౭. ముసావాదవగ్గో

౪౪౪. ‘‘కతి ను ఖో, భన్తే, ముసావాదా’’తి? ‘‘పఞ్చిమే, ఉపాలి, ముసావాదా. కతమే పఞ్చ? అత్థి ముసావాదో పారాజికగామీ, అత్థి ముసావాదో సఙ్ఘాదిసేసగామీ, అత్థి ముసావాదో థుల్లచ్చయగామీ, అత్థి ముసావాదో పాచిత్తియగామీ, అత్థి ముసావాదో దుక్కటగామీ – ఇమే ఖో, ఉపాలి, పఞ్చ ముసావాదా’’తి.

౪౪౫. ‘‘కతిహి ను ఖో, భన్తే, అఙ్గేహి సమన్నాగతస్స భిక్ఖునో సఙ్ఘమజ్ఝే ఉపోసథం వా పవారణం వా ఠపేన్తస్స – ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన ఉపోసథో వా పవారణా వా కాతబ్బా’’తి? ‘‘పఞ్చహుపాలి, అఙ్గేహి సమన్నాగతస్స భిక్ఖునో సఙ్ఘమజ్ఝే ఉపోసథం వా పవారణం వా ఠపేన్తస్స – ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన ఉపోసథో వా పవారణా వా కాతబ్బా. కతమేహి పఞ్చహి? అలజ్జీ చ హోతి, బాలో చ, అపకతత్తో చ, చావనాధిప్పాయో వత్తా హోతి, నో వుట్ఠానాధిప్పాయో – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో సఙ్ఘమజ్ఝే ఉపోసథం వా పవారణం వా ఠపేన్తస్స – ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన ఉపోసథో వా పవారణా వా కాతబ్బా.

‘‘అపరేహిపి, ఉపాలి, పఞ్చహఙ్గేహి సమన్నాగతస్స భిక్ఖునో సఙ్ఘమజ్ఝే ఉపోసథం వా పవారణం వా ఠపేన్తస్స – ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన ఉపోసథో వా పవారణా వా కాతబ్బా. కతమేహి పఞ్చహి? అపరిసుద్ధకాయసమాచారో హోతి, అపరిసుద్ధవచీసమాచారో హోతి, అపరిసుద్ధాజీవో హోతి, బాలో హోతి అబ్యత్తో, భణ్డనకారకో హోతి కలహకారకో – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో సఙ్ఘమజ్ఝే ఉపోసథం వా పవారణం వా ఠపేన్తస్స – ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన ఉపోసథో వా పవారణా వా కాతబ్బా’’తి.

౪౪౬. ‘‘కతిహి ను ఖో, భన్తే, అఙ్గేహి సమన్నాగతస్స భిక్ఖునో అనుయోగో న దాతబ్బో’’తి? ‘‘పఞ్చహుపాలి, అఙ్గేహి సమన్నాగతస్స భిక్ఖునో అనుయోగో న దాతబ్బో. కతమేహి పఞ్చహి? ఆపత్తానాపత్తిం న జానాతి, లహుకగరుకం ఆపత్తిం న జానాతి, సావసేసానవసేసం ఆపత్తిం న జానాతి, దుట్ఠుల్లాదుట్ఠుల్లం ఆపత్తిం న జానాతి, సప్పటికమ్మాపటికమ్మం ఆపత్తిం న జానాతి – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో అనుయోగో న దాతబ్బో.

‘‘పఞ్చహుపాలి, అఙ్గేహి సమన్నాగతస్స భిక్ఖునో అనుయోగో దాతబ్బో. కతమేహి పఞ్చహి? ఆపత్తానాపత్తిం జానాతి, లహుకగరుకం ఆపత్తిం జానాతి, సావసేసానవసేసం ఆపత్తిం జానాతి, దుట్ఠుల్లాదుట్ఠుల్లం ఆపత్తిం జానాతి, సప్పటికమ్మాపటికమ్మం ఆపత్తిం జానాతి – ఇమేహి ఖో, ఉపాలి, పఞ్చహఙ్గేహి సమన్నాగతస్స భిక్ఖునో అనుయోగో దాతబ్బో’’తి.

౪౪౭. ‘‘కతిహి ను ఖో, భన్తే, ఆకారేహి భిక్ఖు ఆపత్తిం ఆపజ్జతీ’’తి? ‘‘పఞ్చహుపాలి, ఆకారేహి భిక్ఖు ఆపత్తిం ఆపజ్జతి. కతమేహి పఞ్చహి? అలజ్జితా, అఞ్ఞాణతా, కుక్కుచ్చపకతతా, అకప్పియే కప్పియసఞ్ఞితా, కప్పియే అకప్పియసఞ్ఞితా – ఇమేహి ఖో, ఉపాలి, పఞ్చహాకారేహి భిక్ఖు ఆపత్తిం ఆపజ్జతి.

‘‘అపరేహిపి, ఉపాలి, పఞ్చహాకారేహి భిక్ఖు ఆపత్తిం ఆపజ్జతి. కతమేహి పఞ్చహి? అదస్సనేన, అస్సవనేన, పసుత్తకతా, తథాసఞ్ఞీ, సతిసమ్మోసా – ఇమేహి ఖో, ఉపాలి, పఞ్చహాకారేహి భిక్ఖు ఆపత్తిం ఆపజ్జతీ’’తి.

౪౪౮. ‘‘కతి ను ఖో, భన్తే, వేరా’’తి? ‘‘పఞ్చిమే, ఉపాలి, వేరా. కతమే పఞ్చ? పాణాతిపాతో, అదిన్నాదానం, కామేసుమిచ్ఛాచారో, ముసావాదో, సురామేరయమజ్జప్పమాదట్ఠానం – ఇమే ఖో, ఉపాలి, పఞ్చ వేరా’’తి.

‘‘కతి ను ఖో, భన్తే, వేరమణియో’’తి? ‘‘పఞ్చిమా, ఉపాలి, వేరమణియో. కతమా పఞ్చ? పాణాతిపాతా వేరమణీ [వేరమణి (క.)], అదిన్నాదానా వేరమణీ, కామేసుమిచ్ఛాచారా వేరమణీ, ముసావాదా వేరమణీ, సురామేరయమజ్జప్పమాదట్ఠానా వేరమణీ – ఇమా ఖో, ఉపాలి, పఞ్చ వేరమణియో’’తి.

౪౪౯. ‘‘కతి ను ఖో, భన్తే, బ్యసనానీ’’తి? ‘‘పఞ్చిమాని, ఉపాలి, బ్యసనాని. [పరి. ౩౨౫; అ. ని. ౫.౧౩౦] కతమాని పఞ్చ? ఞాతిబ్యసనం, భోగబ్యసనం, రోగబ్యసనం, సీలబ్యసనం, దిట్ఠిబ్యసనం – ఇమాని ఖో, ఉపాలి, పఞ్చ బ్యసనానీ’’తి.

‘‘కతి ను ఖో, భన్తే, సమ్పదా’’తి? ‘‘పఞ్చిమా, ఉపాలి, సమ్పదా. [పరి. ౩౨౫; అ. ని. ౫.౧౩౦] కతమా పఞ్చ? ఞాతిసమ్పదా, భోగసమ్పదా, ఆరోగ్యసమ్పదా, సీలసమ్పదా, దిట్ఠిసమ్పదా – ఇమా ఖో, ఉపాలి, పఞ్చ సమ్పదా’’తి.

ముసావాదవగ్గో నిట్ఠితో సత్తమో.

తస్సుద్దానం –

ముసావాదో చ ఓమద్ది, అపరేహి అనుయోగో;

ఆపత్తిఞ్చ అపరేహి, వేరా వేరమణీపి చ;

బ్యసనం సమ్పదా చేవ, సత్తమో వగ్గసఙ్గహోతి.