ మాగతో.

ద్వీసు వినయేసు యే పఞ్ఞత్తా;

ఉద్దేసం ఆగచ్ఛన్తి ఉపోసథేసు;

కతి తే సిక్ఖాపదా హోన్తి;

కతిసు నగరేసు పఞ్ఞత్తా.

భద్దకో తే ఉమ్మఙ్గో, యోనిసో పరిపుచ్ఛసి;

తగ్ఘ తే అహమక్ఖిస్సం, యథాసి కుసలో తథా.

ద్వీసు వినయేసు యే పఞ్ఞత్తా;

ఉద్దేసం ఆగచ్ఛన్తి ఉపోసథేసు;

అడ్ఢుడ్ఢసతాని తే హోన్తి;

సత్తసు నగరేసు పఞ్ఞత్తా.

కతమేసు సత్తసు నగరేసు పఞ్ఞత్తా;

ఇఙ్ఘ మే త్వం బ్యాకర నం [ఇఙ్ఘ మే తం బ్యాకర (క.)];

తం వచనపథం [తవ వచనపథం (స్యా.)] నిసామయిత్వా;

పటిపజ్జేమ హితాయ నో సియా.

వేసాలియం రాజగహే, సావత్థియఞ్చ ఆళవియం;

కోసమ్బియఞ్చ సక్కేసు, భగ్గేసు చేవ పఞ్ఞత్తా.

కతి వేసాలియం పఞ్ఞత్తా, కతి రాజగహే కతా;

సావత్థియం కతి హోన్తి, కతి ఆళవియం కతా.

కతి కోసమ్బియం పఞ్ఞత్తా, కతి సక్కేసు వుచ్చన్తి;

కతి భగ్గేసు పఞ్ఞత్తా, తం మే అక్ఖాహి పుచ్ఛితో.

దస వేసాలియం పఞ్ఞత్తా, ఏకవీస రాజగహే కతా;

ఛఊన తీణిసతాని, సబ్బే సావత్థియం కతా.

ఛ ఆళవియం పఞ్ఞత్తా, అట్ఠ కోసమ్బియం కతా;

అట్ఠ సక్కేసు వుచ్చన్తి, తయో భగ్గేసు పఞ్ఞత్తా.

యే వేసాలియం పఞ్ఞత్తా, తే సుణోహి యథాతథం [యథాకథం (సీ. స్యా. ఏవముపరిపి)];

మేథునవిగ్గహుత్తరి, అతిరేకఞ్చ కాళకం.

భూతం పరమ్పరభత్తం, దన్తపోనేన [దన్తపోణేన (క.)] అచేలకో;

భిక్ఖునీసు చ అక్కోసో, దసేతే వేసాలియం కతా.

యే రాజగహే పఞ్ఞత్తా, తే సుణోహి యథాతథం;

అదిన్నాదానం రాజగహే, ద్వే అనుద్ధంసనా ద్వేపి చ భేదా.

అన్తరవాసకం రూపియం సుత్తం, ఉజ్ఝాపనేన చ పాచితపిణ్డం;

గణభోజనం వికాలే చ, చారిత్తం నహానం ఊనవీసతి.

చీవరం దత్వా వోసాసన్తి, ఏతే రాజగహే కతా;

గిరగ్గచరియా తత్థేవ, ఛన్దదానేన ఏకవీసతి.

యే సావత్థియం పఞ్ఞత్తా, తే సుణోహి యథాతథం;

పారాజికాని చత్తారి, సఙ్ఘాదిసేసా భవన్తి సోళస.

అనియతా చ ద్వే హోన్తి, నిస్సగ్గియా చతువీసతి;

ఛపఞ్ఞాససతఞ్చేవ, ఖుద్దకాని పవుచ్చన్తి.

దసయేవ చ గారయ్హా, ద్వేసత్తతి చ సేఖియా;

ఛఊన తీణిసతాని, సబ్బే సావత్థియం కతా.

యే ఆళవియం పఞ్ఞత్తా, తే సుణోహి యథాతథం;

కుటికోసియసేయ్యా చ, ఖణనే గచ్ఛ దేవతే;

సప్పాణకఞ్చ సిఞ్చన్తి, ఛ ఏతే ఆళవియం కతా.

యే కోసమ్బియం పఞ్ఞత్తా, తే సుణోహి యథాతథం;

మహావిహారో దోవచస్సం, అఞ్ఞం ద్వారం సురాయ చ;

అనాదరియం సహధమ్మో, పయోపానేన అట్ఠమం.

యే సక్కేసు పఞ్ఞత్తా, తే సుణోహి యథాతథం;

ఏళకలోమాని పత్తో చ, ఓవాదో చేవ భేసజ్జం.

సూచి ఆరఞ్ఞికో చేవ, అట్ఠేతే [ఛ ఏతే (సబ్బత్థ)] కాపిలవత్థవే;

ఉదకసుద్ధియా ఓవాదో, భిక్ఖునీసు పవుచ్చన్తి.

యే భగ్గేసు పఞ్ఞత్తా, తే సుణోహి యథాతథం;

సమాదహిత్వా విసిబ్బేన్తి, సామిసేన ససిత్థకం.

పారాజికాని చత్తారి, సఙ్ఘాదిసేసాని భవన్తి;

సత్త చ నిస్సగ్గియాని, అట్ఠ ద్వత్తింస ఖుద్దకా.

ద్వే గారయ్హా తయో సేక్ఖా, ఛప్పఞ్ఞాస సిక్ఖాపదా;

ఛసు నగరేసు పఞ్ఞత్తా, బుద్ధేనాదిచ్చబన్ధునా.

ఛఊన తీణిసతాని, సబ్బే సావత్థియం కతా;

కారుణికేన బుద్ధేన, గోతమేన యసస్సినా.