౮. భిక్ఖునోవాదవగ్గో

౪౫౦. ‘‘కతిహి ను ఖో, భన్తే, అఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బ’’న్తి? ‘‘పఞ్చహుపాలి, అఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బం, అవన్దియో సో భిక్ఖు భిక్ఖునిసఙ్ఘేన. కతమేహి పఞ్చహి? వివరిత్వా కాయం భిక్ఖునీనం దస్సేతి, ఊరుం దస్సేతి, అఙ్గజాతం దస్సేతి, ఉభో అంసకూటే దస్సేతి, ఓభాసతి, గిహీ సమ్పయోజేతి – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బం. అవన్దియో సో భిక్ఖు భిక్ఖునిసఙ్ఘేన.

‘‘అపరేహిపి, ఉపాలి, పఞ్చహఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బం, అవన్దియో సో భిక్ఖు భిక్ఖునిసఙ్ఘేన. కతమేహి పఞ్చహి? భిక్ఖునీనం అలాభాయ పరిసక్కతి, భిక్ఖునీనం అనత్థాయ పరిసక్కతి, భిక్ఖునీనం అవాసాయ పరిసక్కతి, భిక్ఖునియో అక్కోసతి పరిభాసతి, భిక్ఖూ భిక్ఖునీహి భేదేతి – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బం, అవన్దియో సో భిక్ఖు భిక్ఖునిసఙ్ఘేన.

‘‘అపరేహిపి, ఉపాలి, పఞ్చహఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బం, అవన్దియో సో భిక్ఖు భిక్ఖునిసఙ్ఘేన. కతమేహి పఞ్చహి? భిక్ఖునీనం అలాభాయ పరిసక్కతి, భిక్ఖునీనం అనత్థాయ పరిసక్కతి, భిక్ఖునీనం అవాసాయ పరిసక్కతి, భిక్ఖునియో అక్కోసతి పరిభాసతి, భిక్ఖూ భిక్ఖునీహి సమ్పయోజేతి – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో భిక్ఖునిసఙ్ఘేనేవ కమ్మం కాతబ్బం, అవన్దియో సో భిక్ఖు భిక్ఖునిసఙ్ఘేనా’’తి.

౪౫౧. ‘‘కతిహి ను ఖో, భన్తే, అఙ్గేహి సమన్నాగతాయ భిక్ఖునియా కమ్మం కాతబ్బ’’న్తి? పఞ్చహుపాలి, అఙ్గేహి సమన్నాగతాయ భిక్ఖునియా కమ్మం కాతబ్బం. కతమేహి పఞ్చహి? వివరిత్వా కాయం భిక్ఖూనం దస్సేతి, ఊరుం దస్సేతి, అఙ్గజాతం దస్సేతి, ఉభో అంసకూటే దస్సేతి, ఓభాసతి, గిహీ సమ్పయోజేతి – ఇమేహి ఖో, ఉపాలి, పఞ్చహఙ్గేహి సమన్నాగతాయ భిక్ఖునియా కమ్మం కాతబ్బం.

‘‘అపరేహిపి, ఉపాలి, పఞ్చహఙ్గేహి సమన్నాగతాయ భిక్ఖునియా కమ్మం కాతబ్బం. కతమేహి పఞ్చహి? భిక్ఖూనం అలాభాయ పరిసక్కతి, భిక్ఖూనం అనత్థాయ పరిసక్కతి, భిక్ఖూనం అవాసాయ పరిసక్కతి, భిక్ఖూ అక్కోసతి పరిభాసతి, భిక్ఖునియో భిక్ఖూహి భేదేతి – ఇమేహి ఖో, ఉపాలి, పఞ్చహఙ్గేహి సమన్నాగతాయ భిక్ఖునియా కమ్మం కాతబ్బం.

‘‘అపరేహిపి, ఉపాలి, పఞ్చహఙ్గేహి సమన్నాగతాయ భిక్ఖునియా కమ్మం కాతబ్బం. కతమేహి పఞ్చహి? భిక్ఖూనం అలాభాయ పరిసక్కతి, భిక్ఖూనం అనత్థాయ పరిసక్కతి, భిక్ఖూనం అవాసాయ పరిసక్కతి, భిక్ఖూ అక్కోసతి పరిభాసతి, భిక్ఖునియో భిక్ఖూహి సమ్పయోజేతి – ఇమేహి ఖో, ఉపాలి, పఞ్చహఙ్గేహి సమన్నాగతాయ భిక్ఖునియా కమ్మం కాతబ్బ’’న్తి.

౪౫౨. ‘‘కతిహి ను ఖో, భన్తే, అఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో’’తి? ‘‘పఞ్చహుపాలి, అఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో. కతమేహి పఞ్చహి? అలజ్జీ చ హోతి, బాలో చ, అపకతత్తో చ, చావనాధిప్పాయో వత్తా హోతి, నో వుట్ఠానాధిప్పాయో – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో.

‘‘అపరేహిపి, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో. కతమేహి పఞ్చహి? అపరిసుద్ధకాయసమాచారో హోతి, అపరిసుద్ధవచీసమాచారో హోతి, అపరిసుద్ధాజీవో హోతి, బాలో హోతి, అబ్యత్తో, న పటిబలో అనుయుఞ్జియమానో అనుయోగం దాతుం – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో.

‘‘అపరేహిపి, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో. కతమేహి పఞ్చహి? కాయికేన అనాచారేన సమన్నాగతో హోతి, వాచసికేన అనాచారేన సమన్నాగతో హోతి, కాయికవాచసికేన అనాచారేన సమన్నాగతో హోతి, భిక్ఖునీనం అక్కోసకపరిభాసకో హోతి, భిక్ఖునీహి సద్ధిం సంసట్ఠో విహరతి అననులోమికేన సంసగ్గేన – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో.

‘‘అపరేహిపి, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో. కతమేహి పఞ్చహి? అలజ్జీ చ హోతి, బాలో చ, అపకతత్తో చ, భణ్డనకారకో చ హోతి కలహకారకో, సిక్ఖాయ చ న పరిపూరికారీ – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న ఠపేతబ్బో’’తి.

౪౫౩. ‘‘కతిహి ను ఖో, భన్తే, అఙ్గేహి సమన్నాగతేన భిక్ఖునా భిక్ఖునీనం ఓవాదో న గహేతబ్బో’’తి? ‘‘పఞ్చహుపాలి, అఙ్గేహి సమన్నాగతేన భిక్ఖునా భిక్ఖునీనం ఓవాదో న గహేతబ్బో. కతమేహి పఞ్చహి? కాయికేన అనాచారేన సమన్నాగతో హోతి, వాచసికేన అనాచారేన సమన్నాగతో హోతి, కాయికవాచసికేన అనాచారేన సమన్నాగతో హోతి, భిక్ఖునీనం అక్కోసకపరిభాసకో హోతి, భిక్ఖునీహి సద్ధిం సంసట్ఠో విహరతి అననులోమికేన సంసగ్గేన – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న గహేతబ్బో.

‘‘అపరేహిపి, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న గహేతబ్బో. కతమేహి పఞ్చహి? అలజ్జీ చ హోతి, బాలో చ, అపకతత్తో చ, గమికో వా హోతి, గిలానో వా – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా భిక్ఖునీనం ఓవాదో న గహేతబ్బో’’తి.

౪౫౪. ‘‘కతిహి ను ఖో, భన్తే, అఙ్గేహి సమన్నాగతేన భిక్ఖునా సద్ధిం న సాకచ్ఛితబ్బో’’తి? ‘‘పఞ్చహుపాలి, అఙ్గేహి సమన్నాగతేన భిక్ఖునా సద్ధిం న సాకచ్ఛితబ్బో. కతమేహి పఞ్చహి? న అసేక్ఖేన సీలక్ఖన్ధేన సమన్నాగతో హోతి, న అసేక్ఖేన సమాధిక్ఖన్ధేన సమన్నాగతో హోతి, న అసేక్ఖేన పఞ్ఞాక్ఖన్ధేన సమన్నాగతో హోతి, న అసేక్ఖేన విముత్తిక్ఖన్ధేన సమన్నాగతో హోతి, న అసేక్ఖేన విముత్తిఞాణదస్సనక్ఖన్ధేన సమన్నాగతో హోతి – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా సద్ధిం న సాకచ్ఛితబ్బో. పఞ్చహుపాలి, అఙ్గేహి సమన్నాగతేన భిక్ఖునా సద్ధిం సాకచ్ఛితబ్బో. కతమేహి పఞ్చహి? అసేక్ఖేన సీలక్ఖన్ధేన సమన్నాగతో హోతి, అసేక్ఖేన సమాధిక్ఖన్ధేన సమన్నాగతో హోతి, అసేక్ఖేన పఞ్ఞాక్ఖన్ధేన సమన్నాగతో హోతి, అసేక్ఖేన విముత్తిక్ఖన్ధేన సమన్నాగతో హోతి, అసేక్ఖేన విముత్తిఞాణదస్సనక్ఖన్ధేన సమన్నాగతో హోతి – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా సద్ధిం సాకచ్ఛితబ్బో.

‘‘అపరేహిపి, ఉపాలి, పఞ్చహఙ్గేహి సమన్నాగతేన భిక్ఖునా సద్ధిం న సాకచ్ఛితబ్బో. కతమేహి పఞ్చహి? న అత్థపటిసమ్భిదాపత్తో హోతి, న ధమ్మపటిసమ్భిదాపత్తో హోతి, న నిరుత్తిపటిసమ్భిదాపత్తో హోతి, న పటిభానపటిసమ్భిదాపత్తో హోతి, యథావిముత్తం చిత్తం న పచ్చవేక్ఖితా – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా సద్ధిం న సాకచ్ఛితబ్బో. పఞ్చహుపాలి, అఙ్గేహి సమన్నాగతేన భిక్ఖునా సద్ధిం సాకచ్ఛితబ్బో. కతమేహి పఞ్చహి? అత్థపటిసమ్భిదాపత్తో హోతి, ధమ్మపటిసమ్భిదాపత్తో హోతి, నిరుత్తిపటిసమ్భిదాపత్తో హోతి, పటిభానపటిసమ్భిదాపత్తో హోతి, యథావిముత్తం చిత్తం పచ్చవేక్ఖితా – ఇమేహి ఖో, ఉపాలి, పఞ్చహఙ్గేహి సమన్నాగతేన భిక్ఖునా సద్ధిం సాకచ్ఛితబ్బో’’తి.

భిక్ఖునోవాదవగ్గో నిట్ఠితో అట్ఠమో.

తస్సుద్దానం –

భిక్ఖునీహేవ కాతబ్బం, అపరేహి తథా దువే;

భిక్ఖునీనం తయో కమ్మా, న ఠపేతబ్బా ద్వే దుకా;

న గహేతబ్బా ద్వే వుత్తా, సాకచ్ఛాసు చ ద్వే దుకాతి.