౧౨. వినయవారో

౩౦౨. వినయో సమ్ముఖావినయో, సమ్ముఖావినయో వినయో? వినయో యేభుయ్యసికా, యేభుయ్యసికా వినయో? వినయో సతివినయో, సతివినయో వినయో? వినయో అమూళ్హవినయో, అమూళ్హవినయో వినయో? వినయో పటిఞ్ఞాతకరణం, పటిఞ్ఞాతకరణం వినయో? వినయో తస్సపాపియసికా, తస్సపాపియసికా వినయో? వినయో తిణవత్థారకో, తిణవత్థారకో వినయో?

వినయో సియా సమ్ముఖావినయో సియా న సమ్ముఖావినయో. సమ్ముఖావినయో వినయో చేవ సమ్ముఖావినయో చ.

వినయో సియా యేభుయ్యసికా, సియా న యేభుయ్యసికా. యేభుయ్యసికా వినయో చేవ యేభుయ్యసికా చ.

వినయో సియా సతివినయో, సియా న సతివినయో. సతివినయో వినయో చేవ సతివినయో చ.

వినయో సియా అమూళ్హవినయో, సియా న అమూళ్హవినయో. అమూళ్హవినయో వినయో చేవ అమూళ్హవినయో చ.

వినయో సియా పటిఞ్ఞాతకరణం, సియా న పటిఞ్ఞాతకరణం. పటిఞ్ఞాతకరణం వినయో చేవ పటిఞ్ఞాతకరణఞ్చ.

వినయో సియా తస్సపాపియసికా, సియా న తస్సపాపియసికా. తస్సపాపియసికా వినయో చేవ తస్సపాపియసికా చ.

వినయో సియా తిణవత్థారకో, సియా న తిణవత్థారకో. తిణవత్థారకో వినయో చేవ తిణవత్థారకో చ.

వినయవారో నిట్ఠితో ద్వాదసమో.