౨౦. సముట్ఠాపనవారో

౩౧౪. వివాదాధికరణం చతున్నం అధికరణానం కతమం అధికరణం సముట్ఠాపేతి? వివాదాధికరణం చతున్నం అధికరణానం న కతమం అధికరణం సముట్ఠాపేతి; అపిచ, వివాదాధికరణపచ్చయా చత్తారో అధికరణా జాయన్తి. యథా కథం వియ? [చూళవ. ౨౧౫; పరి. ౩౪౮ ఆదయో] ఇధ భిక్ఖూ వివదన్తి – ‘‘ధమ్మోతి వా, అధమ్మోతి వా, వినయోతి వా, అవినయోతి వా, అభాసితం అలపితం తథాగతేనాతి వా, భాసితం లపితం తథాగతేనాతి వా, అనాచిణ్ణం తథాగతేనాతి వా, ఆచిణ్ణం తథాగతేనాతి వా, అపఞ్ఞత్తం తథాగతేనాతి వా, పఞ్ఞత్తం తథాగతేనాతి వా, ఆపత్తీతి వా, అనాపత్తీతి వా, లహుకా ఆపత్తీతి వా, గరుకా ఆపత్తీతి వా, సావసేసా ఆపత్తీతి వా, అనవసేసా ఆపత్తీతి వా, దుట్ఠుల్లా ఆపత్తీతి వా అదుట్ఠుల్లా ఆపత్తీతి వా’’. యం తత్థ భణ్డనం కలహో విగ్గహో వివాదో నానావాదో అఞ్ఞథావాదో విపచ్చతాయ వోహారో మేధకం [మేధగం (క.)], ఇదం వుచ్చతి వివాదాధికరణం. వివాదాధికరణే సఙ్ఘో వివదతి. వివాదాధికరణం వివదమానో అనువదతి. అనువాదాధికరణం అనువదమానో ఆపత్తిం ఆపజ్జతి ఆపత్తాధికరణం. తాయ ఆపత్తియా సఙ్ఘో కమ్మం కరోతి కిచ్చాధికరణం. ఏవం వివాదాధికరణపచ్చయా చత్తారో అధికరణా జాయన్తి.

౩౧౫. అనువాదాధికరణం చతున్నం అధికరణానం కతమం అధికరణం సముట్ఠాపేతి? అనువాదాధికరణం చతున్నం అధికరణానం న కతమం అధికరణం సముట్ఠాపేతి; అపిచ, అనువాదాధికరణపచ్చయా చత్తారో అధికరణా జాయన్తి. యథా కథం వియ? [చూళవ. ౨౧౫; పరి. ౩౪౮ ఆదయో] ఇధ భిక్ఖూ భిక్ఖుం అనువదన్తి సీలవిపత్తియా వా ఆచారవిపత్తియా వా దిట్ఠివిపత్తియా వా ఆజీవవిపత్తియా వా. యో తత్థ అనువాదో అనువదనా అనుల్లపనా అనుభణనా అనుసమ్పవఙ్కతా అబ్భుస్సహనతా అనుబలప్పదానం, ఇదం వుచ్చతి అనువాదాధికరణం. అనువాదాధికరణే సఙ్ఘో వివదతి. వివాదాధికరణం వివదమానో అనువదతి. అనువాదాధికరణం అనువదమానో ఆపత్తిం ఆపజ్జతి ఆపత్తాధికరణం. తాయ ఆపత్తియా సఙ్ఘో కమ్మం కరోతి కిచ్చాధికరణం. ఏవం అనువాదాధికరణపచ్చయా చత్తారో అధికరణా జాయన్తి.

౩౧౬. ఆపత్తాధికరణం చతున్నం అధికరణానం కతమం అధికరణం సముట్ఠాపేతి? ఆపత్తాధికరణం చతున్నం అధికరణానం న కతమం అధికరణం సముట్ఠాపేతి; అపిచ, ఆపత్తాధికరణపచ్చయా చత్తారో అధికరణా జాయన్తి. యథా కథం వియ? పఞ్చపి ఆపత్తిక్ఖన్ధా ఆపత్తాధికరణం, సత్తపి ఆపత్తిక్ఖన్ధా ఆపత్తాధికరణం, ఇదం వుచ్చతి ఆపత్తాధికరణం. ఆపత్తాధికరణే సఙ్ఘో వివదతి. వివాదాధికరణం వివదమానో అనువదతి. అనువాదాధికరణం అనువదమానో ఆపత్తిం ఆపజ్జతి ఆపత్తాధికరణం. తాయ ఆపత్తియా సఙ్ఘో కమ్మం కరోతి కిచ్చాధికరణం. ఏవం ఆపత్తాధికరణపచ్చయా చత్తారో అధికరణా జాయన్తి.

౩౧౭. కిచ్చాధికరణం చతున్నం అధికరణానం కతమం అధికరణం సముట్ఠాపేతి? కిచ్చాధికరణం చతున్నం అధికరణానం న కతమం అధికరణం సముట్ఠాపేతి, అపిచ కిచ్చాధికరణపచ్చయా చత్తారో అధికరణా జాయన్తి. యథా కథం వియ? యా సఙ్ఘస్స కిచ్చయతా కరణీయతా అపలోకనకమ్మం ఞత్తికమ్మం ఞత్తిదుతియకమ్మం ఞత్తిచతుత్థకమ్మం, ఇదం వుచ్చతి కిచ్చాధికరణం. కిచ్చాధికరణే సఙ్ఘో వివదతి. వివాదాధికరణం వివదమానో అనువదతి. అనువాదాధికరణం అనువదమానో ఆపత్తిం ఆపజ్జతి ఆపత్తాధికరణం. తాయ ఆపత్తియా సఙ్ఘో కమ్మం కరోతి కిచ్చాధికరణం. ఏవం కిచ్చాధికరణపచ్చయా చత్తారో అధికరణా జాయన్తి.

సముట్ఠాపనవారో నిట్ఠితో వీసతిమో.