౮. తబ్భాగియవారో

౨౯౮. కతి సమథా వివాదాధికరణస్స తబ్భాగియా? కతి సమథా వివాదాధికరణస్స అఞ్ఞభాగియా? కతి సమథా అనువాదాధికరణస్స తబ్భాగియా? కతి సమథా అనువాదాధికరణస్స అఞ్ఞభాగియా? కతి సమథా ఆపత్తాధికరణస్స తబ్భాగియా? కతి సమథా ఆపత్తాధికరణస్స అఞ్ఞభాగియా? కతి సమథా కిచ్చాధికరణస్స తబ్భాగియా? కతి సమథా కిచ్చాధికరణస్స అఞ్ఞభాగియా?

ద్వే సమథా వివాదాధికరణస్స తబ్భాగియా – సమ్ముఖావినయో, యేభుయ్యసికా. పఞ్చ సమథా వివాదాధికరణస్స అఞ్ఞభాగియా – సతివినయో, అమూళ్హవినయో, పటిఞ్ఞాతకరణం, తస్సపాపియసికా, తిణవత్థారకో.

చత్తారో సమథా అనువాదాధికరణస్స తబ్భాగియా – సమ్ముఖావినయో, సతివినయో, అమూళ్హవినయో, తస్సపాపియసికా. తయో సమథా అనువాదాధికరణస్స అఞ్ఞభాగియా – యేభుయ్యసికా, పటిఞ్ఞాతకరణం, తిణవత్థారకో.

తయో సమథా ఆపత్తాధికరణస్స తబ్భాగియా – సమ్ముఖావినయో, పటిఞ్ఞాతకరణం, తిణవత్థారకో. చత్తారో సమథా ఆపత్తాధికరణస్స అఞ్ఞభాగియా – యేభుయ్యసికా, సతివినయో, అమూళ్హవినయో, తస్సపాపియసికా.

ఏకో సమథో కిచ్చాధికరణస్స తబ్భాగియో – సమ్ముఖావినయో. ఛ సమథా కిచ్చాధికరణస్స అఞ్ఞభాగియా – యేభుయ్యసికా, సతివినయో, అమూళ్హవినయో, పటిఞ్ఞాతకరణం, తస్సపాపియసికా, తిణవత్థారకో.

తబ్భాగియవారో నిట్ఠితో అట్ఠమో.