౧౬. సంసట్ఠవారో

౩౦౬. అధికరణన్తి వా సమథాతి వా ఇమే ధమ్మా సంసట్ఠా ఉదాహు విసంసట్ఠా? లబ్భా చ పనిమేసం ధమ్మానం వినిబ్భుజిత్వా వినిబ్భుజిత్వా [వినిబ్భుజ్జిత్వా వినిబ్భుజ్జిత్వా (క.), టీకాయం ఏకపదమేవ దిస్సతి] నానాకరణం పఞ్ఞాపేతున్తి?

అధికరణన్తి వా సమథాతి వా ఇమే ధమ్మా విసంసట్ఠా, నో సంసట్ఠా. లబ్భా చ పనిమేసం ధమ్మానం వినిబ్భుజిత్వా వినిబ్భుజిత్వా నానాకరణం పఞ్ఞాపేతున్తి. సో – ‘‘మా హేవ’’న్తిస్స వచనీయో. అధికరణన్తి వా సమథాతి వా ఇమే ధమ్మా సంసట్ఠా, నో విసంసట్ఠా. నో చ లబ్భా [న చ లబ్భా (క.)] ఇమేసం ధమ్మానం వినిబ్భుజిత్వా వినిబ్భుజిత్వా నానాకరణం పఞ్ఞాపేతుం. తం కిస్స హేతు? నను వుత్తం భగవతా – ‘‘చత్తారిమాని, భిక్ఖవే, అధికరణాని, సత్త సమథా. అధికరణా సమథేహి సమ్మన్తి, సమథా అధికరణేహి సమ్మన్తి. ఏవం, ఇమే ధమ్మా సంసట్ఠా నో విసంసట్ఠా; నో చ లబ్భా ఇమేసం ధమ్మానం వినిబ్భుజిత్వా వినిబ్భుజిత్వా నానాకరణం పఞ్ఞాపేతు’’న్తి.

సంసట్ఠవారో నిట్ఠితో సోళసమో.