౨౧. భజతివారో

౩౧౮. వివాదాధికరణం చతున్నం అధికరణానం కతమం అధికరణం భజతి? కతమం అధికరణం ఉపనిస్సితం? కతమం అధికరణం పరియాపన్నం? కతమేన అధికరణేన సఙ్గహితం?

అనువాదాధికరణం చతున్నం అధికరణానం కతమం అధికరణం భజతి? కతమం అధికరణం ఉపనిస్సితం? కతమం అధికరణం పరియాపన్నం? కతమేన అధికరణేన సఙ్గహితం?

ఆపత్తాధికరణం చతున్నం అధికరణానం కతమం అధికరణం భజతి? కతమం అధికరణం ఉపనిస్సితం? కతమం అధికరణం పరియాపన్నం? కతమేన అధికరణేన సఙ్గహితం?

కిచ్చాధికరణం చతున్నం అధికరణానం కతమం అధికరణం భజతి? కతమం అధికరణం ఉపనిస్సితం? కతమం అధికరణం పరియాపన్నం? కతమేన అధికరణేన సఙ్గహితం?

వివాదాధికరణం చతున్నం అధికరణానం వివాదాధికరణం భజతి, వివాదాధికరణం ఉపనిస్సితం, వివాదాధికరణం పరియాపన్నం, వివాదాధికరణేన సఙ్గహితం.

అనువాదాధికరణం చతున్నం అధికరణానం అనువాదాధికరణం భజతి, అనువాదాధికరణం ఉపనిస్సితం, అనువాదాధికరణం పరియాపన్నం, అనువాదాధికరణేన సఙ్గహితం.

ఆపత్తాధికరణం చతున్నం అధికరణానం ఆపత్తాధికరణం భజతి, ఆపత్తాధికరణం ఉపనిస్సితం, ఆపత్తాధికరణం పరియాపన్నం, ఆపత్తాధికరణేన సఙ్గహితం.

కిచ్చాధికరణం చతున్నం అధికరణానం కిచ్చాధికరణం భజతి, కిచ్చాధికరణం ఉపనిస్సితం, కిచ్చాధికరణం పరియాపన్నం, కిచ్చాధికరణేన సఙ్గహితం.

౩౧౯. వివాదాధికరణం సత్తన్నం సమథానం కతి సమథే భజతి, కతి సమథే ఉపనిస్సితం, కతి సమథే పరియాపన్నం, కతిహి సమథేహి సఙ్గహితం, కతిహి సమథేహి సమ్మతి?

అనువాదాధికరణం సత్తన్నం సమథానం కతి సమథే భజతి, కతి సమథే ఉపనిస్సితం, కతి సమథే పరియాపన్నం, కతిహి సమథేహి సఙ్గహితం, కతిహి సమథేహి సమ్మతి?

ఆపత్తాధికరణం సత్తన్నం సమథానం కతి సమథే భజతి, కతి సమథే ఉపనిస్సితం, కతి సమథే పరియాపన్నం, కతిహి సమథేహి సఙ్గహితం, కతిహి సమథేహి సమ్మతి?

కిచ్చాధికరణం సత్తన్నం సమథానం కతి సమథే భజతి, కతి సమథే ఉపనిస్సితం, కతి సమథే పరియాపన్నం, కతిహి సమథేహి సఙ్గహితం, కతిహి సమథేహి సమ్మతి?

వివాదాధికరణం సత్తన్నం సమథానం ద్వే సమథే భజతి, ద్వే సమథే ఉపనిస్సితం, ద్వే సమథే పరియాపన్నం, ద్వీహి సమథేహి సఙ్గహితం, ద్వీహి సమథేహి సమ్మతి – సమ్ముఖావినయేన చ యేభుయ్యసికాయ చ.

అనువాదాధికరణం సత్తన్నం సమథానం చత్తారో సమథే భజతి, చత్తారో సమథే ఉపనిస్సితం, చత్తారో సమథే పరియాపన్నం, చతూహి సమథేహి సఙ్గహితం, చతూహి సమథేహి సమ్మతి – సమ్ముఖావినయేన చ సతివినయేన చ అమూళ్హవినయేన చ తస్సపాపియసికాయ చ.

ఆపత్తాధికరణం సత్తన్నం సమథానం తయో సమథే భజతి, తయో సమథే ఉపనిస్సితం, తయో సమథే పరియాపన్నం, తీహి సమథేహి సఙ్గహితం తీహి సమథేహి సమ్మతి – సమ్ముఖావినయేన చ పటిఞ్ఞాతకరణేన తిణవత్థారకేన చ.

కిచ్చాధికరణం సత్తన్నం సమథానం ఏకం సమథం భజతి, ఏకం సమథం ఉపనిస్సితం, ఏకం సమథం పరియాపన్నం, ఏకేన సమథేన సఙ్గహితం, ఏకేన సమథేన సమ్మతి – సమ్ముఖావినయేనాతి.

భజతివారో నిట్ఠితో ఏకవీసతిమో.

సమథభేదో నిట్ఠితో.

తస్సుద్దానం –

అధికరణం పరియాయం, సాధారణా చ భాగియా;

సమథా సాధారణికా, సమథస్స తబ్భాగియా.

సమథా సమ్ముఖా చేవ, వినయేన కుసలేన చ;

యత్థ సమథసంసట్ఠా, సమ్మన్తి న సమ్మన్తి చ.

సమథాధికరణఞ్చేవ, సముట్ఠానం భజన్తి చాతి.