౧౩. కుసలవారో

౩౦౩. సమ్ముఖావినయో కుసలో అకుసలో అబ్యాకతో? యేభుయ్యసికా కుసలా అకుసలా అబ్యాకతా? సతివినయో కుసలో అకుసలో అబ్యాకతో? అమూళ్హవినయో కుసలో అకుసలో అబ్యాకతో? పటిఞ్ఞాతకరణం కుసలం అకుసలం అబ్యాకతం? తస్సపాపియసికా కుసలా అకుసలా అబ్యాకతా? తిణవత్థారకో కుసలో అకుసలో అబ్యాకతో?

సమ్ముఖావినయో సియా కుసలో, సియా అబ్యాకతో. నత్థి సమ్ముఖావినయో అకుసలో.

యేభుయ్యసికా సియా కుసలా, సియా అకుసలా, సియా అబ్యాకతా.

సతివినయో సియా కుసలో, సియా అకుసలో, సియా అబ్యాకతో.

అమూళ్హవినయో సియా కుసలో, సియా అకుసలో, సియా అబ్యాకతో.

పటిఞ్ఞాతకరణం సియా కుసలం, సియా అకుసలం, సియా అబ్యాకతం.

తస్సపాపియసికా సియా కుసలా, సియా అకుసలా సియా అబ్యాకతా.

తిణవత్థారకో సియా కుసలో, సియా అకుసలో, సియా అబ్యాకతో.

వివాదాధికరణం కుసలం అకుసలం అబ్యాకతం. అనువాదాధికరణం కుసలం అకుసలం అబ్యాకతం. ఆపత్తాధికరణం కుసలం అకుసలం అబ్యాకతం. కిచ్చాధికరణం కుసలం అకుసలం అబ్యాకతం.

వివాదాధికరణం సియా కుసలం, సియా అకుసలం, సియా అబ్యాకతం.

అనువాదాధికరణం సియా కుసలం, సియా అకుసలం, సియా అబ్యాకతం.

ఆపత్తాధికరణం సియా అకుసలం, సియా అబ్యాకతం. నత్థి ఆపత్తాధికరణం కుసలం.

కిచ్చాధికరణం సియా కుసలం, సియా అకుసలం, సియా అబ్యాకతం.

కుసలవారో నిట్ఠితో తేరసమో.