౯. నవకవారో

౩౨౯. నవ ఆఘాతవత్థూని. నవ ఆఘాతపటివినయా. నవ వినీతవత్థూని. నవ పఠమాపత్తికా. నవహి సఙ్ఘో భిజ్జతి. నవ పణీతభోజనాని. నవమంసేహి దుక్కటం. నవ పాతిమోక్ఖుద్దేసా. నవ పరమాని. నవ తణ్హామూలకా ధమ్మా. నవ విధమానా. నవ చీవరాని అధిట్ఠాతబ్బాని. నవ చీవరాని న వికప్పేతబ్బాని. దీఘసో నవ విదత్థియో సుగతవిదత్థియా. నవ అధమ్మికాని దానాని. నవ అధమ్మికా పటిగ్గహా. నవ అధమ్మికా పరిభోగా – తీణి ధమ్మికాని దానాని, తయో ధమ్మికా పటిగ్గహా, తయో ధమ్మికా పరిభోగా. నవ అధమ్మికా సఞ్ఞత్తియో [పఞ్ఞత్తియో (సబ్బత్థ) అట్ఠకథా చ సమథక్ఖన్ధకే కణ్హపక్ఖనవకఞ్చ ఓలోకేతబ్బం]. నవ ధమ్మికా సఞ్ఞత్తియో. అధమ్మకమ్మే ద్వే నవకాని. ధమ్మకమ్మే ద్వే నవకాని. నవ అధమ్మికాని పాతిమోక్ఖట్ఠపనాని. నవ ధమ్మికాని పాతిమోక్ఖట్ఠపనానీతి.

నవకం నిట్ఠితం.

తస్సుద్దానం –

ఆఘాతవత్థువినయా, వినీతా పఠమేన చ;

భిజ్జతి చ పణీతఞ్చ, మంసుద్దేసపరమాని చ.

తణ్హా మానా అధిట్ఠానా, వికప్పే చ విదత్థియో;

దానా పటిగ్గహా భోగా, తివిధా పున ధమ్మికా.

అధమ్మధమ్మసఞ్ఞత్తి, దువే ద్వే నవకాని చ;

పాతిమోక్ఖట్ఠపనాని, అధమ్మధమ్మికాని చాతి.