౯. సమథా సమథస్స సాధారణవారో

౨౯౯. సమథా సమథస్స సాధారణా, సమథా సమథస్స అసాధారణా. సియా సమథా సమథస్స సాధారణా, సియా సమథా సమథస్స అసాధారణా.

కథం సియా సమథా సమథస్స సాధారణా? కథం సియా సమథా సమథస్స అసాధారణా? యేభుయ్యసికా సమ్ముఖావినయస్స సాధారణా, సతివినయస్స అమూళ్హవినయస్స పటిఞ్ఞాతకరణస్స తస్సపాపియసికాయ తిణవత్థారకస్స అసాధారణా.

సతివినయో సమ్ముఖావినయస్స సాధారణో, అమూళ్హవినయస్స పటిఞ్ఞాతకరణస్స తస్సపాపియసికాయ తిణవత్థారకస్స యేభుయ్యసికాయ అసాధారణో.

అమూళ్హవినయో సమ్ముఖావినయస్స సాధారణో, పటిఞ్ఞాతకరణస్స తస్సపాపియసికాయ తిణవత్థారకస్స యేభుయ్యసికాయ సతివినయస్స అసాధారణో.

పటిఞ్ఞాతకరణం సమ్ముఖావినయస్స సాధారణం, తస్సపాపియసికాయ తిణవత్థారకస్స యేభుయ్యసికాయ సతివినయస్స అమూళ్హవినయస్స అసాధారణం.

తస్సపాపియసికా సమ్ముఖావినయస్స సాధారణా, తిణవత్థారకస్స యేభుయ్యసికాయ సతివినయస్స అమూళ్హవినయస్స పటిఞ్ఞాతకరణస్స అసాధారణా.

తిణవత్థారకో సమ్ముఖావినయస్స సాధారణో, యేభుయ్యసికాయ సతివినయస్స అమూళ్హవినయస్స పటిఞ్ఞాతకరణస్స తస్సపాపియసికాయ అసాధారణో. ఏవం సియా సమథా సమథస్స సాధారణా; ఏవం సియా సమథా సమథస్స అసాధారణా.

సమథా సమథస్స సాధారణవారో నిట్ఠితో నవమో.