౧౦. దసకవారో

౩౩౦. దస ఆఘాతవత్థూని. దస ఆఘాతపటివినయా. దస వినీతవత్థూని. దసవత్థుకా మిచ్ఛాదిట్ఠి. దసవత్థుకా సమ్మాదిట్ఠి. దస అన్తగ్గాహికా దిట్ఠి. దస మిచ్ఛత్తా. దస సమ్మత్తా. దస అకుసలకమ్మపథా. దస కుసలకమ్మపథా. దస అధమ్మికా సలాకగ్గాహా. దస ధమ్మికా సలాకగ్గాహా. సామణేరానం దస సిక్ఖాపదాని. దసహఙ్గేహి సమన్నాగతో సామణేరో నాసేతబ్బో.

దసహఙ్గేహి సమన్నాగతో వినయధరో బాలో త్వేవ సఙ్ఖం గచ్ఛతి – అత్తనో భాసపరియన్తం న ఉగ్గణ్హాతి, పరస్స భాసపరియన్తం న ఉగ్గణ్హాతి, అత్తనో భాసపరియన్తం అనుగ్గహేత్వా పరస్స భాసపరియన్తం అనుగ్గహేత్వా అధమ్మేన కారేతి, అప్పటిఞ్ఞాయ ఆపత్తిం న జానాతి, ఆపత్తియా మూలం న జానాతి, ఆపత్తిసముదయం న జానాతి, ఆపత్తినిరోధం న జానాతి, ఆపత్తినిరోధగామినిం పటిపదం న జానాతి.

దసహఙ్గేహి సమన్నాగతో వినయధరో పణ్డితో త్వేవ సఙ్ఖం గచ్ఛతి – అత్తనో భాసపరియన్తం ఉగ్గణ్హాతి, పరస్స భాసపరియన్తం ఉగ్గణ్హాతి, అత్తనో భాసపరియన్తం ఉగ్గహేత్వా పరస్స భాసపరియన్తం ఉగ్గహేత్వా ధమ్మేన కారేతి, పటిఞ్ఞాయ ఆపత్తిం జానాతి, ఆపత్తియా మూలం జానాతి, ఆపత్తిసముదయం జానాతి, ఆపత్తినిరోధం జానాతి, ఆపత్తినిరోధగామినిం పటిపదం జానాతి.

అపరేహిపి దసహఙ్గేహి సమన్నాగతో వినయధరో బాలో త్వేవ సఙ్ఖం గచ్ఛతి – అధికరణం న జానాతి, అధికరణస్స మూలం న జానాతి, అధికరణసముదయం న జానాతి, అధికరణనిరోధం న జానాతి, అధికరణనిరోధగామినిం పటిపదం న జానాతి, వత్థుం న జానాతి, నిదానం [ఉద్దానం (క.)] న జానాతి, పఞ్ఞత్తిం న జానాతి, అనుపఞ్ఞత్తిం న జానాతి, అనుసన్ధివచనపథం న జానాతి.

దసహఙ్గేహి సమన్నాగతో వినయధరో పణ్డితో త్వేవ సఙ్ఖం గచ్ఛతి – అధికరణం జానాతి, అధికరణస్స మూలం జానాతి, అధికరణసముదయం జానాతి, అధికరణనిరోధం జానాతి, అధికరణనిరోధగామినిం పటిపదం జానాతి, వత్థుం జానాతి, నిదానం జానాతి, పఞ్ఞత్తిం జానాతి, అనుపఞ్ఞత్తిం జానాతి, అనుసన్ధివచనపథం జానాతి.

అపరేహిపి దసహఙ్గేహి సమన్నాగతో వినయధరో బాలో త్వేవ సఙ్ఖం గచ్ఛతి – ఞత్తిం న జానాతి, ఞత్తియా కరణం న జానాతి, న పుబ్బకుసలో హోతి, న అపరకుసలో హోతి, అకాలఞ్ఞూ చ హోతి, ఆపత్తానాపత్తిం న జానాతి, లహుకగరుకం ఆపత్తిం న జానాతి, సావసేసానవసేసం ఆపత్తిం న జానాతి, దుట్ఠుల్లాదుట్ఠుల్లం ఆపత్తిం న జానాతి, ఆచరియపరమ్పరా ఖో పనస్స న సుగ్గహితా హోతి న సుమనసికతా న సూపధారితా.

దసహఙ్గేహి సమన్నాగతో వినయధరో పణ్డితో త్వేవ సఙ్ఖం గచ్ఛతి – ఞత్తిం జానాతి, ఞత్తియా కరణం జానాతి, పుబ్బకుసలో హోతి, అపరకుసలో హోతి, కాలఞ్ఞూ చ హోతి, ఆపత్తానాపత్తిం జానాతి, లహుకగరుకం ఆపత్తిం జానాతి, సావసేసానవసేసం ఆపత్తిం జానాతి, దుట్ఠుల్లాదుట్ఠుల్లం ఆపత్తిం జానాతి, ఆచరియపరమ్పరా ఖో పనస్స సుగ్గహితా హోతి సుమనసికతా సూపధారితా.

అపరేహిపి దసహఙ్గేహి సమన్నాగతో వినయధరో బాలో త్వేవ సఙ్ఖం గచ్ఛతి – ఆపత్తానాపత్తిం న జానాతి, లహుకగరుకం ఆపత్తిం న జానాతి, సావసేసానవసేసం ఆపత్తిం న జానాతి, దుట్ఠుల్లాదుట్ఠుల్లం ఆపత్తిం న జానాతి, ఉభయాని ఖో పనస్స పాతిమోక్ఖాని విత్థారేన న స్వాగతాని హోన్తి న సువిభత్తాని న సుప్పవత్తీని న సువినిచ్ఛితాని సుత్తసో అనుబ్యఞ్జనసో, ఆపత్తానాపత్తిం న జానాతి, లహుకగరుకం ఆపత్తిం న జానాతి, సావసేసానవసేసం ఆపత్తిం న జానాతి, దుట్ఠుల్లాదుట్ఠుల్లం ఆపత్తిం న జానాతి, అధికరణే చ న వినిచ్ఛయకుసలో హోతి.

దసహఙ్గేహి సమన్నాగతో వినయధరో పణ్డితో త్వేవ సఙ్ఖం గచ్ఛతి – ఆపత్తానాపత్తిం జానాతి, లహుకగరుకం ఆపత్తిం జానాతి, సావసేసానవసేసం ఆపత్తిం జానాతి, దుట్ఠుల్లాదుట్ఠుల్లం ఆపత్తిం జానాతి, ఉభయాని ఖో పనస్స పాతిమోక్ఖాని విత్థారేన స్వాగతాని హోన్తి సువిభత్తాని సుప్పవత్తీని సువినిచ్ఛితాని సుత్తసో అనుబ్యఞ్జనసో, ఆపత్తానాపత్తిం జానాతి, లహుకగరుకం ఆపత్తిం జానాతి, సావసేసానవసేసం ఆపత్తిం జానాతి, దుట్ఠుల్లాదుట్ఠుల్లం ఆపత్తిం జానాతి, అధికరణే చ వినిచ్ఛయకుసలో హోతి.

[అ. ని. ౧౦.౩౩] దసహఙ్గేహి సమన్నాగతో భిక్ఖు ఉబ్బాహికాయ సమ్మన్నితబ్బో. దస అత్థవసే పటిచ్చ తథాగతేన సావకానం సిక్ఖాపదం పఞ్ఞత్తం. దస ఆదీనవా రాజన్తేపురప్పవేసనే. దస దానవత్థూని. దస రతనాని. దసవగ్గో భిక్ఖుసఙ్ఘో. దసవగ్గేన గణేన ఉపసమ్పాదేతబ్బం. దస పంసుకూలాని. దస చీవరధారణా [చీవరధారణాని (స్యా.)]. దసాహపరమం అతిరేకచీవరం ధారేతబ్బం. దస సుక్కాని. దస ఇత్థియో. దస భరియాయో. వేసాలియా దస వత్థూని దీపేన్తి. దస పుగ్గలా అవన్దియా. దస అక్కోసవత్థూని. దసహాకారేహి పేసుఞ్ఞం ఉపసంహరతి. దస సేనాసనాని. దస వరాని యాచింసు. దస అధమ్మికాని పాతిమోక్ఖట్ఠపనాని. దస ధమ్మికాని పాతిమోక్ఖట్ఠపనాని. దసానిసంసా యాగుయా. దస మంసా అకప్పియా. దస పరమాని. దసవస్సేన భిక్ఖునా బ్యత్తేన పటిబలేన పబ్బాజేతబ్బం ఉపసమ్పాదేతబ్బం నిస్సయో దాతబ్బో సామణేరో ఉపట్ఠాపేతబ్బో. దసవస్సాయ భిక్ఖునియా బ్యత్తాయ పటిబలాయ పబ్బాజేతబ్బం ఉపసమ్పాదేతబ్బం నిస్సయో దాతబ్బో సామణేరీ ఉపట్ఠాపేతబ్బా. దసవస్సాయ భిక్ఖునియా బ్యత్తాయ పటిబలాయ వుట్ఠాపనసమ్ముతి సాదితబ్బా. దసవస్సాయ గిహిగతాయ సిక్ఖా దాతబ్బాతి.

దసకం నిట్ఠితం.

తస్సుద్దానం –

ఆఘాతం వినయం వత్థు, మిచ్ఛా సమ్మా చ అన్తగా;

మిచ్ఛత్తా చేవ సమ్మత్తా, అకుసలా కుసలాపి చ.

సలాకా అధమ్మా ధమ్మా, సామణేరా చ నాసనా;

భాసాధికరణఞ్చేవ, ఞత్తిలహుకమేవ చ.

లహుకా గరుకా ఏతే, కణ్హసుక్కా విజానథ;

ఉబ్బాహికా చ సిక్ఖా చ, అన్తేపురే చ వత్థూని.

రతనం దసవగ్గో చ, తథేవ ఉపసమ్పదా;

పంసుకూలధారణా చ, దసాహసుక్కఇత్థియో.

భరియా దస వత్థూని, అవన్దియక్కోసేన చ;

పేసుఞ్ఞఞ్చేవ సేనాని, వరాని చ అధమ్మికా.

ధమ్మికా యాగుమంసా చ, పరమా భిక్ఖు భిక్ఖునీ;

వుట్ఠాపనా గిహిగతా, దసకా సుప్పకాసితాతి.