౩. తికవారో

౩౨౩. అత్థాపత్తి తిట్ఠన్తే భగవతి ఆపజ్జతి, నో పరినిబ్బుతే; అత్థాపత్తి పరినిబ్బుతే భగవతి ఆపజ్జతి, నో తిట్ఠన్తే; అత్థాపత్తి తిట్ఠన్తేపి భగవతి ఆపజ్జతి పరినిబ్బుతేపి. అత్థాపత్తి కాలే ఆపజ్జతి, నో వికాలే; అత్థాపత్తి వికాలే ఆపజ్జతి, నో కాలే; అత్థాపత్తి కాలే చేవ ఆపజ్జతి వికాలే చ. అత్థాపత్తి రత్తిం ఆపజ్జతి, నో దివా; అత్థాపత్తి దివా ఆపజ్జతి, నో రత్తిం; అత్థాపత్తి రత్తిఞ్చేవ ఆపజ్జతి దివా చ. అత్థాపత్తి దసవస్సో ఆపజ్జతి, నో ఊనదసవస్సో; అత్థాపత్తి ఊనదసవస్సో ఆపజ్జతి, నో దసవస్సో; అత్థాపత్తి దసవస్సో చేవ ఆపజ్జతి ఊనదసవస్సో చ. అత్థాపత్తి పఞ్చవస్సో ఆపజ్జతి, నో ఊనపఞ్చవస్సో; అత్థాపత్తి ఊనపఞ్చవస్సో ఆపజ్జతి, నో పఞ్చవస్సో; అత్థాపత్తి పఞ్చవస్సో చేవ ఆపజ్జతి ఊనపఞ్చవస్సో చ. అత్థాపత్తి కుసలచిత్తో ఆపజ్జతి; అత్థాపత్తి అకుసలచిత్తో ఆపజ్జతి; అత్థాపత్తి అబ్యాకతచిత్తో ఆపజ్జతి. అత్థాపత్తి సుఖవేదనాసమఙ్గీ ఆపజ్జతి; అత్థాపత్తి దుక్ఖవేదనాసమఙ్గీ ఆపజ్జతి; అత్థాపత్తి అదుక్ఖమసుఖవేదనాసమఙ్గీ ఆపజ్జతి. తీణి చోదనావత్థూని – దిట్ఠేన, సుతేన, పరిసఙ్కాయ. తయో సలాకగ్గాహా – గుళ్హకో, వివటకో [వివట్టకో (క.)], సకణ్ణజప్పకో. తయో పటిక్ఖేపా – మహిచ్ఛతా, అసన్తుట్ఠితా [అసన్తుట్ఠతా (స్యా.)], అసల్లేఖతా. తయో అనుఞ్ఞాతా – అప్పిచ్ఛతా, సన్తుట్ఠితా, సల్లేఖతా. అపరేపి తయో పటిక్ఖేపా – మహిచ్ఛతా, అసన్తుట్ఠితా, అమత్తఞ్ఞుతా. తయో అనుఞ్ఞాతా – అప్పిచ్ఛతా, సన్తుట్ఠితా, మత్తఞ్ఞుతా. తిస్సో పఞ్ఞత్తియో – పఞ్ఞత్తి, అనుపఞ్ఞత్తి, అనుప్పన్నపఞ్ఞత్తి. అపరాపి తిస్సో పఞ్ఞత్తియో – సబ్బత్థపఞ్ఞత్తి, పదేసపఞ్ఞత్తి, సాధారణపఞ్ఞత్తి. అపరాపి తిస్సో పఞ్ఞత్తియో – అసాధారణపఞ్ఞత్తి, ఏకతోపఞ్ఞత్తి, ఉభతోపఞ్ఞత్తి.

అత్థాపత్తి బాలో ఆపజ్జతి, నో పణ్డితో; అత్థాపత్తి పణ్డితో ఆపజ్జతి, నో బాలో; అత్థాపత్తి బాలో చేవ ఆపజ్జతి పణ్డితో చ. అత్థాపత్తి కాళే ఆపజ్జతి, నో జుణ్హే; అత్థాపత్తి జుణ్హే ఆపజ్జతి, నో కాళే; అత్థాపత్తి కాళే చేవ ఆపజ్జతి జుణ్హే చ. అత్థి కాళే కప్పతి, నో జుణ్హే; అత్థి జుణ్హే కప్పతి, నో కాళే; అత్థి కాళే చేవ కప్పతి జుణ్హే చ. అత్థాపత్తి హేమన్తే ఆపజ్జతి, నో గిమ్హే నో వస్సే; అత్థాపత్తి గిమ్హే ఆపజ్జతి, నో హేమన్తే నో వస్సే; అత్థాపత్తి వస్సే ఆపజ్జతి, నో హేమన్తే నో గిమ్హే. అత్థాపత్తి సఙ్ఘో ఆపజ్జతి, న గణో న పుగ్గలో; అత్థాపత్తి గణో ఆపజ్జతి, న సఙ్ఘో న పుగ్గలో; అత్థాపత్తి పుగ్గలో ఆపజ్జతి, న సఙ్ఘో న గణో. అత్థి సఙ్ఘస్స కప్పతి, న గణస్స న పుగ్గలస్స; అత్థి గణస్స కప్పతి, న సఙ్ఘస్స న పుగ్గలస్స; అత్థి పుగ్గలస్స కప్పతి, న సఙ్ఘస్స న గణస్స. తిస్సో ఛాదనా వత్థుం ఛాదేతి, నో ఆపత్తిం; ఆపత్తిం ఛాదేతి, నో వత్థుం; వత్థుఞ్చేవ ఛాదేతి ఆపత్తిఞ్చ. తిస్సో పటిచ్ఛాదియో – జన్తాఘరపటిచ్ఛాది, ఉదకపటిచ్ఛాది, వత్థపటిచ్ఛాది. [అ. ని. ౩.౧౩౨] తీణి పటిచ్ఛన్నాని వహన్తి, నో వివటాని – మాతుగామో పటిచ్ఛన్నో వహతి, నో వివటో; బ్రాహ్మణానం మన్తా పటిచ్ఛన్నా వహన్తి, నో వివటా; మిచ్ఛాదిట్ఠి పటిచ్ఛన్నా వహతి, నో వివటా. తీణి వివటాని విరోచన్తి, నో పటిచ్ఛన్నాని – చన్దమణ్డలం వివటం విరోచతి, నో పటిచ్ఛన్నం; సూరియమణ్డలం వివటం విరోచతి, నో పటిచ్ఛన్నం; తథాగతప్పవేదితో ధమ్మవినయో వివటో విరోచతి, నో పటిచ్ఛన్నో. తయో సేనాసనగ్గాహా – పురిమకో, పచ్ఛిమకో, అన్తరాముత్తకో. అత్థాపత్తి గిలానో ఆపజ్జతి, నో అగిలానో; అత్థాపత్తి అగిలానో ఆపజ్జతి, నో గిలానో; అత్థాపత్తి గిలానో చేవ ఆపజ్జతి అగిలానో చ.

తీణి అధమ్మికాని పాతిమోక్ఖట్ఠపనాని. తీణి ధమ్మికాని పాతిమోక్ఖట్ఠపనాని. తయో పరివాసా – పటిచ్ఛన్నపరివాసో, అప్పటిచ్ఛన్నపరివాసో, సుద్ధన్తపరివాసో. తయో మానత్తా – పటిచ్ఛన్నమానత్తం, అప్పటిచ్ఛన్నమానత్తం, పక్ఖమానత్తం. తయో పారివాసికస్స భిక్ఖునో రత్తిచ్ఛేదా – సహవాసో, విప్పవాసో, అనారోచనా. అత్థాపత్తి అన్తో ఆపజ్జతి, నో బహి; అత్థాపత్తి బహి ఆపజ్జతి, నో అన్తో; అత్థాపత్తి అన్తో చేవ ఆపజ్జతి బహి చ. అత్థాపత్తి అన్తోసీమాయ ఆపజ్జతి, నో బహిసీమాయ; అత్థాపత్తి బహిసీమాయ ఆపజ్జతి, నో అన్తోసీమాయ; అత్థాపత్తి అన్తోసీమాయ చేవ ఆపజ్జతి బహిసీమాయ చ. తీహాకారేహి ఆపత్తిం ఆపజ్జతి – కాయేన ఆపజ్జతి, వాచాయ ఆపజ్జతి, కాయేన వాచాయ ఆపజ్జతి. అపరేహిపి తీహాకారేహి ఆపత్తిం ఆపజ్జతి – సఙ్ఘమజ్ఝే, గణమజ్ఝే, పుగ్గలస్స సన్తికే. తీహాకారేహి ఆపత్తియా వుట్ఠాతి – కాయేన వుట్ఠాతి, వాచాయ వుట్ఠాతి, కాయేన వాచాయ వుట్ఠాతి. అపరేహిపి తీహాకారేహి ఆపత్తియా వుట్ఠాతి – సఙ్ఘమజ్ఝే, గణమజ్ఝే, పుగ్గలస్స సన్తికే. తీణి అధమ్మికాని అమూళ్హవినయస్స దానాని. తీణి ధమ్మికాని అమూళ్హవినయస్స దానాని.

[చూళవ. ౬] తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో తజ్జనీయకమ్మం కరేయ్య – భణ్డనకారకో హోతి కలహకారకో వివాదకారకో భస్సకారకో సఙ్ఘే అధికరణకారకో, బాలో హోతి అబ్యత్తో, ఆపత్తిబహులో అనపదానో గిహిసంసట్ఠో విహరతి అననులోమికేహి గిహిసంసగ్గేహి. [చూళవ. ౧౫] తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో నియస్సకమ్మం కరేయ్య – భణ్డనకారకో హోతి…పే… సఙ్ఘే అధికరణకారకో, బాలో హోతి అబ్యత్తో, ఆపత్తిబహులో అనపదానో గిహిసంసట్ఠో విహరతి అననులోమికేహి గిహిసంసగ్గేహి. [చూళవ. ౨౭] తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో పబ్బాజనీయకమ్మం కరేయ్య – భణ్డనకారకో హోతి…పే… సఙ్ఘే అధికరణకారకో, బాలో హోతి అబ్యత్తో, ఆపత్తిబహులో అనపదానో కులదూకకో హోతి పాపసమాచారో పాపసమాచారా దిస్సన్తి చేవ సుయ్యన్తి చ. తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో పటిసారణీయకమ్మం కరేయ్య – భణ్డనకారకో హోతి…పే… సఙ్ఘే అధికరణకారకో, బాలో హోతి అబ్యత్తో, ఆపత్తి బహులో అనపదానో గిహీ అక్కోసతి పరిభాసతి. [చూళవ. ౫౦] తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో ఆపత్తియా అదస్సనే ఉక్ఖేపనీయకమ్మం కరేయ్య – భణ్డనకారకో హోతి…పే… సఙ్ఘే అధికరణకారకో, బాలో హోతి అబ్యత్తో, ఆపత్తిబహులో అనపదానో ఆపత్తిం ఆపజ్జిత్వా న ఇచ్ఛతి ఆపత్తిం పస్సితుం. [చూళవ. ౫౯] తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో ఆపత్తియా అప్పటికమ్మే ఉక్ఖేపనీయకమ్మం కరేయ్య – భణ్డనకారకో హోతి…పే… సఙ్ఘే అధికరణకారకో, బాలో హోతి అబ్యత్తో, ఆపత్తిబహులో అనపదానో ఆపత్తిం ఆపజ్జిత్వా న ఇచ్ఛతి ఆపత్తిం పటికాతుం. [చూళవ. ౬౯] తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో పాపికాయ దిట్ఠియా అప్పటినిస్సగ్గే ఉక్ఖేపనీయకమ్మం కరేయ్య – భణ్డనకారకో హోతి…పే… సఙ్ఘే అధికరణకారకో, బాలో హోతి అబ్యత్తో, ఆపత్తిబహులో అనపదానో న ఇచ్ఛతి పాపికం దిట్ఠిం పటినిస్సజ్జితుం.

తీహఙ్గేహి సమన్నాగతస్స భిక్ఖునో ఆకఙ్ఖమానో సఙ్ఘో ఆగాళ్హాయ చేతేయ్య – భణ్డనకారకో హోతి కలహకారకో వివాదకారకో భస్సకారకో సఙ్ఘే అధికరణకారకో, బాలో హోతి అబ్యత్తో ఆపత్తిబహులో అనపదానో, గిహిసంసట్ఠో విహరతి అననులోమికేహి గిహిసంసగ్గేహి. తీహఙ్గేహి సమన్నాగతస్స భిక్ఖునో కమ్మం కాతబ్బం – అలజ్జీ చ హోతి, బాలో చ, అపకతత్తో చ. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – అధిసీలే సీలవిపన్నో హోతి, అజ్ఝాచారే ఆచారవిపన్నో హోతి, అతిదిట్ఠియా దిట్ఠివిపన్నో హోతి. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – కాయికేన దవేన సమన్నాగతో హోతి, వాచసికేన దవేన సమన్నాగతో హోతి, కాయికవాచసికేన దవేన సమన్నాగతో హోతి. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – కాయికేన అనాచారేన సమన్నాగతో హోతి, వాచసికేన అనాచారేన సమన్నాగతో హోతి, కాయికవాచసికేన అనాచారేన సమన్నాగతో హోతి. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – కాయికేన ఉపఘాతికేన సమన్నాగతో హోతి, వాచసికేన ఉపఘాతికేన సమన్నాగతో హోతి, కాయికవాచసికేన ఉపఘాతికేన సమన్నాగతో హోతి. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – కాయికేన మిచ్ఛాజీవేన సమన్నాగతో హోతి, వాచసికేన మిచ్ఛాజీవేన సమన్నాగతో హోతి, కాయికవాచసికేన మిచ్ఛాజీవేన సమన్నాగతో హోతి. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – ఆపత్తిం ఆపన్నో కమ్మకతో ఉపసమ్పాదేతి, నిస్సయం దేతి, సామణేరం ఉపట్ఠాపేతి. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – యాయ ఆపత్తియా సఙ్ఘేన కమ్మం కతం హోతి తం ఆపత్తిం ఆపజ్జతి, అఞ్ఞం వా తాదిసికం, తతో వా పాపిట్ఠతరం. అపరేహిపి తీహఙ్గేహి సమన్నాగతస్స భిక్ఖునో కమ్మం కాతబ్బం – బుద్ధస్స అవణ్ణం భాసతి, ధమ్మస్స అవణ్ణం భాసతి, సఙ్ఘస్స అవణ్ణం భాసతి.

తీహఙ్గేహి సమన్నాగతస్స భిక్ఖునో సఙ్ఘమజ్ఝే ఉపోసథం ఠపేన్తస్స – ‘‘అలం, భిక్ఖు, మా భణ్డనం మా కలహం మా విగ్గహం మా వివాద’’న్తి ఓమద్దిత్వా సఙ్ఘేన ఉపోసథో కాతబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో సఙ్ఘమజ్ఝే పవారణం ఠపేన్తస్స – ‘‘అలం, భిక్ఖు, మా భణ్డనం మా కలహం మా విగ్గహం మా వివాద’’న్తి ఓమద్దిత్వా సఙ్ఘేన పవారేతబ్బం – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో న కాచి సఙ్ఘసమ్ముతి దాతబ్బా – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతేన భిక్ఖునా సఙ్ఘే న వోహరితబ్బం [సంఘో న వోహరితబ్బో (స్యా.)] – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతో భిక్ఖు న కిస్మిం చి పచ్చేకట్ఠానే ఠపేతబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో నిస్సాయ న వత్థబ్బం – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో నిస్సయో న దాతబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో ఓకాసకమ్మం కారాపేన్తస్స నాలం ఓకాసకమ్మం కాతుం – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో సవచనీయం నాదాతబ్బం – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో వినయో న పుచ్ఛితబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతేన భిక్ఖునా వినయో న పుచ్ఛితబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో వినయో న విస్సజ్జేతబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతేన భిక్ఖునా వినయో న విస్సజ్జేతబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతస్స భిక్ఖునో అనుయోగో న దాతబ్బో – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతేన భిక్ఖునా సద్ధిం వినయో న సాకచ్ఛితబ్బో [సాకచ్ఛాతబ్బో (క.)] – అలజ్జీ చ హోతి, బాలో చ, అపకతత్తో చ. తీహఙ్గేహి సమన్నాగతేన భిక్ఖునా న ఉపసమ్పాదేతబ్బం న నిస్సయో దాతబ్బో న సామణేరో ఉపట్ఠాపేతబ్బో – అలజ్జీ చ హోతి, బాలో చ, అపకతత్తో చ.

తయో ఉపోసథా – చాతుద్దసికో, పన్నరసికో, సామగ్గిఉపోసథో. అపరేపి తయో ఉపోసథా – సఙ్ఘేఉపోసథో, గణేఉపోసథో, పుగ్గలేఉపోసథో. అపరేపి తయో ఉపోసథా – సుత్తుద్దేసోఉపోసథో, పారిసుద్ధిఉపోసథో, అధిట్ఠానుపోసథో. తిస్సో పవారణా – చాతుద్దసికా, పన్నరసికా, సామగ్గిపవారణా. అపరాపి తిస్సో పవారణా – సఙ్ఘేపవారణా, గణేపవారణా, పుగ్గలేపవారణా. అపరాపి తిస్సో పవారణా – తేవాచికాపవారణా, ద్వేవాచికాపవారణా, సమానవస్సికాపవారణా.

తయో ఆపాయికా నేరయికా – ఇదమప్పహాయ, యో చ అబ్రహ్మచారీ బ్రహ్మచారిపటిఞ్ఞో, యో చ సుద్ధం బ్రహ్మచారిం పరిసుద్ధబ్రహ్మచరియం చరన్తం అమూలకేన అబ్రహ్మచరియేన అనుద్ధంసేతి, యో చాయం ఏవంవాదీ ఏవందిట్ఠి [ఏవందిట్ఠీ (సీ.)] – ‘‘నత్థి కామేసు దోసో’’తి సో కామేసు పాతబ్యతం ఆపజ్జతి. [అ. ని. ౩.౭౦] తీణి అకుసలమూలాని – లోభో అకుసలమూలం, దోసో అకుసలమూలం, మోహో అకుసలమూలం. [అ. ని. ౩.౭౦] తీణి కుసలమూలాని – అలోభో కుసలమూలం, అదోసో కుసలమూలం, అమోహో కుసలమూలం. తీణి దుచ్చరితాని – కాయదుచ్చరితం, వచీదుచ్చరితం, మనోదుచ్చరితం. తీణి సుచరితాని – కాయసుచరితం, వచీసుచరితం, మనోసుచరితం. తయో అత్థవసే పటిచ్చ భగవతా కులేసు తికభోజనం పఞ్ఞత్తం – దుమ్మఙ్కూనం పుగ్గలానం నిగ్గహాయ, పేసలానం భిక్ఖూనం ఫాసువిహారాయ, ‘‘మా పాపిచ్ఛా పక్ఖం నిస్సాయ సఙ్ఘం భిన్దేయ్యు’’న్తి కులానుద్దయతాయ చ. [చూళవ. ౩౫౦] తీహి అసద్ధమ్మేహి అభిభూతో పరియాదిన్నచిత్తో దేవదత్తో ఆపాయికో నేరయికో కప్పట్ఠో అతేకిచ్ఛో పాపిచ్ఛతా పాపమిత్తతా ఓరమత్తకేన విసేసాధిగమేన అన్తరా వోసానం ఆపాది. తిస్సో సమ్ముతియో – దణ్డసమ్ముతి, సిక్కాసమ్ముతి, దణ్డసిక్కాసమ్ముతి. తిస్సో పాదుకా ధువట్ఠానికా అసఙ్కమనీయా – వచ్చపాదుకా, పస్సావపాదుకా, ఆచమనపాదుకా. తిస్సో పాదఘంసనియో – సక్ఖరం, కథలా, సముద్దఫేణకోతి.

తికం నిట్ఠితం.

తస్సుద్దానం –

తిట్ఠన్తే కాలే రత్తిఞ్చ, దస పఞ్చ కుసలేన;

వేదనా చోదనా వత్థు, సలాకా ద్వే పటిక్ఖిపా.

పఞ్ఞత్తి అపరే ద్వే చ, బాలో కాళే చ కప్పతి;

హేమన్తే సఙ్ఘో సఙ్ఘస్స, ఛాదనా చ పటిచ్ఛాది.

పటిచ్ఛన్నా వివటా చ, సేనాసనగిలాయనా;

పాతిమోక్ఖం పరివాసం, మానత్తా పారివాసికా.

అన్తో అన్తో చ సీమాయ, ఆపజ్జతి పునాపరే;

వుట్ఠాతి అపరే చేవ, అమూళ్హవినయా దువే.

తజ్జనీయా నియస్సా చ, పబ్బాజపటిసారణీ;

అదస్సనా పటికమ్మే, అనిస్సగ్గే చ దిట్ఠియా.

ఆగాళ్హకమ్మాధిసీలే, దవానాచార ఘాతికా;

ఆజీవాపన్నా తాదిసికా, అవణ్ణుపోసథేన చ.

పవారణా సమ్ముతి చ, వోహారపచ్చేకేన చ;

న వత్థబ్బం న దాతబ్బం, ఓకాసం న కరే తథా.

న కరే సవచనీయం, న పుచ్ఛితబ్బకా దువే;

న విస్సజ్జే దువే చేవ, అనుయోగమ్పి నో దదే.

సాకచ్ఛా ఉపసమ్పదా, నిస్సయసామణేరా చ;

ఉపోసథతికా తీణి, పవారణతికా తయో.

ఆపాయికా అకుసలా, కుసలా చరితా దువే;

తికభోజనసద్ధమ్మే, సమ్ముతి పాదుకేన చ;

పాదఘంసనికా చేవ, ఉద్దానం తికకే ఇదన్తి.