౧౭. సమ్మతివారో

౩౦౭. వివాదాధికరణం కతిహి సమథేహి సమ్మతి? అనువాదాధికరణం కతిహి సమథేహి సమ్మతి? ఆపత్తాధికరణం కతిహి సమథేహి సమ్మతి? కిచ్చాధికరణం కతిహి సమథేహి సమ్మతి?

[చూళవ. ౨౨౮, ౨౩౬ ఆదయో] వివాదాధికరణం ద్వీహి సమథేహి సమ్మతి – సమ్ముఖావినయేన చ యేభుయ్యసికాయ చ.

[చూళవ. ౨౨౮, ౨౩౬ ఆదయో] అనువాదాధికరణం చతూహి సమథేహి సమ్మతి – సమ్ముఖావినయేన చ సతివినయేన చ అమూళ్హవినయేన చ తస్సపాపియసికాయ చ.

[చూళవ. ౨౩౯, ౨౪౨ ఆదయో] ఆపత్తాధికరణం తీహి సమథేహి సమ్మతి – సమ్ముఖావినయేన చ పటిఞ్ఞాతకరణేన చ తిణవత్థారకేన చ.

[చూళవ. ౨౩౯, ౨౪౨ ఆదయో] కిచ్చాధికరణం ఏకేన సమథేన సమ్మతి – సమ్ముఖావినయేన.

వివాదాధికరణఞ్చ అనువాదాధికరణఞ్చ కతిహి సమథేహి సమ్మన్తి? వివాదాధికరణఞ్చ అనువాదాధికరణఞ్చ పఞ్చహి సమథేహి సమ్మన్తి – సమ్ముఖావినయేన చ యేభుయ్యసికాయ చ సతివినయేన చ అమూళ్హవినయేన చ తస్సపాపియసికాయ చ.

వివాదాధికరణఞ్చ ఆపత్తాధికరణఞ్చ కతిహి సమథేహి సమ్మన్తి? వివాదాధికరణఞ్చ ఆపత్తాధికరణఞ్చ చతూహి సమథేహి సమ్మన్తి – సమ్ముఖావినయేన చ యేభుయ్యసికాయ చ పటిఞ్ఞాతకరణేన చ తిణవత్థారకేన చ.

వివాదాధికరణఞ్చ కిచ్చాధికరణఞ్చ కతిహి సమథేహి సమ్మన్తి? వివాదాధికరణఞ్చ కిచ్చాధికరణఞ్చ ద్వీహి సమథేహి సమ్మన్తి – సమ్ముఖావినయేన చ యేభుయ్యసికాయ చ.

అనువాదాధికరణఞ్చ ఆపత్తాధికరణఞ్చ కతిహి సమథేహి సమ్మన్తి? అనువాదాధికరణఞ్చ ఆపత్తాధికరణఞ్చ ఛహి సమథేహి సమ్మన్తి – సమ్ముఖావినయేన చ సతివినయేన చ అమూళ్హవినయేన చ పటిఞ్ఞాతకరణేన చ తస్సపాపియసికాయ చ తిణవత్థారకేన చ.

అనువాదాధికరణఞ్చ కిచ్చాధికరణఞ్చ కతిహి సమథేహి సమ్మన్తి? అనువాదాధికరణఞ్చ కిచ్చాధికరణఞ్చ చతూహి సమథేహి సమ్మన్తి – సమ్ముఖావినయేన చ సతివినయేన చ అమూళ్హవినయేన చ తస్సపాపియసికాయ చ.

ఆపత్తాధికరణఞ్చ కిచ్చాధికరణఞ్చ కతిహి సమథేహి సమ్మన్తి? ఆపత్తాధికరణఞ్చ కిచ్చాధికరణఞ్చ తీహి సమథేహి సమ్మన్తి – సమ్ముఖావినయేన చ పటిఞ్ఞాతకరణేన చ తిణవత్థారకేన చ.

వివాదాధికరణఞ్చ అనువాదాధికరణఞ్చ ఆపత్తాధికరణఞ్చ కతిహి సమథేహి సమ్మన్తి? వివాదాధికరణఞ్చ అనువాదాధికరణఞ్చ ఆపత్తాధికరణఞ్చ సత్తహి సమథేహి సమ్మన్తి – సమ్ముఖావినయేన చ యేభుయ్యసికాయ చ సతివినయేన చ అమూళ్హవినయేన చ పటిఞ్ఞాతకరణేన చ తస్సపాపియసికాయ చ తిణవత్థారకేన చ.

వివాదాధికరణఞ్చ అనువాదాధికరణఞ్చ కిచ్చాధికరణఞ్చ కతిహి సమథేహి సమ్మన్తి? వివాదాధికరణఞ్చ అనువాదాధికరణఞ్చ కిచ్చాధికరణఞ్చ పఞ్చహి సమథేహి సమ్మన్తి – సమ్ముఖావినయేన చ యేభుయ్యసికాయ చ సతివినయేన చ అమూళ్హవినయేన చ తస్సపాపియసికాయ చ.

అనువాదాధికరణఞ్చ ఆపత్తాధికరణఞ్చ కిచ్చాధికరణఞ్చ కతిహి సమథేహి సమ్మన్తి? అనువాదాధికరణఞ్చ ఆపత్తాధికరణఞ్చ కిచ్చాధికరణఞ్చ ఛహి సమథేహి సమ్మన్తి – సమ్ముఖావినయేన చ సతివినయేన చ అమూళ్హవినయేన చ పటిఞ్ఞాతకరణేన చ తస్సపాపియసికాయ చ తిణవత్థారకేన చ.

వివాదాధికరణఞ్చ అనువాదాధికరణఞ్చ ఆపత్తాధికరణఞ్చ కిచ్చాధికరణఞ్చ కతిహి సమథేహి సమ్మన్తి? వివాదాధికరణఞ్చ అనువాదాధికరణఞ్చ ఆపత్తాధికరణఞ్చ కిచ్చాధికరణఞ్చ సత్తహి సమథేహి సమ్మన్తి – సమ్ముఖావినయేన చ యేభుయ్యసికాయ చ సతివినయేన చ అమూళ్హవినయేన చ పటిఞ్ఞాతకరణేన చ తస్సపాపియసికాయ చ తిణవత్థారకేన చ.

సమ్మతివారో నిట్ఠితో సత్తరసమో.