౮. అట్ఠకవారో

౩౨౮. అట్ఠానిసంసే సమ్పస్సమానేన న సో భిక్ఖు ఆపత్తియా అదస్సనే ఉక్ఖిపితబ్బో. అట్ఠానిసంసే సమ్పస్సమానేన పరేసమ్పి సద్ధాయ సా ఆపత్తి దేసేతబ్బా. అట్ఠ యావతతియకా. అట్ఠహాకారేహి కులాని దూసేతి. అట్ఠ మాతికా చీవరస్స ఉప్పాదాయ. అట్ఠ మాతికా కథినస్స ఉబ్భారాయ. అట్ఠ పానాని. [చూళవ. ౩౪౮; అ. ని. ౮.౭] అట్ఠహి అసద్ధమ్మేహి అభిభూతో పరియాదిన్నచిత్తో దేవదత్తో ఆపాయికో నేరయికో కప్పట్ఠో అతేకిచ్ఛో. అట్ఠ లోకధమ్మా. అట్ఠ గరుధమ్మా. అట్ఠ పాటిదేసనీయా. అట్ఠఙ్గికో ముసావాదో. అట్ఠ ఉపోసథఙ్గాని. అట్ఠ దూతేయ్యఙ్గాని. అట్ఠ తిత్థియవత్తాని. అట్ఠ అచ్ఛరియా అబ్భుతధమ్మా మహాసముద్దే. అట్ఠ అచ్ఛరియా అబ్భుతధమ్మా ఇమస్మిం ధమ్మవినయే. అట్ఠ అనతిరిత్తా. అట్ఠ అతిరిత్తా. అట్ఠమే అరుణుగ్గమనే నిస్సగ్గియం హోతి. అట్ఠ పారాజికా. అట్ఠమం వత్థుం పరిపూరేన్తీ నాసేతబ్బా. అట్ఠమం వత్థుం పరిపూరేన్తియా దేసితాపి అదేసితా హోతి. అట్ఠవాచికా ఉపసమ్పదా. అట్ఠన్నం పచ్చుట్ఠాతబ్బం. అట్ఠన్నం ఆసనం దాతబ్బం. ఉపాసికా అట్ఠ వరాని యాచతి. అట్ఠహఙ్గేహి సమన్నాగతో భిక్ఖు భిక్ఖునోవాదకో సమ్మన్నితబ్బో [సమ్మనితబ్బో (క.)]. అట్ఠానిసంసా వినయధరే. అట్ఠ పరమాని. తస్సపాపియసికకమ్మకతేన భిక్ఖునా అట్ఠసు ధమ్మేసు సమ్మా వత్తితబ్బం. అట్ఠ అధమ్మికాని పాతిమోక్ఖట్ఠపనాని అట్ఠ ధమ్మికాని పాతిమోక్ఖట్ఠపనానీతి.

అట్ఠకం నిట్ఠితం.

తస్సుద్దానం –

న సో భిక్ఖు పరేసమ్పి, యావతతియదూసనా;

మాతికా కథినుబ్భారా, పానా అభిభూతేన చ.

లోకధమ్మా గరుధమ్మా, పాటిదేసనీయా ముసా;

ఉపోసథా చ దూతఙ్గా, తిత్థియా సముద్దేపి చ.

అబ్భుతా అనతిరిత్తం, అతిరిత్తం నిస్సగ్గియం;

పారాజికట్ఠమం వత్థు, అదేసితూపసమ్పదా.

పచ్చుట్ఠానాసనఞ్చేవ, వరం ఓవాదకేన చ;

ఆనిసంసా పరమాని, అట్ఠధమ్మేసు వత్తనా;

అధమ్మికా ధమ్మికా చ, అట్ఠకా సుప్పకాసితాతి.