౧౧. ఏకాదసకవారో

౩౩౧. ఏకాద పుగ్గలా అనుపసమ్పన్నా న ఉపసమ్పాదేతబ్బా, ఉపసమ్పన్నా నాసేతబ్బా. ఏకాదస పాదుకా అకప్పియా. ఏకాదస పత్తా అకప్పియా. ఏకాదస చీవరాని అకప్పియాని. ఏకాదస యావతతియకా. భిక్ఖునీనం ఏకాదస అన్తరాయికా ధమ్మా పుచ్ఛితబ్బా. ఏకాదస చీవరాని అధిట్ఠాతబ్బాని. ఏకాదస చీవరాని న వికప్పేతబ్బాని. ఏకాదసే అరుణుగ్గమనే నిస్సగ్గియం హోతి. ఏకాదస గణ్ఠికా కప్పియా. ఏకాదస విధా [వీథా (స్యా.)] కప్పియా. ఏకాదస పథవీ అకప్పియా. ఏకాదస పథవీ కప్పియా. ఏకాదస నిస్సయపటిప్పస్సద్ధియో. ఏకాదస పుగ్గలా అవన్దియా. ఏకాదస పరమాని. ఏకాదస వరాని యాచింసు. ఏకాదస సీమాదోసా. అక్కోసకపరిభాసకే పుగ్గలే ఏకాదసాదీనవా పాటికఙ్ఖా. [అ. ని. ౧౧.౧౫; మి. ప. ౪.౪.౬] మేత్తాయ చేతోవిముత్తియా ఆసేవితాయ భావితాయ బహులీకతాయ యానీకతాయ వత్థుకతాయ అనుట్ఠితాయ పరిచితాయ సుసమారద్ధాయ ఏకాదసానిసంసా పాటికఙ్ఖా. సుఖం సుపతి, సుఖం పటిబుజ్ఝతి, న పాపకం సుపినం పస్సతి, మనుస్సానం పియో హోతి, అమనుస్సానం పియో హోతి, దేవతా రక్ఖన్తి, నాస్స అగ్గి వా విసం వా సత్థం వా కమతి, తువట్టం చిత్తం సమాధియతి, ముఖవణ్ణో విప్పసీదతి, అసమ్మూళ్హో కాలఙ్కరోతి, ఉత్తరి అప్పటివిజ్ఝన్తో బ్రహ్మలోకూపగో హోతి – మేత్తాయ చేతోవిముత్తియా ఆసేవితాయ భావితాయ బహులీకతాయ యానీకతాయ వత్థుకతాయ అనుట్ఠితాయ పరిచితాయ సుసమారద్ధాయ ఇమే ఏకాదసానిసంసా పాటికఙ్ఖాతి.

ఏకాదసకం నిట్ఠితం.

తస్సుద్దానం –

నాసేతబ్బా పాదుకా చ, పత్తా చ చీవరాని చ;

తతియా పుచ్ఛితబ్బా చ, అధిట్ఠానవికప్పనా.

అరుణా గణ్ఠికా విధా, అకప్పియా చ కప్పియం;

నిస్సయావన్దియా చేవ, పరమాని వరాని చ;

సీమాదోసా చ అక్కోసా, మేత్తాయేకాదసా కతాతి.

ఏకుత్తరికనయో.

తస్సుద్దానం –

ఏకకా చ దుకా చేవ, తికా చ చతుపఞ్చకా;

ఛసత్తట్ఠనవకా చ, దస ఏకాదసాని చ.

హితాయ సబ్బసత్తానం, ఞాతధమ్మేన తాదినా;

ఏకుత్తరికా విమలా, మహావీరేన దేసితాతి.

ఏకుత్తరికనయో నిట్ఠితో.